एक हप्तामे १४९ फरार प्रतिवादी पक्राउ

पहुरा समाचारदाता
धनगढी, ८ अगहन । कैलाली जिल्लाके टमान ठाउँसे एक हप्तामे १ सय ४९ जाने फरार प्रतिवादीहुकनहे पक्राउ कैगिल बा ।
जिल्ला प्रहरी कार्यालय कैलाली तथा यी कार्यालय मातहतसे गैल अगहन १ गतेसे ७ गतेसम संचालन करल सर्च एण्ड स्वीप अपरेशनसे १ सय ४९ जाने फरार प्रतिवादीहुकनहे पक्राउ करल हो ।

फैसला कार्यान्वयन अन्र्तगत जिल्ला अदालत कैलालीसे टमान मितिमे फैसला करके कैद ओ जरिवाना तिर्ना बाँकी रहल प्रतिवादीहुकनके खोजतलास कैना क्रममे प्रहरी इकाईसे फरार प्रतिवादीहुकनहे पक्राउ करल जिल्ला प्रहरी कार्यालय कैलालीके प्रवक्ता प्रहरी नायव उपरिक्षक राजकुमार सिंह जनैलै । पक्राउ करल फरार प्रतिवादीहुकनहे आवश्यक कार्वाहीके लाग जिल्ला अदालत कैलालीमे बुझाईल उहाँ जनैलै ।

सर्च एण्ड स्वीप अपरेशनसे जिल्ला प्रहरी कार्यालय कैलालीसे ६८ जाने, इलाका प्रहरी कार्यालय मालाखेतीसे २५ जाने, इलाका प्रहरी कार्यालय टीकापुरसे २२ जाने, इलाका प्रहरी कार्यालय भजनीसे १० जनहन पक्राउ करल बा ।

ओस्टेक करके इलाका प्रहरी कार्यालय सुखड ९ जाने, इलाका प्रहरी कार्यालय सडकपुर ७ जाने, इलाका प्रहरी कार्यालय लम्की चुहा ६ जाने ओ इलाका प्रहरी कार्यालय चिसापानीसे २ जाने फरार प्रतिवादीहुकनहे पक्राउ करल प्रहरी प्रवक्ता सिंह जनैलै ।