सुदूरपश्चिमके १९औं संस्करण अगहन २२ गतेसे
पहुरा समाचारदाता
धनगढी, १६ कार्तिक । सुदूरपश्चिम महोत्सव २०८२ के १९औं संस्करण अगहन २२ गतेसे पुस २ गतेसम संचालन हुइना जनागिल बा ।
महोत्सव आयोजक कैलाली उद्योग वाणिज्य संघसे अँटवारके रोज पत्रकार सम्मेलनके आयोजना करके उ जानकारी डेहल हो ।
संघके अध्यक्ष पुष्करराज ओझा सुदूरपश्चिमके कला, संस्कृति, परम्परा, खानपान ओ कृषिके प्रवद्र्धन कैनाके साथे व्यापारिक गतिविधि विस्तार कैना महोत्सवके उद्देश्य रहल जनैलै । महोत्सवसे प्रदेशके आर्थिक, सामाजिक ओ सांस्कृतिक एकता सुदृढ कैना मद्दत पुगैना विश्वास लेहल बा ।
उहाँ महोत्सवसे स्थानीय उत्पादन, हस्तकला, कृषि उपज, उद्यमशीलता ओ पर्यटन प्रवद्र्धनमे समेत टेवा पुग्ना बटैलै । अध्यक्ष ओझाके अनुसार यी बरस महोत्सवमे स्थानीय कलाकारके सांस्कृतिक प्रस्तुति, कृषि तथा उद्योग प्रदर्शनी, महिला तथा युवाका उद्यम स्टल, विविध प्रतियोगिता ओ मनोरञ्जनात्मक कार्यक्रम रहना बावै ।
साथे बालबालिकाके लाग खेलकुद क्षेत्र, कृषि प्रविधि प्रदर्शन ओ घरेलु उत्पादनके बिक्री समेत हुइना जनाइल बा । “समृद्ध सुदुरपस्चिमके लाग आर्थिक समृद्धि” कना मूल नाराके साथ आयोजना हुइना महोत्सवके लागत ३ करोड अनुमान करल बा । कलेसे सात लाख व्यक्तिसे अवलोकनके अपेक्षा कैटी १५ करोड बराबरके आर्थिक करोवार हुइना अध्यक्ष ओझा अनुमान करल बटैलै ।
महोत्सव धनगढी उपमहानगरपालिका १ पशुपति टोलमे सञ्चालन हुइना बा । महोत्सवमे सुदूरपश्चिमके सात जिल्लाके व्यापारी, उद्योगी, कृषक तथा सांस्कृतिक समूहके सहभागिता रहना जनाइल बा ।
महोत्सवमे पाँचसय स्टल रहना जनाइल बा । ओम्नेसे कृषिके लाग ४० ठो निःशुल्क स्टल, महिला उद्यमी, एकल महिला स्थानीय परिकारके लाग १५ स्टल रहना जनाइल बा । महोत्सव अवलोकनके लाग विद्यार्थी, खेलाडीहे ५० रुप्या टिकट दर निर्धारण करल बा कलेसे सर्वसाधरणके लाग एकसय रुप्या ओ जेष्ठ नागरिक, फरक क्षमता रहल व्यक्तिके लाग प्रवेश निःशुल्क रहना जनाइल बा । ओस्टके संघमे दर्ता होके नियमानुसार नविकरण हुइल व्यवसायी सदस्यहे सदस्यता पत्र डेखाके निःशुल्क प्रवेश पैना रहल बा ।
सास्कृतिक रुपमे धनी सुदुरपश्चिमके कला संस्कृतिके गरक्षण सगै यी क्षेत्रके कला संस्कृतिमे सम्भावना रहल ओ योगदान डेहल कलाकारहुकनहे स्टेजमे प्राथमिकता डेना, यी क्षेत्रके उद्यमी व्यवसाय उत्पादनहे प्राथमिकता जनागिल बा ।
सुदुरपश्चिमके परिकार सहितके महोत्सव स्थलमे खाना खाजाके स्टल रना बा । जेम्ने सरसफाइ तथा उत्कृष्ट व्यवस्थापनके लाग सरोकार निकाय विच समन्वय करटी रहल अध्यक्ष ओझा जनैलै ।
महोत्सवमे स्थानिय व्यवसायीहे विषेश प्राथमिकता डेना बा कलेसे कैलाली उद्योग वाणिज्य संघमे दर्ता हुके नियमानुसार नविकरण हुइल सदस्यहे विषेश छूट तथा सहुलियत प्रदान कैना जनागिल बा ।
महोत्सवमके व्यवसाय तथा दर्शकहुकनके सुरक्षाहे ध्यान डेके विमाफे कैना बा कलेसे भैपरि अइना विपदके पूर्व तयारीके लाग दमकल, प्राथमिक उपचारलगायत तयारी अवस्थामे रना जनाइल बा ।
यी वर्षके महोत्सवमे करिब ७ लाख व्यक्तिसे अवलोकन कैना अनुमान करल बा । सुदुरपश्चिमवासीसे गर्वके साथ पर्वके रुपमे मन्टी आइल सुदुरपश्चिम महोत्सव व्यापार व्यवसायके जगतमे उत्कृष्ट ओ अनुपम नमुनाके रुपमे रना विश्वास लेहल बा । महोत्सवहे भब्यरुपमे सम्पन्न करेक लाग मुल आयोजक समिति सहित २३ उप समिति रहल बा ।
