सञ्चार क्षेत्र बल्गर बनैना प्रदेश सरकार प्रतिबद्ध बाः मुख्यमन्त्री शाह
पहुरा समाचारदाता
धनगढी, १ अगहन । सुदूरपश्चिम प्रदेशके मुख्यमन्त्री कमल बहादुर शाह सुदूरपश्चिम प्रदेशके सञ्चार क्षेत्र बल्गर बनैना प्रदेश सरकार प्रयत्नशील रहल बटैले बटै ।
पत्रकार महासंघ सुदूरपश्चिम प्रदेशके सहकार्य ओ सुदूरपश्चिम प्रदेश अनुसन्धान तथा प्रशिक्षण प्रतिष्ठानके आयोजनामे धनगढीमे सुरु हुइल सार्वजनिक उत्तरदायित्व प्रवद्र्धनके लाग एफ.एम. रेडियोकर्मीहुकनहे असल अभ्यास सम्बन्धी अनुशिक्षण कार्यक्रममे मुख्यमन्त्री शाह सञ्चारकर्मी ओ सञ्चार क्षेत्रके संरक्षण ओ प्रवद्र्धनमे प्रदेश सरकार प्रतिबद्ध रहल बटैलै ।
‘सञ्चार माध्यमसे सामाजिक सञ्जाल बल्गर हुइटी गैल गुनासो अइटी रहल बा, उ मजा नैहो प्रदेश सरकार यहाँके सञ्चार क्षेत्र ओ सञ्चारकर्मी बल्गर हुइल हेरे चाहठ’ मुख्यमन्त्री शाह कहलै, ‘विश्वसनीय भरपर्दो ओ बल्गर सञ्चार क्षेत्र बनैना हम्रे प्रतिबद्ध बटी ।’
सञ्चारकर्मीहे प्रोत्साहित करटी उहाँ मुलुक जोगैना दायित्व अपने हमार काँधमे रहल बटैटी मिडियाके संरक्षक ओ संवद्र्धनमे राज्यसे अभिन ढेर कैना बाँकीं रहल मुख्यमन्त्री शाहके कहाई रहे । आम सञ्चार नीतिके अन्तिम छलफल जारी रहल उहा बटैलै । गैल वर्षके विनियोजन विधेयकमे उपभोक्ता समितिसे कौनोफे योजना नैरख्ना कना धारल मने, उ कार्यान्वयन हुई नैसेक्ना दुर्भाग्य रहल मुख्यमन्त्री शाहके कहाई रहे ।
‘संस्थागत संरचनागत रूपमे सुधार करे परठ मुख्यमन्त्री ओ कर्मचारीके टेबलमे आइल फायल सम्बोधन हुई परठ’ मुख्यमन्त्री शाह कहलै, ‘विकासके पाटोमे अवरोधके ढेर विषय बटै, यम्ने सामूहिक आवाज उठ्न जरुरी बा ।’
