पहुरा थारू दैनिक ‘थारू रत्न’ से सम्मानित हुइटी

पहुरा समाचारदाता
धनगढी, २६ कात्तिक । कैलालीके धनगढीसे नियमित प्रकाशन हुइटी आइल पहुरा थारू दैनिक पत्रिकाहे थारू रन्तसे सम्मान कैना हुइल बा ।

थारू आयोग आपन सातौं वार्षिकोत्सवके अवसरमे पहुरा पत्रिका लगायत टमान व्यक्तित्वहे थारू रत्न ओ थारू गौरवसे सम्मान कैना जनैले बा । आयोगके सदस्य शान्ति मोदी थारू आयोगसे सम्मान हुउइयाके नामावलीबारे जानकारी डेहल रही । उहाँ थारू रत्नसे सम्मानित हुउइयामे पहुरा थारू दैनिक पत्रिका (कैलाली), लेखक लक्ष्मण चौधरी (उदयपुर), डा। गोपाल दहित (बर्दिया), श्रीपति चौधरी (दाङ), हृदयनारायण चौधरी (बारा), स्वर्गीय भानुराम माझी (मोरङ), परशुराम भगत (मोरङ), सत्यनारायण चौधरी (मोरङ), हौली परिवार (सुनसरी, मोरङ) लगायत रहल बटै ।

पहुरा थारू भाषा कला, संस्कृति ओ समाचारमूलक दैनिक पत्रिका हो । जिल्ला प्रशासन कार्यालय कैलालीमे २०६० चैत २४ गते साप्तहिक पत्रिकाके रुपमे दर्ता होके प्रकाशन सुरु करल पहुरा २०६६ चैत २९ गतेसे दैनिक पत्रिकाके रुपमे नियमित प्रकाशन हुइटी आइल बा ।

पहुराहे २०६७ चैत १० गते प्रेस काउन्सिल नेपालसे सम्मान फेन करल बा । थारू भाषा, पत्रकारिताके विकासके लाग विशेष पहल तथा योगदान पुगाइल कहटी ‘प्रेस काउन्सिल भाषागत पत्रकारिता पुरस्कार’से सम्मान करल हो ।

यकर साथे थारू भाषा, संस्कृति संरक्षण ओ सूचना तथा समाचारके माध्यमसे समाजमे महत्वपूर्ण योगदान पुगाइल कहटी टमान संघ संस्थासे फेन सम्मान करल बा । पहुरा प्रेस काउन्सिल नेपालसे कैना पत्रपत्रिका वर्गीकरणमे २०६८ से अब्बेसम नियमित ‘क’ वर्गमे परटी आइल बा । प्रिन्ट मिडियाके रुपमे नियमित प्रकाशन हुइटी आइल पहुरा अब्बे अनलाइन न्यूज पोर्टल अर्थात अनलाइन पत्रिका www.pahura.comके रुपमे फेन सञ्चालनमे रहल बा ।

ओस्टके थारू गौरवसे सम्मान हुउइयामे थारू आयोगके पूर्व अध्यक्ष विष्णु चौधरी, सदस्य डा. उमाशंकरप्रसाद चौधरी, सत्यमोहन जोशी (सप्तरी), युनिक नेपाल (बर्दिया), भगवती चौधरी (सुनसरी), सिनेकर्मी परशुराम चौधरी (सुनसरी), देवकुमार चौधरी (झापा), पत्रकार लक्की चौधरी (कैलाली), शान्ति चौधरी (बारा), शान्ता चौधरी (दाङ), प्रदीप भगत (सुनसरी) रहल बटै ।

ओस्टके, थारू आयोगके पूर्व सचिव कृष्णकान्त उपाध्याय, पूर्व शाखा अधिकृत जागुराम चौधरी लगायत कर्मचारीहे प्रोत्साहन पुरस्कार डेना जनाइल बा । यी अन्तिम सूची नैहल ओरसे पाछे फेन थपे सेकजैना सदस्य मोदी जानकारी डेली । अइना माघ टिहवारके अवसर पारके सम्मानित करजैना समेत सदस्य मोदी जानकारी डेली । उहीसे आघे थारू आयोगसे पहिलचो २०८० सालमे फेन टमान व्यक्तित्वहे सम्मान करल रहे ।

आयोगके वार्षिकोत्सव कार्यक्रमके बर्का पहुना राष्ट्रिय मानव अधिकार आयोगके अध्यक्ष तपबहादुर मगर रहल रहिट । उहाँ आयोगसे करल सिफारिस कार्यान्वयके अवस्था निराशाजनक रहल बटैलै ।

थारू आयोगके सचिव रुद्रप्रसाद लामिछाने राजदूतलगायत टमान निकायमे थारू समुदायकेहे नियुक्ति सिफारिस करलमे कार्यान्वयन नैहुइल बटैलै ।

थारू कल्याणकारिणी सभाके केन्द्रीय अध्यक्ष प्रेमीलाल चौधरी थारू आयोगके कामके पुनरावलोकनके समय आइल मने कुछ काम नैहुइलमे चिन्ता व्यक्त करलै । थरुहट संघर्ष ओ बलिदानीसे आयोग गठन करलमे सक्कु जाने एकजुट होके आयोगहे डोर्याइना आजके आवश्यकता रहल बटैलै ।

आयोगके कावा अध्यक्षता सुबोधसिंह थारूके अध्यक्षतामे हुइल कार्यक्रममे आयोगके सदस्य भोलाराम चौधरी स्वागत मन्तव्य राखल रहिट ।