बेसार, राजमा तथा अर्गानिक खेती सम्बन्धी पाँच दिने तालिम सुरु
पहुरा समाचारदाता
धनगढी, २ अगहन । एकल महिला, द्वन्द प्रभावित महिला ओ सीमान्तकृत समुहहे लक्षित करके महिला सशक्तीकरण नेतृत्व, द्वन्द समाधान परिवर्तन तथा दिगोपना सम्बन्धी सीप अभिवृद्धि लाग वेसार खेती, अर्गानिक तरकारी खेती तथा राजमा खेती सम्बन्धी पाँच दिने तालिम सुरु हुइल बा ।
कुर्वे विष्ट्रोके सहयोगमे मानव अधिकारका लागि महिला एकल महिला समुह सुदूरपश्चिम प्रदेशके आयोजनामे मंगरके रोजसे धनगढीमे तालिम सुरु हुइल हो ।
धनगढी उपमहानगरपालिकाके नगर उपप्रमुख कन्दकला कुमारी रानाके प्रमुख आतिथ्यतामे हुइल उदघाटन कार्यक्रममे सम्बोधन करटी उहाँ महिलाहुकनहे आर्थिक सशक्तीकरणमे जोरे नैसेकटसम विभेद ओ हिंसा मुक्त बनाई नैसेक्ना बटैली । कोई व्यक्ति आर्थिक रुपमे कम्जोर बा कलेसे विभेद या हिंसा भोगे परल हमार समाजमे डेखा परल बा, उहाँ कहली, ‘धनगढी उपमहानगरपालिका उद्यमी तथा व्यवसायी महिलाहुकनहे आर्थिक शसक्तीकरणसे जोरेक लाग ओइनके उत्पादन तथा सीपहे बजारीकरण करलेक लाग हाट बजार ओ शनिवरिया उद्यमी मेला संचालन करले बा । जेम्ने महिलाहुक्रे आपन उत्पादनहे विक्री कैना अवसर पैले बटै ।
किसानके उत्पादनमे विचोलित ढेर फाइदा लेहल मने वास्तविक किसान मारमे परल उहाँ बटैली । बास्तविक किसानहे जोरेक लाग धनगढी उपमहानगरपालिकासे किसान कार्डके व्यवस्था करले बा ।
युवाहुकनहे सीपसे जोरेक लाग गैल बरस सीप मेलाके आयोजना करल ओ यी बरसफे सीप मेलाके लाग तयारी करटी उपप्रमुख बटैली । महिलाहुकनके अपनमे रहल सीपसे घरे जाचिज खैठी उहे बनाके शनिवारिया मेलाके ल्यानके विक्री कैके आर्थिक स्रोत जुटाई सेक्ना उहाँ बटैली । विक्रीके लाग कौनो समस्या नैहो, धनगढी उपमहानगरपालिकासे मेला लगाके टेबुलके समेट व्यवस्था करले बा ।
गैल बरस धनगढी उपमहानरपालिकासे आयोजना करल सीप मेलामे ढेर यूवा सीप सिख्ना मौका भेटाइलै, उहाँ कहली, ‘यी बरसफे तयारी सुरु करल ओ अपाङगता रहल व्यक्ति, लैगिंक तथा अल्पसंख्यक समुहके लागफे सीप सिख्ना अवसर प्रदान कैना उपप्रमुख राना बटैली ।
धनगढी उपमहानगरपालिका रात्रीकालिन मेलाके तयारी पुराके धारल मने देशके परिस्थितीहे मध्यनजरके संचालन करले नैसेकल बटैली ।
फाया नेपालके अध्यक्ष तथा महिला अधिकारकर्मी गोमा आचार्य हरेक महिलाहुकनहे कुछ न कुछ सीप रहल ओ उ सीपके प्रयोग करके बनाइल चिजहे व्यावसायिक बनैटी बजारीकरण करलेसे आर्थिक रुपमे कुछ टेवा पुग्न बटैली ।
श्रम कना कोई छोट वा भारी नैरना कहटी श्रम करके बनाइल चिजहे कैसिक विक्री कर्ना हो । हरेक महिला कुछ न कुछ व्यवसाय करठै । उहीहे वित्तीय व्यवस्थापन, योजना अनुसार संचालन करटी व्यवस्थित करके लैगिलेसे आर्थिक रुपमे बल्गर बनेसेक्ना उहाँ बटैली ।
कार्यक्रममे सहजीकरण करटी मानव अधिकारका लागि महिला एकल महिला समुह सुदूरपश्चिम प्रदेशके कार्यक्रम अधिकृत वेद अवस्थी एकल महिला, द्वन्द प्रभावित महिला ओ सीमान्तकृत समुहहे आर्थिक सशक्तीकरण ओ नेतृत्व तहमे पुगाइक लाग तालिमके आयोजना करल बटैली । उहाँ उद्यमी व्यवसायीसे उत्पादन करल वेसार संकलनके धनगढीमे एक ओ गोदावरीमे दुई करके तीन ठो संकलन केन्द्र स्थापना कैना बटैली ।
मानव अधिकारका लागि महिला एकल महिला समुह सुदूरपश्चिम प्रदेश उपाध्यक्ष शान्ती महतके अध्यक्षतामे हुइल तालिम उदघाटन कार्यक्रममे स्वागत तथा कार्यक्रम उद्देश्यवारे समुहके कोषाध्यक्ष मीना भण्डारी जानकारी डेहल रहिट । तालिममे धनगढी उपमहापालिका ओ गोदावरी नगरपालिकाके एकल महिला, द्वन्द प्रभावित महिला ओ सीमान्तकृत समुहके महिलाहुकनके सहभागिता रहल बा ।
