कैलारीमे पूर्ण खोप (खोरेट)कार्यक्रम शुभारम्भ
पहुरा समाचारदाता
धनगढी, ५ अगहन । कैलाली जिल्लाके कैलारी गाउँपालिकामे पशुहुकनके लाग पूर्ण खोप कार्यक्रम शुभारम्भ हुइल बा ।
भेटनिरी अस्पताल तथा पशु सेवा विज्ञ केन्द्र धनगढीके आयोजना तथा कैलारी गाउँपालिका पशु सेवा शाखाके सह आयोजनामे पशुहुकनके लाग पूर्ण खोप कार्यक्रम शुभारम्भ हुइल हो ।
पूर्ण खोप कार्यक्रम शुभारम्भ कैलारी गाउँपालिकाके उपाध्यक्ष भगवतीकुमारी चौधरी करल रहिट । कार्यक्रममे सम्बोधन करटी उहाँ पशुहुकनहे स्वास्थ्य रना ओइनके अधिकार रहल कहटी यी कार्यक्रम मजा रहल बटैली । यिहीसे पहिले कैलारी गाउँपालिकामे पशुहुकानमे खोप लगैना अभियान संचालन करटी आइल मने सक्कु गोरु भैस, गैयालगायत पशुहुकनके समेटे नैसेकल ओरसे पूर्ण खोप अभियानमे सक्कु पशुहुकन समेटना जरुरी रहल उहाँ बटैलै ।
गैया, गोरु, भैसहुकनमे खोरेट रोग लग्गलेसे ज्यान समेट जैना करल ओरसे ओइनमे रोग लागे नैडेहक लाग यी पूर्ण खोप कार्यक्रम महत्वपूर्ण रहल बटैली ।
कार्यक्रममे कैलारी गाउँपालिकाके पशु चिकित्सक डा. राजन चौधरी कार्यक्रमके उदेश्यसे जानकारी कराइल रहिट । पशुहुकनमे खोप लगैना अभियान कार्तिक १८ गतेसे सुरुवाट कैसेकल उहाँ जनैलै ।
कार्यक्रममे वडा नम्बर ५ के वडा अध्यक्ष विष्णु प्रसाद चौधरी, प्रमुख प्रशासकीय अधिकृत खगेन्द्रराज जोशी, कैलारी गाउँपालिकाके पशु विकास अधिकृत हरिवंश दानीलगायत भल्मन्सा, कृषक, प्राविधिकहुकनके सहभागिता रहे । कार्यक्रममे संचालन कैलारी गाउँपालिका सामाजिक विकास शाखा प्रमुख यगम कलेल करल रहिट ।
