थारु नागरिक अभियान गठन

पहुरा समाचारदाता
धनगढी, १७ कार्तिक । थरुहट/थारुवान मोर्चाके मुद्दा उठान तथा बहस कैना ओ निस्पक्ष/स्वतन्त्र प्रगतिशील अभियान संचालन करेक लाग थारु नागरिक अभियान गठन कैगिल बा ।

यिहे गैल भदौ २३ ओ ३४ गतेक जेन्जी आन्दोलन पश्चात् नेपालके थारु समाजमे डेखल शूण्यता ओ यी विषम परिस्थितिमे देशके परिवर्तित अवस्थामे समग्र थारु समुदायके भुमिकाके सन्दर्भमे थारु समुदायके आवाज बुलन्द करल लाग युवा अभियन्ता इन्दु थारुके संयोजकत्वमे थारु नागरिक अभियान गठन हुइलक हो ।

जेनजी आन्दोलनपाछे थारु समाजमे डेखलक उकुसमुकुस तथा शूण्यताहन सम्बोधन कैना थरुहट थारुवान मोर्चाके मुद्दा उठान तथा बहस करेक लाग एक ठो लुच फोरम आवश्यकता महसुस कैटी काठमाडौमे बैस्लक प्रारम्भिक बैठक भेलासे थारु नागरिक अभियान गठन कैगिलक थारु अगुवा माधव थारु जनैलै ।

वसहेक थारु नागरिक अभियान अन्तर्गत रना कैकै जेन्जी संयोजकके जिम्मेवारी अर्नप चौधरीहे सर्बसम्मत डिहल बा । थारु नागरिक अभियानके पहलमे काठमाडौलगायत देशभरके सक्कु थारु समुदायसंग सम्बन्धित संघ संस्था, थारु अगुवा, लगायत सरोकारवालाहुँक्रनसे बृहट अन्तरकृया कैना अभियान संचालन कैना निर्णय हुइलक माधव थारु जनैलै । थारु युवा थारु अगुवाहुँक्रनहे यी अभियानमे इमानदारिताके साथ जोरना व थरुहट थारुवान आदोलनसे उठान करलक मुद्दा सम्बोधन प्रक्रियामे हातेमालो कैना अपीलफे कैगिल बा ।