एकिन तथ्याङक हुइलेसे मुक्तकमलरी, कमैया पुनस्र्थापना कैबीः मन्त्री थापा
पहुरा समाचारदाता
धनगढी, २४ कार्तिक । सिडा तथा मुक्तकमलरीके परिचयपत्र तथा पुनस्र्थापना विषयक छलफल कार्यक्रम धनगढीमे सम्पन्न हुइल बा ।
राष्टिय आदिवासी जनजाती महिला मञ्चके आयोजना तथा म्ुक्तकमलरी विकास मञ्च केन्द्रीय कार्यालयके समन्वयमे छलफल हुइल हो । छलफल कार्यक्रमके प्रमुख अतिथि सुदूरपश्चिम प्रदेश सरकार भुमी व्यवस्था तथा कृषि सहकारी मन्त्री विरबहादुर थापा मुक्तकमैया, कमलरी, हलिया मुक्ती घोषणाहुकेफे अभिन पुनस्र्थापना हुई नैसेक्ना दुःखद रहल बटैलै ।
पुनस्र्थापना बाँकी तथा सरकारके तथ्याङकमे छुटल बास्ताविक मुक्तकमैया, कमलरी, हलियाके एक फेरा तथ्यांक लेके हुइलेसेफे प्रदेश सरकार कृषिके बजेट कटौटी कैकेफे पुनस्र्थापना कैना मन्त्री थापा बटैलै ।
उहाँ कहलै, ‘मुक्तकमैया, कमलरी, हलिया पुनस्र्थापनाके लाग प्रदेश सरकार २० करोड रुप्या लग्लेसे प्रक्रिया आघे बह्रैना तयार बा । मने अन्तिम तथ्यांक हुईना आवश्यक बा ।
मुक्तकमैया, कमलरी, हलिया पुनस्र्थापनाके काम संघ सरकारसे करटी आइल रहे । संघीयता आइलपाछे स्थानीय सरकारहे हस्तान्तरण करले बा । पुनस्र्थापनाके नाउँमे असार २४ गते पैसा डेहल ओ २५ गते खाता बन्द हुइलपाछे उ बेला पुनस्र्थापनाके काम आघे नैबह्रल मन्त्री थापा कहलै ।
मुक्तकमैया, कमलरी, हलिया पुनस्र्थापनाके लाग प्रदेश सरकारसे कार्यविधि बनाइल मने दुई, तीन स्थानीय सरकार बाहेक और स्थानीय तहसे मुक्तकमैया, कमलरी, हलिया पुनस्र्थापना कार्यविधि नैल्यानल ओरसे पुनस्र्थापनाके काम आघे बह्रे नैसेकल उहाँ बटैलै ।
सुदूरपश्चिम प्रदेशके नौ जिल्लामे कैलाली कञ्चनपुरमे मु्क्तकमैया, कमलरी रहल बटै । कलेसे सक्कु जिल्लामे मुक्तहलिया रहल बटै । उ जिल्ला मन्से कैलालीके भजनी नगरपालिका मुक्तकमैया, कमलरी, हलिया पुनस्र्थापना कार्यविधि ल्यानके राजपत्रमे प्रकाशित करले बा । जानकी गाउँपालिकासे भर कार्यपालिकाके बैठकसे पारित करल मने राजपत्रमे हाली प्रकाशित कैना तयारीमे रहल बा ।
ओस्टेक कञ्चनपुरके लालझाँडी गाउँपालिकासेफे उ कार्यविधि ल्याने लागल बा । संघीय सरकारसे पुनस्र्थापनाके काम स्थानीय सरकारहे जिम्मा लगाइल ओरसे कार्यविधि नैबनटसम पुनस्र्थापना हुई नैसेक्ना मन्त्री थापा बटैलै । प्रदेश सरकारसे मुक्तकमैया, हलियाके लाग आवस गृह निर्माण करटी रहल ओरसे मुक्तकमलरीके नाउँमे जग्गा हुइलेसे ओइनके लागफे आवस गृह बनैनामे सहयोग कैना मन्त्री बटैलै ।
प्रदेश सरकारसे हाली भुमि निति ल्यन्नाफे मन्त्री थापा जनैलै ।
मुक्त कमलरी विकास मञ्चके केन्द्रीय अध्यक्ष हिरामोती चौधरी मुक्तकमलरीके अइना बजेट मुक्तकमलरीसे नैपैना दुःखद रहल बटैली । मुक्तकमलरी सक्कु जिल्लाके तथ्यांक हेरेबेर करिब ६/७ सय मुक्तकमलरी रहल ओरसे ओइन लाग आवास निर्माण आवश्यक रहल उहाँ बटैली । सरकार ओ मुक्तकमलरी विच हुइल कार्यान्वयन नैहुइल कारण मुक्तकमरी सरकारसे पैना सेवा सुविधासे बञ्चित हुइल उहाँ बटैली । कमलरी मुक्ती घोषणा हुकेफे मुक्तकमलरीहुक्रे परिचयपत्रफे बञ्चित हुइल बटैली ।
