मृतक शेरबहादुरके आफन्तसे दोषीहे कारवाहीके माग करटी मानवअधिकार आयोग ओ इन्सेकमे ज्ञापनपत्र
पहुरा समाचारदाता
धनगढी, २८ कार्तिक । कैलाली जिल्लाके गोदावरी नगरपालिका–१० खामौरा निवासी शेरबहादुर चौधरीके गैल कुवाँर २३ गते हत्या कैगिल रहे ।
उ घटनामे संलग्न हत्याके आरोपमे दुई जनहनहे प्रहरी पक्राउ करल मने गहिरो अध्ययन विना एक जनहनहे छोरल कहटी मृतकके आफन्तहुक्रे दोषीहे कार्वाहीके माग करटी शुकके रोज राष्ट्रिय मानव अधिकार आयोग सुदूरपश्चिम प्रदेश ओ इन्सेक सुदूरपश्चिम प्रदेश कार्यालयहे ज्ञापनपत्र बुझैले बटै ।
मृतक शेरबहादुर चौधरीके डाई पुतलीदेवी डगौरा, भैया रमेश चौधरी, बहुरिया सलिना चौधरी, मृतहके आफन्तहुक्रे, गोदावारी नगरपालिका वडा नम्बर १० के वडा अध्यक्ष रविन्द्र शाही, गाउँक भल्मन्सा बाबुराम चौधरी, थारु कल्याणकारिणी सभा कैलालीके निबर्तमान कार्यवाहक सभापति माधव चौधरी, नगर भल्मन्सा समितिके पदाधिकारीलगायतसे मृतक परिवारहे न्याय ओ दोषीहे कार्वाहीे माग करटी ज्ञापनपत्र बुझाइल हुइट । उ घटनामे संलग्न आरोपमे पक्राउ परल विकास मल्लहे जिल्ला अदालत कैलालीसे सफाई डेहलपाछे छुटल बटै ।
मृतकके डाई पुतली ज्ञापनपत्र बुझैटी कुवाँर २३ गते रात २ बजे गोदावरी नगरपालिका १० बैठना लक्की मल्ल ओ डडेलधुरा जिल्लाके गन्यापधुरा गाउपालिका २ चम्साल बैठना विकास मल्लसे हमार घरके ढोका तोडफोड करके छावा शेरबहादुर चौधरीहे घरसे लैगिल रहिट । छावक हत्या करके घरसे अन्दाजी १५०० मिटर दुरीमे पर्ना गोदावरी लडियक किनारमे फेकल जनैली ।
हत्या करके फेकल छावक लहास हेरेबेर मुरी, हात गोरमे चोट लागल, एक गोराफे टुटल, ओ मुहसे रगत समेत अइटी रहल अवस्थामे मृत फेला परल पश्चात प्रहरीहे खबर कैगिल रहे ।
घटनामे संलग्नहुकनके प्रहरीसे घटनाके सक्कु अनुसन्धान करके दोषीहे कानून अनुसारके सजाय प्रदान करेक लाग जिल्ला अदालतमे मुद्दा दायर करल उहाँ जनैली ।
ईलाका प्रहारी कार्यालय मालाखेतीके प्रमुखसे घटनाके मुचुल्का उठैना समयमे सरोकारवाला निकायके उपस्थिति बिना मुचुल्का उठाइल, मुचुल्का उठैना प्रक्रियामे लापरबाही करल, पोस्टमार्ट रिपोर्टमे समेत गम्भीर लापरबाही करल, घटनाके सत्य तथ्य ओ निष्पक्ष अनुसन्धान प्रक्रियामे पीडित व्यक्तिहुकनके बयानहे नैसमेटल, पहुँचके आधारमे मुद्दाहे कमजोर बनाके जिल्ला वकिलके कार्यालयमार्फत जिल्ला अदालत कैलालीमे मुद्दा दर्ता करल रहे । दर्ता करल मुद्दामे प्रयाप्त प्रमाणके कमी वा पीडितके पहुँचके कमि हो वा का कारणसे हो हत्या कैना मुख्य दोषी बिकास मल्लहे हत्या जैसिन जघन्य अपराधसे उन्मुक्ति डेहल ओरसे पीडित परिवारहे अन्याय हुइल कहल बा ।
दोषीहे कानूनी कारवाही करेक लाग घटनाके फेरसे निस्पक्ष छानबिन करके पीडितहे न्याय प्रदान करेक लाग सहयोग कैडेना उहाँ मानव अधिकार आयोग ओ इन्सेकसे आग्रह करले बटै । ज्ञापनपत्रमे घटनाके पुनः निष्पक्ष छानबिन करके पीडितहे न्याय प्रदान कैना पहल करेपर्ना, कैलाली जिल्ला अदालतसे घटनामे संग्लन विकास मल्लहे हचुवाके भरमे डेहल सफाई करलमे उ अभियुक्त तत्काल देश बाहेर गैल बुझे आइल ओरसे तुरुन्त गिरफतार करके कानूनी दायरामे ल्यन्ना पहल करेपर्ना ओ पीडितहे उचित क्षतिपूर्तिके व्यवस्था करेपर्ना माग करल बा ।
ज्ञापनपत्र बुझटी राष्ट्रिय मानव अधिकार आयोग सुदूरपश्चिम प्रदेशके निमित्त प्रमुख झंकर बहादुर रावल यी घटना अपराधिक घटना रहल कहटी न्यायिक प्रक्रियासे टुङगो लगाई पर्ना बटैलै । उहाँ कहलै, घटनामे संलग्न दोषीहे पत्ता लगाके कार्वाहीके लाग स्थानीय सरकार, वडा कार्यालय, संघ संस्थाके समन्वय जरुरी बा ।
ओस्टेक करके मृतकके आफन्तहुक्रे दोषीहे कार्वाही नैकरके उन्मुक्ति डेटी रहल कहटी ठप आन्दोलनमे जैना चेतावनीफे डेले बटै ।
