सामाजिक सुरक्षा कोषमे सूचीकरण बह्राइ पर्ना जोड

पहुरा समाचारदाता
धनगढी, ११ अगहन । सामाजिक सुरक्षा कोषमे अनौपचारिक क्षेत्र ओ वैदेशिक रोजगारमे रहल श्रमिकके सूचीकरण बह्राइ पर्र्ना सरोकारवाला जोड डेले बटै ।

आठौं सामाजिक सुरक्षा दिवसके अवसरमे सामाजिक विकास मन्त्रालयसे बिफेक रोज धनगढीमे आयोजना करल अन्तरक्रिया कार्यक्रममे सहभागी सरोकारवाला सामाजिक सुरक्षा कोषमे सूचीकरण बह्राइ पर्ना जोड डेहल हुइट । वैदेशिक रोजगारमे गैलहुक्रनके सङ्ख्या ढेर रहल मने कोषमे सक्कु जनहनहे आवद्ध कराइ नैसेकल जनाइल बा । ओस्टके, अनौपचारिक क्षेत्रमे काम करटी रहल श्रमिक ओ स्वरोजगारके कोषमे आवद्धता अत्यन्त न्यून रहल बा ।

कोषमे सबके ढेरसे ढेर सहभागिताके लाग सामाजिक सुरक्षा कोषहे अझ प्रभावकारी बनैना आवश्यक रहल सामाजिक विकास राज्यमन्त्री सरस्वती खड्का बटैली । उहाँ कोषके बारेम प्रदेश सरकारभिट्टर फेन ढेर छलफल होके कार्यक्रम सञ्चालन हुइटी रहल उल्लेख करली । “योगदानके आधारमे सामाजिक सुरक्षा कोषहे प्रभावकारी रुपमे आघे बह्राइ परल”, राज्यमन्त्री खड्का कहली ।

सामाजिक सुरक्षा कोषमे हालसम नेपालके २६ लाख ३७ हजार श्रमिक सूचीकरण हुइल सामाजिक सुरक्षा कोष जानकारी डेले बा । सो कार्यालयके अनुसार औपचारिक श्रमिक छ लाख १९ हजार, वैदेशिक रोजगारीमे रहल १९ लाख ९६ श्रमिक कोषमे सूचीकृत हुइल बटै । अनौपचारिक ओ स्वरोजगार क्षेत्रके भर जम्मा एक हजार ३८१ व्यक्ति किल कोषमे सूचीकृत हुइल बटै ।
सामाजिक सुरक्षा कोषमे संस्थाके सूचीकरण २२ हजार ३३२ पुगल जनाइल बा । कोषके पोर्टफोलियो एक खर्ब २५ अर्ब रहल सामाजिक विकास कोषके जयकृष्ण दुलाल जानकारी डेलै । उहाँ वैदेशिक रोजगारीमे रहल ओ अनौपचारिक क्षेत्रमे कार्यरत श्रमिकहे कोषमे समेट्ना जरुरी रहल औंल्याइल रहिट ।

अनिवार्य, स्वेच्छिक ओ सरकारसे टोकडेहे सेक्ना मेरके तीन प्रकारके सामाजिक सुरक्षा कोषके दायरा रहल बावै । कोषके औषधि उपचार, स्वास्थ्य तथा मातृत्व सुरक्षा योजना १.२ प्रतिशत, दुर्घटना तथा अशक्तता सुरक्षा योजना ०.८ प्रतिशत रहल बा । ओस्टके, आश्रित परिवार सुरक्षा योजना ०.६७ प्रतिशत ओ वृद्धा अवस्था सुरक्षा योजना २८.३३ प्रतिशत रहल बा । कोषके लाग वित्तीय स्रोत भने आधारभूत तलबके ३१ प्रतिशत, रोजगारदाताके २० प्रतिशत ओ श्रमिकके ११ प्रतिशत रहल बा ।

सामाजिक सुरक्षा कोषमे आवद्ध नैहुइटसम श्रम स्वीकृति नैपैना व्यवस्था हुइलपाछे किल वैदेशिक रोजगारमे जउइयाहुक्रे कोषमे सूचीकृत हुइ लागल सुरक्षित आप्रावासनके पञ्चराम चौधरी बटैलै । उहाँ सामाजिक सुरक्षा कोषमे सूचीकरण बह्राइक लाग स्थानीय तहसम पुग्ना आवश्यक रहल औंल्याइल रहिट ।

ओस्टके, युनिसेफके प्रकाश आचार्य औपचारिक क्षेत्रके श्रमिकसमेत कोषमे आवद्ध नैरहल उल्लेख कैटी ग्रामीण क्षेत्रमे सचेतना फैलैना जरुरी रहल बटैलै । सुदूरपश्चिमके ७० प्रतिशत श्रमिक भारतमे काम कैना करल कहटी उहाँहुक्रनहे सामाजिक सुरक्षा कोषमे समेटे पर्र्ना उल्लेख करलै ।

सामाजिक विकास मन्त्रालयके सचिव डा. हेमराज रेग्मी पाछे परल वर्गहे सामाजिक सुरक्षा कोषके पहुँचमे लन्ना मन्त्रालय मातहतके कार्यालयमार्फत काम हुइटी रहल बटैलै । प्रदेशमे सामाजिक सुरक्षा कोषके कार्यालय स्थापनाके लाग मन्त्रालयमे कोठा उपलब्ध कराइ सेकजैना उहाँके कहाइ रहल बा । सामाजिक सुरक्षा कोषके समन्वयमे कार्यक्रम हुइल रहे ।