नवजीवन सेवा संघके सामाजिक परिक्षण कार्यक्रम

पहुरा समाचारदाता
धनगढी, २० कार्तिक । नवजीवन सेवा संघ धनगढी कैलालीके सामाजिक परिक्षण कार्यक्रम हसुलियामे सम्पन्न हुइल बा ।

नवजीवन सेवा संघसे कैलारी गाउँपालिकामे सन २०२२ से २०२५ डिसेम्बरसम परियोजनामार्फत संचालन कैना गतिविधिके सामाजिक परिक्षण कार्यक्रम करल हो । संघके अध्यक्ष शंकरबहादुर चन्दके अध्यक्षतामे हुइल कार्यक्रमके प्रमुख अतिथि कैलारी गाउँपालिकाके उपाध्यक्ष भगवतीकुमारी चौधरी रहल रहिट ।

कार्यक्रममे सम्बोधन कैटी उहाँ नवजीवन सेवा संघसे सामाजिक रुपान्तरणसंगे पालिकामे दिगो विकासके क्षेत्र सह्रनिय कार्य करल बटैली । संघसे संचालन करल कार्यक्रमसे शिक्षा, स्वास्थ्य, पोषण, खानेपानी, जिविकोपार्जनमे टेवा प्ुगल बा । संस्थाके हरेक गतिविधिहे आत्मसाथ कैटी आघे बह्रे पर्ना गाउँपालिका उपाध्यक्ष बटैली ।

परियोजनाके संचालन करल गतिविधिसे सामाजिक विकाससंगे भौतिक विकासमे अतुलनिया सहयोग पु्गल बा, उहाँ कहली, ‘सस्थाके कार्यक्रम काल्हके दिनमे नैरहलेसेफे उ मार्फत हुइल भौतिक संरचना सहयोग आपन मानके आघे बह्रेपर्ना बा । ओकर संरक्षण करेपर्ना जरुरी बा । संस्थासे कैलारीमे परियोजना संचालन कैडेलकमे धन्यावादसमेट डेले बटी ।

सामाजिक परिक्षण कार्यक्रममे नवजीवन सेवा संघके कार्यक्रम संयोजक एकिन्द्र ठकुल्ला सस्थासे कैलारी गाउँपालिकामे संचालन गतिविधिबारे प्रस्तुतीकरण करल रहिट । संघसे कैलारी गाउँपालिकामे शिक्षा, स्वास्थ्य, पोषण, खानेपानी, जिविकोपार्जनके क्षेत्रमे टमान मेरिक कार्यक्रम संचालन करल बटैलै । विद्यालयके भवन स्तरोन्नती, नमूना शौचालय, खानेपानी धारा निर्माण, जिविकोपार्जनके लाग १२२ जनहन विउके लाग छेगरी वितरण, शिक्षकहुकनहे तालिम, आमा समुहके क्षमता विकास करल जनैलै ।

संस्थासे विद्यालयमे पालिकाके समन्वयमे शैक्षिक सामाग्री वितरण, विद्यालयहे प्राविधिमैत्री बनाइक शिक्षकहुकन तालिमसंगे कम्प्यूटर सहयोग कैगिल बा ।

पोषणके क्षेत्रमे तालिम संचालन, पालिका भर ५३० ठो खानेपानीके लाग नल्का सहयोग तथा पानीके गुणस्तर जाँच, बालबालिकाके स्वास्थ्य परिक्षण, प्राकृतिक जोखिम न्यूनिकरणके लाग तालिम तथा वृक्षरोपणमे सहयोग करल कार्यक्रम संयोजक ठकुल्ला जनैलै । कार्यक्रममे सिएफसीसीके अध्यक्ष रमेश चौधरी सुर्मी नालासे उत्तरओर लगाइल रुखुवा संरक्षणके अभाव हुइल ओरसे उहीहे जोगाई पर्ना सुझाव डेहल रहिट । शिक्षक ख्ुशीराम चौधरीफे आपन बाट राखल रहिट ।

कार्यक्रममे स्वागत मन्तव्य संघके कोषाध्यक्ष कृष्णकुमार विक करल रहिट । कार्यक्रममे गाउँपालिकाके प्रमुख प्रशासकीय अधिकृत खगेन्द्रराज जोशी, वडा अध्यक्षहुक्रे, कार्यपालिका सदस्य, संघके फिल्ड संयोजक प्रमिन्द्र श्रेष्ठ, फिदाके आरके चौधरी, गाउँपालिकाके टमान शाखाके प्रमुख, विद्यालयके प्रअ, टमान विद्यालयके बालविकास शिक्षक, विद्यालय व्यवस्थापन समितिके अध्यक्षहुक्रे, महिला स्वास्थ्य स्वयम सेविका संयोजकहुक्रे, आमा समुह, क्लवके प्रतिनिधिलगागतके सहभागिता रहल रहे ।

कार्यक्रममे संघसे संचालन परियोजनाहे टमान क्षेत्रमे सहयोग करुइया विद्यालय, बालविकास, वडा कार्यालय, गाउँपालिकाहे प्रशंसापत्र हस्तान्तरण कैगिल बा ।