सामुदायिक वनके महिला पदाधिकारीनहे लैङिकमैत्री कार्ययोजना अभिमुखीकरण

पहुरा समाचारदाता
धनगढी, १९ कार्तिक । कैलाली जिल्लाके कैलारी गाउँपालिका अन्र्तगतके सामुदायिक वन उपभोक्ता समुहके नेतृत्व भूमिका रहल महिला पदाधिकारीहुकनके लाग एक दिने लैङिकमैत्री कार्ययोजना सम्बन्धी अभिमुखीकरण कार्यक्रम हसुलियामे सम्पन्न हुइल बा ।

डिसिएके आर्थिक सहयोग तथा दलित महिला अधिकार मञ्चद्वारा संचालित रेसिष्ट परियोजना अन्तर्गत कैलारी गाउँपालिकाके २५ ठो सामुदायिक वन उपभोक्ता समितिके नेतृत्व भुमिकामे रहल महिला पदाधिकारीनह लैगिकमैत्री योजना निर्माणके लाग अभिमुखिकरण कार्यक्रम संचालन करल हो ।

कैलारी गाउँपालिका उपाध्यक्ष भगवतीकुमारी चौधरीके प्रमुख आतिथ्यतामे हुइल कार्यक्रममे उहाँ महिलाहुक्रे कौनो नेतृत्वमे हुइलपाछे दुनु ओरसे भुमिका निर्वाह करेपर्ना बाध्यता रहल बटैली ।
एक ठो महिला कौनो पदमे हुइलपाछे कार्यालयके काम सेक्के घरे आइलपाछे गृहिणीके सक्कु काम करेपर्ना रहठ, उहाँ कहली, ‘पुरुष मनै उहे पदमे रहेबेर कार्यालयके काम सेक्के घर आईबेर सघाइल नैविल्गाइठ । महिलाहुक्रे घरमे हिंसामे परठै । ओटर केल्ह नाही कार्यक्षेत्रमे समेत हिंसामे परल विल्गाइठ ।

महिलाहुक्रे अब छोट छोट विषयहे उठान करके लैङिक तथा विपन्नमैत्री कार्ययोजना बनाईपर्ना ओ महिलाहुक्रे नेतृत्व तहमे अइना एक दुसरहे सघाईपर्ना जरुरी रहल गाउँपालिका उपाध्यक्ष बटैली ।

सामुदायिक वनमे आम्दानी हुइल रकम कुछ प्रतिशत रकम समुदायके महिला, दलित, विपन्न तथा सिमान्तकृत वर्गमे बजेट लगानी करेक लाग योजना तयार कैना, बजेट विनियोजन तथा कार्यान्वयन करेक लाग क्षमता विकास करेपर्ना कार्यक्रमके उद्देश्य रहल बा ।

ओस्टेक करके सामुदायिक वन उपभोत्ता समूहके विधान कार्ययोजना यैसिन बा लोङिक, दलित, विपन्न तथा सिमान्तकृत वर्गके लाग बजेट योजना बनाइल बा नैहो आगामी दिनमे कार्ययोजनामे समावेश करेक लाग समूहके पदाधिकारीनहे अभिमुखिकरण करल रहे ।

कार्यक्रमके सहजीकरण डिसिएके कार्यक्रम व्यवस्थापक सूर्य कुमारी विश्वकर्मा करल रहिट । उहाँले सामुदायिक बनके विधान तथा कार्ययोजना मजा बा ओ उ अनुसार लैङिकता तथा विपन्न बर्गके क्षेत्रमे आगामी कार्ययोजना तथा बजेट निर्माण करजाए कहिके सुझाव डेलै ।

सामुदायिक वनके पदाधिकारीहुक्रेफे अपने राय ओ विचारके अनुसार कुछ काम करटी रहल ओ कुछ काम अगामी दिनमे लैङिक तथा विपन्नमैत्री योजना तथा बजेट निर्माण करके कार्यान्वयन कैना प्रतिवद्धता जनैले बटै ।

कार्यक्रमके संचालन निलु चौधरी ओ स्वागत मन्तव्य दलित महिला अधिकार मञ्चके कार्यक्रम अधिकृत मिन बहादुर हुडके करल रहिट ।