मुक्तकमलरीहुक्रे आर्थिक अभावमे पढाई छोरना बाध्य रहल, छोट उमेरमे भोज कैना बाध्यता रहल उहाँ बटैली ।
सुदूरपश्चिम प्रदेश सरकार भुमी व्यवस्था तथा कृषि सहकारी मन्त्रालयके सचिव हेमराज कोइराला सरकारसे प्रतिवद्धता जनाइल अनुसार राष्ट्रिय आवश्यकता कार्यान्वयन संगसंगे लैजाई पर्ना बटैलै । प्रदेश सरकारसे समावेशिता ओ जनसहभागिताहे मध्य नजर करके आघे बह्रल बटैलै ।
भजनी नगरपालिकाके नगर प्रमुख केवल चौधरी बास्ताविक मुक्तकमैया, कमलरी, हलिया अभिन अधिकारसे बञ्चित रहल बटैलै । उहाँ भजनी नगरपालिकासे मुक्तकमैया, कमलरी, हलिया कार्यविधि बनाके कार्यान्वयनके चरणमे रहल बटैलै ।
लालझाँडी गाउँपालिकाके अध्यक्ष निर्मल राना आदिवासी जनजाती प्रकृति पुजक रहल बटैलै । उहाँ आदिवासी जनजाती समुदाय काल्हफे प्रकृति पु्जा करल ओ आजफे ओक्रे पुजा करटी आइल बटैलै ।
राष्टिय आदिवासी जनजाती महिला मञ्चके केन्द्रीय अध्यक्ष सुनी लामा सिडा कमितिमे पहिल चो मुक्तकमलरीके मुद्दा समावेश करके छाया प्रतिवेदन पठाइल ओ सुझावफे आसेकल बटैली । सिडामे पहिले पहिले महिला अधिकार केल्ह समेटल मने अब्बे आदिवासी जनजातीफे जोरके आइल बटैली ।
कार्यक्रममे मञ्चके उपाध्यक्ष यशोकान्ति भट्टचन सिडामे आदिवासी जनजाती महिलाके मुद्दाबारे, राष्ट्रिय आदिवासी जनजाती महासंघके केन्द्रीय महासचिव विवस राई जैविक विविधता ओ ओकर संरक्षणबारे प्रस्तुती करल रहिट । कार्यक्रममे मुक्तकमलरी विकास मञ्चके केन्द्रीय सदस्य सितल चौधरी, कैलालीके अध्यक्ष विन्द्रा कुमारी चौधरी, कञ्चनपुरके अध्यक्षम सीता चौधरी मुक्तकमैया, कमलरी, हलिया पुनस्र्थापना कार्यविधि ल्यन्नामे कौनो चासो नैडेहल बटैलै ।
कैलालीमे दुई पालिका ओ कञ्चनपुरमे एक पालिकासे कार्यविधि आघे बह्रल ओरसे नौ बाँकी पालिका हाली कार्यविधि ल्यानेक लाग प्रदेश सरकारसे दवाव डैदेना आग्रह करलै । मुक्तकमलरीहुक्रे अभिन परिचयपत्र नैपैना सरकार मुक्तकमलरीहे वेवास्ता करल उहाँहुक्रे आरोप लगैलै । बाटचित करके बरघर ठाकुर प्रसाद करियाप्रधान सरकारहे मुक्तकमलरी मुद्दाप्रति गम्भीर हुइना आग्रह करलै ।
कार्यक्रममे घोडाघोडी नगरपालिकाके नगर उपप्रमुख गुलिया चौधरी, जानकी गाउँपालिका उपाध्यक्ष लालमति कठरिया, लालझाँडी गाउँपालिका उपाध्यक्ष सपना चौधरीराना, मुक्तकमलरी विकास मञ्चके पदाधिकारीहुक्रे, गैरसरकारी संस्थाके प्रतिनिधिहुकनके सहभागिता रहे । कार्यक्रममे मुक्तकमैया, कमलरी, हलिया पुनस्र्थापना कार्यविधि ल्यानल कहटी भुमि व्यवस्था कृषि तथा सहकारी मन्त्री विरबहादुर थापा, भजनी नगरपालिकाके नगर प्रमुख केवल चौधरी ओ जानकी गाउँपालिका उपाध्यक्ष लालमति कठरियाहे दोसल्ला ओह्रके सम्मान कैगिल बा ।
