कैलारीमे सरसफाई तथा सचेतना मुलक प्रभातफेरी

पहुरा समाचारदाता
धनगढी, ९ अगहन । प्रविधिके सही प्रयोग करी, लैङिक हिंसा अन्त्य करी कना मुल नाराके साथ ३४औं लैंङिक हिंसा विरुद्धके १६ दिने अभियान सुरुवाट हुइल बा ।

प्रत्येक बरस नोभेम्बर २५ से डिसेम्बर १० अर्थात अगहन ९ से २४ गतेसम लैङिक लैंङिक हिंसा विरुद्धके १६ दिने अभियान मनैना करजाइठ । कैलारी गाउँपालिका महिला तथा वालबालिका शाखाके आयोजना ओ यी पालिका अन्र्तगत क्रियाशिल सामाजिक संघसंस्था, गैर सरकारी संघ संस्था, सहकारी संस्था, प्रहरी प्रशासन तथा विद्यालयके सहकार्यमे हसुलिया बजार सरसफाई, प्रभातफेरी ¥याली ओ कोणसभा कैगिल बा ।

अभियान अन्र्तगत सामुहिक रुपमे सरसफाई कार्यक्रम करटी बजारमे फोहोर नैकरके पसल आघे फोहोर धरना एक भाँरामे धारके ओम्नेहे धरना ओ पालिकाके फोहोर संकलन कैना टयाक्टर अइलेसे उहीहे डेना आग्रह कैगिल बा ।

सरसफाई पाछे लैङिक हिंसा न्यूनिकरणके नारासहित बजार परिक्रम करके कोणसभामे परिणत कैगिल बा । गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ अब्बे बालविवाह बह्रल कहटी हिंसाफे बह्रल बटैली । नेपाल सरकार भोज कैना उमेर विस बरस कहलेसेफे अब्बे छोटमे उमेरमे भागके भोज कैना ओ छोटिम बच्चा जलमाइल कारण बच्चा ओ डाइनके स्वास्थ्यमे समस्या आइल बटैली ।

छोटिम भोज करुइयन ढेर सम्बन्ध विच्छेद करल, दुःख पाइल, आर्थिक रुपमे कम्जोर हुइल उहाँ बटैली । प्रविधिके गलत प्रयोगसे बालविवाह बह्रल, सम्बन्ध विगरल ओरसे सही सदुपयोग कैना उहाँ आग्रह करली ।

कैलारी गाउँपालिकाके महिला तथा बालबालिका शाखा प्रमुख बालकुमारी चौधरी १६ दिने अभियान अन्र्तगत टमान कार्यक्रम संचालन कैना जनैली ।

कार्यक्रममे वडा नम्बर ६ के वडा अध्यक्ष प्रेमबहादुर चौधरी, कार्यपालिका सदस्य लालबहादुर विक, दलित महिला अधिकार मञ्चके सामाजिक परिचालक निलु चौधरीलगायत मन्तव्य राखल रहिट । कार्यक्रमके संचालन सामाजिक विकास शाखा प्रमुख यगम कलेल करल रहिट । अभियान अन्र्तगत सरसफाई, प्रभातफेरी तथा कोणसभा कार्यक्रममे वडा अध्यक्षहुक्रे, मानव अधिकार तथा टमान गैर सरकारी संस्थाके प्रतिनिधि, सुरक्षा निकायके प्रतिनिधिहुकनहे सहभागिता रहे ।