प्रदेश सभा हाली सञ्चालन कैना निर्णय
पहुरा समाचारदाता
धनगढी, १९ कार्तिक । सुदूरपश्चिम प्रदेश सभाहे हाली सञ्चालन कैना सर्वदलीय बैठकसे निर्णय करले बा ।
मुख्यमन्त्री कमलबहादुर शाहके अध्यक्षतामे बुधके बैठल सर्वदलीय बैठकसे प्रदेश सभा हाली सञ्चालन कैना निर्णय करल हो ।
जेनजी आन्दोलनके क्रममे प्रदेश सभामे आगजनी ओ तोडफोड करलपाछे सभा सञ्चालन हुई सेकल नैहो । ओस्टे, बैठकसे मुख्यमन्त्री तथा मन्त्रीपरिषद्के कार्यालयहे थप स्पष्ट करल परिपत्र अनुसार प्रदेश सरकारके काम कारबाही प्रदेश ऐन ओ कानुन बमोजिम कार्यान्वयन कैना निर्णय करल बा ।
ओस्टेक करके, प्रदेश सुरक्षा संयन्त्रहे मजबुत बनैना सुरक्षा सम्बन्धी भदौं २३, २४ गतेसे पहिले हुइल व्यवस्था तत्काल कार्यान्वयन कैना सरकारसे निर्देशन डेना निर्णय करल बा । साथे, थप आवश्यक सुरक्षा सम्बन्धी व्यवस्था प्रदेश सुरक्षा समितिके निर्णय अनुसार कैना बैठकसे निर्णय करले बा । बैठकमे सभामुख भीमबहादुर भण्डारी, नेकपा (एमाले) के संसदीय दलके नेता राजेन्द्रसिंह रावल, नागरिक उन्मुक्ति पार्टीके दलके नेता घनश्याम चौधरी, राप्रपाके दलके नेता खेमादेवी विष्ट, नेपाली कांग्रेसके प्रमुख सचेतक विक्रमसिंह धामी उपस्थित रहल रहिट ।
ओस्टेक करके, नेकपा (माओवादी केन्द्र) के उपनेता अक्कलबहादुर रावल, नेपाली कांग्रेसके पदमबहादुर शाहीकेफे बैठकमे उपस्थिति रहल रहे ।
