अन्तर्राष्ट्रिय अपाङ्गता दिवस टमान कार्यक्रम करके मनैना
पहुरा समाचारदाता
धनगढी, १२ अगहन । अन्तर्राष्ट्रिय अपाङ्गता दिवस–२०८२ के अवसरमे सुदूरपश्चिम प्रदेशमे विविध कार्यक्रम संचालन कैना तयारी करल बा ।
शुकके रोज अपाङ्गता अधिकार अभियान सुदूरपश्चिम समितिसे धनगढीमे पत्रकार सम्मेलन करटी कार्यक्रमबारे जानकारी डेहल हो ।
अगहन १४ से १७ गतेसम टमान सरकारी गैरसरकारी संघ–संस्था ओ संयोजन समितिसंग सहकार्य करटी कार्यक्रम सञ्चालन कैना तयारी रहल अपाङ्गता अधिकार अभियान समिति सचिव नन्दराज भट्ट बटैलै ।
सफल नेपाल, अटिजम केयर सेन्टर सोसाइटी नेपाल, नेत्रहीन संघ प्रदेश समिति,नेत्रहीन युवा संघ कैलाली, डाउन सिन्ड्रोम समाज, बौद्धिक अपाङ्गता अभिभावक संघ, समाबेशी पारा एथलेटिक्स स्पोट्र्स क्लब, अपाङ्गता समाबेशी बिकास मिसन टु नेपाल, सर्वाङ्गिण अपाङ्गता बिकास समाज नेपाललगायतके टमान १२ अपाङ्गता सम्बद्ध संघ–संस्था प्रतिनिधिहुक्रनके सहभागितामे कार्यक्रम कैना बा ।
जेम्ने अगहन १४ गते ह्विलचियर दौड तथा ह्विलचेयर बास्केटबल प्रतियोगिता, १५ गते चित्रकला तथा म्युजिकल चियर खेल प्रतियोगिता, १६ गते वक्तृत्वकला तथा हाजिरी जवाफ प्रतियोगिता, दृष्टिविहीन क्रिकेट प्रतियोगिता, साझ जेन्जी मार्ग पार्कमोडमे दीप प्रज्वलन कार्यक्रम, १७ गते झाँकी तथा जागरण र्याली संचालन जनागिल बा । उहे दिन दिन टाउन हल मिटिङ तथा अपाङ्गता अधिकार ओ सवाल विषयक बहुपक्षीय संवादके आयोजना करके सप्ताह व्यापी कार्यक्रमके समापन कैना अभियानके कार्यक्रम प्रबक्ता नन्दराज भट्ट जानकारी डेलै ।
सुदूरपश्चिम अपाङ्गता अधिकार अभियानके संयोजक रुपा रानी राई पत्रकार सम्मेलन मार्फत सक्कु सरोकारवाला निकायहे सक्रिय सहभागिताके लाग साझेदारी ओ सहयोगके साथ कार्यक्रम सफल पर्ना सक्कु सरकारी, गैरसरकारी संघ सस्थाहे आग्रह करले बटै ।
