कैलारीमे हुइल बन्ध्यकरण शिविरमे २३ जाने सेवा लेलैं

पहुरा समाचारदाता
धनगढी, १४ अगहन । कैलाली जिल्लाके कैलारी गाउँपालिका वडा नम्बर ६ बनकट्टा आधारभूत स्वास्थ्य संस्थामे अँटवारके रोज संञ्चालन हुइल महिला तथा पुरुष बन्धाकरण घुम्ती शिविरमे २३ जाने महिला सेवा लेले बटै ।

स्वास्थ्य कार्यालय कैलालीके आयोजना तथा सुनौलो परिवार नेपाल (मेरी स्टोप्स नेपाल) के सहकार्य तथा कैलारी गाउँपालिकाके समन्वय महिला तथा पुरुष बन्धाकरण घुम्ती शिविर हुइल हो ।

उ शिविरके उदघाटन गाउँपालिका उपाध्यक्ष भगवतीकुमारी चौधरीके प्रमुख आतिथ्यतामे हुइल रहे । शिविर उदघाटन कार्यक्रममे सम्बोधन करटी उहाँ सन्तानके रहर पुगल दम्पतीके लाग यी सुनौलो अवसर रहल बटैली । पहिले पहिले ढेर सन्तान जलमैना मने एक वा दुई सन्तान जलमैना करल डेखजाइठ ।

ग्रामीण गाउँघरमे अभिन नैचाहकेफे ढेर सन्तान जलमैना ओ नैचाहके गर्भ बैठेबेर महिलाहुक्रनहे हिंसा भोगे परल बा । ढेर सन्तान हुईबेर पालनपोसनमे समस्या अइना ओ ढेर जैसिन महिलाहुकनहे बोझ हुइना उहाँ बटैली ।

महिला ओ पुरुषके लाग स्थायी परिवार नियोजनके साधान बन्ध्यकरण केलह रहल कहटी निशुल्क रुपमे संचालन हुइना यैसिन शिविरमे सक्कु जाने सहयोग अनिवार्य रहल उहाँ बटैली ।

शिविर उदघाटन कार्यक्रममे वडा नम्बर ६ के वडाध्यक्ष प्रेमबहादुर चौधरीके अध्यक्षतामे हुइल रहे । कार्यक्रममे स्वास्थ्य कार्यालय कैलालीके परिवार नियोजन अधिकृत ओलट नारायण चापागाई, कैलारी गाउँपालिका स्वास्थ्य शाखाके प्रमुख नरेश चौधरीलगायत उहाँक टिम, सुनौलो परिवार नेपाल (मेरी स्टोप्स नेपाल)के टिमके सहभागिता रहे ।

परिवार नियोजन कराई चाहल महिलाहुकनहे कैलारी गाउँपालिकाके एमबुलेन्ससे ल्यन्ना लैजैना सहयोग करल रहे । कलेसे बन्ध्यकरण महिलाके गाउँपालिकासे एक÷एक ठा कम्मल सहयोग करल रहे । पालिकाके उत्तर साइडके वडाहे समेटके वडा नम्बर ६ मे बन्ध्यकरण शिविर संचालन करल रहे । दक्षिण वेल्टहे समेटके पुसके अन्तिम ओर फेरसे महिला तथा पुरुष बन्धाकरण घुम्ती शिविर संचालन कैना कैलारी गाउँपालिकाके स्वास्थ्य शाखा प्रमुख नरेशकु्मार चौधरी जनैलै ।