सोफान वेस्टर्नसे धनगढीमेफे शैक्षिक यात्रा सुरु
पहुरा समाचारदाता
धनगढी, १५ कार्तिक । सुदूरपश्चिम प्रदेशमे उच्च शिक्षाके स्तर उकस्ना ऐतिहासिक कदमके रूपमे सोफान वेस्टर्न एकेडेमीसे औपचारिक रूपमे अपन शैक्षिक यात्रा सुरुवाट करले बा । काठमाडौँ विश्वविद्यालयसे सम्बन्धन प्राप्त यी कलेजसे पहिले चरणमे विएसडब्लु कार्यक्रम सुरु करटी सुदूरपश्चिममे गुणस्तरीय उच्च शिक्षाके नयाँ युगके सुरुवात करल हो ।
उदघाटन समारोहके प्रमुख अतिथि तथा काठमाडौँ विश्वविद्यालयके मानविकी तथा व्यवस्थापन संकायके डिन प्रा. डा. उद्दब प्याकुरेलसे उ कलेजके यी पहलहे “प्रदेशमे शिक्षाके पुनर्जागरण” कहटी स्वागत करलै । उहाँक अनुसार, “सुदूरपश्चिम जैसिन सम्भावनायुक्त भूभागमे आब विद्यार्थीनहे काठमाण्डौ नैजाके अन्तर्राष्ट्रियस्तरके शिक्षाके अनुभव लेहे सेक्ना डगर खुलल बा ।”
कार्यक्रममे कलेजके निर्देशक शैलेश सिंहसे “शिक्षा ओ रोजगारीबीचके पुल”के रूपमे परिभाषित करटी कहलै— “हम्रे केवल पढाइ नाही, सोच बदल्न शिक्षाके वातावरण निर्माण करटी । सामाजिक कार्य ओ मनोविज्ञानके संयोजनसे प्रदेशके मानसिक, सामाजिक ओ आर्थिक रूपान्तरणमे योगदान पुगाई ।”
उदघाटन कार्यक्रममे स्थानीय शिक्षाप्रेमी, बुद्धिजीवी, अभिभावक ओ विद्यार्थीनके उल्लेखनीय उपस्थिति रहे । वक्ताहुक्रे काठमाडौँ विश्वविद्यालयके सम्बन्धनसे सुदूरपश्चिमके विद्यार्थीनके लाग ‘काठमाडौँ नैपुगके काठमाडौँस्तरके शिक्षा’ प्राप्त कैना अवसर खुलल बटैले रहिट ।
भविष्यमे व्यवस्थापन, सूचना प्रविधिलगायतके विषय सुरु कैना तयारी करल बा । अत्याधुनिक प्रयोगशाला, अनुभवी शिक्षकमण्डल, ओ अन्तरक्रियात्मक शिक्षण विधिसे यी कलेजहे प्रदेशके नमुना बनैना अपेक्षा करल बा । सुदूरपश्चिमके युवा आब अपने प्रदेशमे विश्वस्तरीय शिक्षाके सपना साकार पर्ना बिश्वास लेहल बा ।
