प्रजनन स्वास्थ्य शिविरमे १७६ जनहनके चेकजाँच
पहुुरा समाचारदाता
धनगढी, १६ अगहन । लैङिक हिंसा विरुद्धके १६ दिने अभियानके अवसरमे महिलाहुकनके लाग संचालन हुइल एक दिने स्वास्थ्य शिविरमे १७६ जाने महिलाहुक्रे पाठेघरके मुखके क्यान्सर सम्बन्धी चेकजाँच करैले बटै ।
कैलारी गाउँपालिका महिला, बालबालिका तथा जेष्ठ नागरिक शाखाके आयोजना तथा कैलारीमे क्रियाशिल संघ संस्थाके समन्वयमे आधारभूत स्वास्थ्य चौकी के गाउँमे एक दिने पाठेघरके मुखके क्यान्सर सम्बन्धी स्वास्थ्य शिविरमे ओटरा जाने स्वास्थ्य चेकजाँच कराइल रहिट ।
कैलारी गाउँपालिका उपाध्यक्ष भगवतीकुमारी चौधरीके प्रमुख आतिथ्यतामे हुइल कार्यक्रममे उहाँ महिलाहुक्रे कामके बोझा ओ आर्थिक अवस्था कम्जोर हुके नियमित चेकजाँच कराई नैसेक्के पाठेघरके समस्या बह्रटी गैल बटैली । उहाँ कहली, महिलाहुक्रे पाठेघरके मुखके समस्यालगायत चेकजाँच नियमित कराई परठ । मने हमार समाजमे कबु चेकजाँच नैकरलैना जब विमार हुइना टबकेल्ह चेकजाँ करैना बानी बा । उहीसे झन समस्या हुइल बा ।
गाउँपालिकासे स्थानीयबासीहुकनके स्वास्थ्य मध्य नजर करके समय समय स्वास्थ्य शिविर संचालन करटी आइल जनैली ।
वडा नम्बर ४ के वडा अध्यक्ष ठागुराम चौधरीके अध्यक्षतामे हुइल कार्यक्रमके उद्देश्यबारे जानकारी महिला, बालबालिका तथा जेष्ठ नागरिक शाखाके प्रमुख बालकुमारी चौधरी ओ संचालन स्वास्थ्य शाखाके सिअनी अनिता चौधरी करल रही ।
पाठेघरके मुखके क्यान्सर सम्बन्धी चेकजाँच सेती प्रादेशिक अस्पतालके गाइनेलोजिष्ट डा. ज्योति पाण्डेयसे कैगिल रहे । स्वास्थ्य शिविरमे कैलारी गाउँपालिकाके स्वास्थ्य शाखा अन्र्तगत उ आधारभूत स्वास्थ्य चौकीके टिम, सक्रिय संघसंस्थाके प्रतिनिधिहुकनके सहभागिता रहे ।
