अन्तर्राष्टिय बाल दिवसके अवसरमे मावि स्तरीय सदनात्मक हाजिरी जवाफ प्रतियोगिता सम्पन्न
पहुरा समाचारदाता
धनगढी, ४ अगहन । अन्तर्राष्ट्रिय बाल दिवसके अवसरमे कैलारी गाउँपालिका १ स्थित दिपेन्द्र माविमे सदनात्मक हाजिरी जवाफ प्रतियोगिता सम्पन्न हुइल बा ।
कैलारी गाउँपालिका महिला तथा बालबालिका शाखाके आयोजना तथा सामुदायिक विकास केन्द्र (सिडिसी) डोटी ओ एनएनएसडब्लुए कञ्चनपुरके सहयोगमे ‘मेरो दिन, मेरो अधिकारहरुमेरो दिन, मेरो अधिकारहरु’ कना मुल नाराके साथ मावि स्तरीय सदनात्मक हाजिरी जवाफ प्रतियोगिता हुइल हो ।
कैलारी गाउँपालिका उपाध्यक्ष भगवतीकुुमारी चौधरीके प्रमुख आतिथ्यतामे हुइल कार्यक्रममे उहाँ बालबालिकाहुकनहे अवसर प्रदान करलेसे ओइनके बोले सेक्ना, तर्क करेसेक्ना मनोवल बह्रना बटैली ।
हरेक बालबालिकामे कुछ न कुछ प्रतिभा नुकल रहठ, उहाँ कहली, ‘बालबालिका अपन प्रतिभा डेखैना अवसर पैले समाजमे कुछ कुछ योगदान करे सेक्ठै ।’
अब्बे बालबालिका तथा यूवा काल्हके समाजके भविष्य निर्माणकर्ता रहल कहटी मजा शिक्षा संस्कार प्रदान कैना जरुरी रहल उहाँ बटैली ।
दिपेन्द्र माविके शिक्षक नारायण प्रसाद ढकाल मावि स्तरीय सदनात्मक हाजिरी जवाफ प्रतियोगिता मनोरञ्जनात्मक तरिका करैले रहिट । विद्यार्थीहुक्रे जलबायू परिवर्तन ओ ओकर असर, बाल अधिकारबारे ओ सामन्य ज्ञान विषयबस्तुहे समावेश करके हाजिरी जवाफ प्रतियोगिता कराइल रहे ।
उ प्रतियोगितामे ह्वाइट हाउस पहिल, रेड हाउस दुसरा, एल्लो हाउस टिसरा हुइल रहे कलेसे ग्रीन हाउस सन्त्वाना पुरस्कार पैले रहे । विजेता सक्कु हाउसहे पुरस्कारके रुपमे शैक्षिक सामाग्री हस्तान्तरण कैगिल रहे ।
दिपेन्द्र माविके प्रअ विनोद भट्टराईके अध्यक्षतामे हुइल कार्यक्रमके संचालन कैलारी गाउँपालिका महिला तथा बालबालिका शाखा प्रमुख बालकुमारी चौधरी करल रहिट । कार्यक्रममे सामुदायिक विकास केन्द्र (सिडिसी) डोटी ओ एनएनएसडब्लुए कञ्चनपुरके प्रतिनिधिहुकनकेफे सहभागिता रहे ।
