विपद पूर्वतयारी तथा प्रतिकार्यके लाग अभिमुखीकरण
पहुरा समाचारदाता
धनगढी, ७ अगहन । कैलारी गाउँपालिकाके विपद व्यवस्थापन समितिसंग विपद पूर्वतयारी तथा प्रतिकार्यके लाग संरक्षण क्षेत्रके एक दिने अभिमुखीकरण कार्यक्रम सम्पन्न हुइल बा ।
दलित महिला अधिकार मञ्च कैलालीसे डिसिएसे पहुँच परियोजना अन्र्तगत विपद पूर्वतयारी तथा प्रतिकार्यके लाग अभिमुखीकरण कार्यक्रम कैगिल हो ।
कैलारी गाउँपालिका उपाध्यक्ष भगवतीकुमारी चौधरीके प्रमुख आतिथ्यतामे हुइल कार्यक्रममे उहाँ कैलारी टमान मेरिक विपदसे उच्च जोखिममे रहल बटैली ।
यी पालिकाके टमान वडा लडियासे घेरल बा, उपाध्यक्ष कहली, ‘बर्षाके बेला लडिया खेती योग्य जमिन कटान, पटान, डुबानके समस्या बा । भारतके दुधुवा नेशनल जोरल कारण जंगली जनावरके आंतकसंगे चैत बैशाखममे आँधी बयालसंगे आगलागीके जोखिम रहल बा ।
विगतके दिनसे मोहना लडियक कटानसे वडा नम्बर ३ शिवरत्नापुरके दर्जनौ घर विस्थापित हुइल ओ यी बरसफे भारी कटान हुइल उहाँ बटैली । विपद जोखिम न्यूनिकरणके लाग समयमे सचेत हुइना जरुरी रहल कहटी दलित महिला अधिकार मञ्च कैलालीसे सुरुवाट करल कार्यक्रम सह्रनिय रहल गाउँपालिका उपाध्यक्ष बटैली ।
कार्यक्रममे नेपाल रेडक्रस सोसाइटी कैलालीके सभापति लोकराज जोशी सहजीकरण करटी विपद प्रतिकार्यके लाग आठ ठो पालिकास्तरीय विषयगत क्षेत्र निर्धारण करके योजना तर्जुमा रहल बटैलै ।
जेम्ने समन्वय, खोज तथा उद्धार, खाद्य तथा कृषि, तत्कालिन पुर्नलाभ, खानेपानी सरसफाई तथा स्वच्छता, स्वास्थ्य पोषण, शिक्षा, संरक्षण, आपतकालिन आश्रम रहल जनैलै ।
सामान्य पूर्व तयारी योजना परिच्छेद, पूर्वानुमानमा आधारित पूर्वतयारी योजना परिच्छेद, आपतकालिन प्रतिकार्य(कार्यविधि) योजना परिच्छेद परठ ।
विपदके समयमे करेपर्ना कार्यके लाग प्रकोप डेखापर्ना समयसे आघे तयारी स्वरुप कैना कार्यहे सामान्य पूर्व तयारी योजना परिच्छेदमे धारल बा ।
कौनोफे प्रकोपके कारण विपदजन्य घटना हुई सेक्ना सम्भावना हुइल पूर्वानुमानके आधारमे कैना पूर्वतयारी सम्बन्धी कार्यहे पूर्वानुमानमा आधारित पूर्वतयारी योजना परिच्छेदमे धारल बा । विपद हुइनासे कुछ समय आघे विपदके विपदके समय ओ विपदजन्य घटना पश्चात तत्काल कैना कार्य आपतकालिन प्रतिकार्य(कार्यविधि) योजना परिच्छेद परठ ।
विपदमे वाढ पहिरो, हावाहुरी, सितलहर, जनावर आंतक, चटयांङ, कृषिवालीमे लग्न किरा, महामारी, सडक दुर्घटना, आगलागी, भुकम्प, सर्पडंस परठ ।
ओस्टेक वहाँ विपद प्रतिकार्य योजना निर्माणके लाग समुहगत छलफल करैले रहिट ।
दलित महिला अधिकार मञ्च कैलालीके अध्यक्ष सावित्रा घिमिरे कैलारी गाउँपालिकामे टमान परियोजना अन्र्तगत नौ बरससे कार्य करटी आइल बटैली । मञ्चसे अभिनफे पहुँच परियोजना, रेसिस्ट परियोजना ओ सिधरा परियोजनामार्फत टमान गतिविधि संचालन करटी आइल जनैली ।
कार्यक्रमके उद्देश्यबारे मञ्चसे सञ्चालित सिधरा परियोजना अधिकृत मिनबहादुर हुडके जानकारी करैले रहिट । कार्यक्रमके संचालन मञ्चके सामाजिक परिचालक सीमा महतो. करल रहिट । कार्यक्रममे कैलारी गाउँपालिकाके प्रमुख प्रशासकीय अधिकृत खगेन्द्रराज जोशी, वडाअध्यक्ष, कार्यपालिका सदस्यहुक्रे, टमान शाखाके प्रमुखहुक्रे, मञ्चके सामाजिक परिचालक निलु चौधरी, विपद व्यवस्थापन समितिके प्रतिनिधिहुकनके सहभागिता रहे ।
