एकल महिला, द्वन्द प्रभावित महिला ओ सीमान्तकृत समूहके लाग छलफल
पहुरा समाचारदाता
धनगढी, ४ अगहन । एकल महिला, द्वन्द प्रभावित महिला ओ सीमान्तकृत समूहके प्रमुख अभिवृद्धि सम्बन्धी स्थानीय सरोकारवालाहुकास)ग छलफल कार्यक्रम सम्पन्न हुइल बा ।
मानव अधिकारका लागि महिला एकल महिला समूह सुदूरपश्चिम प्रदेश, धनगढीसे आयोजना ओ कुर्वे विष्ट्रोके सहयोगमे ‘नेपालमा समावेशी समुदायको लागि शान्तिपुर्ण सशक्तिकरण परियोजना’ अन्तरगत स्थानीय सरोकारवालाहुकासंग छलफल कार्यक्रम सम्पन्न हुइल हो ।
समूहके प्रदेश उपाध्यक्ष शान्ति महतके अध्यक्षतामे हुइल कार्यक्रमममे सहजीकरण फाया नेपालके अध्यक्ष गोमा आचार्य करल रही । पछिल्का समय देशभरके सामाजिक परिवर्तनसे सक्कुहुनहे आघे बह्रना सचेत कराइल उहाँ बटैली ।
यूवा जय धामी सेवाग्राहीहुकनके पहुँच प्रविधिमैत्री बनाईपर्ना, गोदावरी नगरपालिकाभिटर हुइल गतिविधि पारदर्शी हुईपर्ना ओ कर्मचारीहुक्रे समयमे योजना कार्यान्वयन करेपर्ना जोड डेहल रहिट । उहाँ नीति–नियमके कडाइ, आचारसंहिता पालन ओ सक्कु कार्यमे निष्पक्षता आवश्यक रहल बटैटी सेवाग्राहीहे परिवर्तनमुखी दृष्टिकोण अपनैना प्रेरित करल रहिट ।
गोदावरी नगरपालिकाके प्रशासनिक अधिकृत शिवराज भाट पछिल्का जेनजी आन्दोलनसे कर्मचारी तथा राजनीतिक प्रतिनिधिहुकनहे सचेत बनाइल बटैलै ।
नगरपालिकाके उप प्रमुख शारदादेवी रोकायासे पालिका भिटर नियम–कानुन रहल बावजुद कार्यान्वयनमे अभिन चुनौती रहल ओ महिला सशक्तिकरणके साथे बजेट कार्यान्वयनमे मतभेद रहल बटैली । उहाँक अनुसार न्यायिक समिति ओ पालिकाभिटर १० से ढेर समितिमे महिला सहभागीता वृद्धि हुइलेसेफे प्रभावकारी कार्यान्वयन आवश्यक रहल बटैली । कार्यक्रममे मानव अधिकारका लागि महिला एकल महिला समूह सुदूरपश्चिम प्रदेश धनगढीके प्रदेश कार्यक्रम अधिकृत वेद अवस्थी, गोदावरी नगरपालिकाके टमान शाखाके प्रमुख तथा यूवाहु्कनके सहभागिता रहे ।
कार्यक्रमसे स्थानीय महिला, विशेष करके एकल महिला ओ द्वन्द प्रभावित तथा सीमान्तकृत समूहके सदस्यहुकनहे सशक्त बनैना ओ ओइनके पहुँच बह्रैना नीति–निर्माण ओ कार्यान्वयन प्रक्रियामे सरोकारवालाहुकनहे सचेत बनैना महत्वपूर्ण अवसर प्रदान करले बा ।
