होस्टेलमे अध्ययनरत मुक्तकमलरी छात्राहुकनकहे टमान सामग्री सहयोग
पहुरा समाचारदाता
धनगढी, १३ अगहन । कैलाली कञ्चनपुरके टमान विद्यालयमे अध्ययनरत रहल मुक्तकमलरी छात्राहुकने टमान सहयोग सामग्री सहयोग कैगिल बा ।
आदिवासी महिला मञ्चके आर्थिक सहयोग ओ मुक्तकमलरी विकास मञ्चके सहकार्यमे कैलाली कञ्चनपुरमे अध्ययनरत रहल मुक्तकमलरी छात्राहुकनहे टमान सहयोग कैगिल हो । कैलालीके गोदावरी नगरपालिका स्थित सरस्वती माविमे रहल होस्टेलके आठ जाने मुक्तकमलरी छात्रा, टीकापुर नगरपालिकामे रहल विरेन्द्र माविके होस्टेलमे रहल ४ जाने छात्राहुकनहे छात्रवृति, साइकल, स्कूल व्याग, शैक्षिक सामग्री, ज्याकेट, न्यानो कपडा, दैनिक प्रयोग कैना सामान ओ नगद छात्रवृति वितरण कैगिल बा ।
ओस्टेक कञ्चनपुरके भीमदत्त नगरपालिकामे रहल श्री पुर्ण माविके होस्टेलमे रहल ५ जनहनहे छात्रवृति, साइकल, स्कूल व्याग, शैक्षिक सामाग्री, ज्याकेट, न्यानो कपडा, दैनिक प्रयोग गरिने समान ओ नगद छात्रवृति वितरण कैगिल बा ।
वितरण कार्यक्रममे आदिवासी महिला मञ्चके आर्थिक सहयोगमे हुइल रहे । सहयोग सामाग्री वितरण मञ्चके केन्द्रीय अध्यक्ष सुनी लामा, कोषाध्यक्ष सुशीला गेले, मुक्तकमलरी विकास मञ्चके केन्द्रीय अध्यक्ष हिरामोती चौधरी, केन्द्रीय सचिव लक्ष्मी राना, कैलाली कञ्चनपुरके कार्यसमितिके पदाधिकारीहुकनके सहभागिता रहे ।
