सुदूरपश्चिम प्रदेशस्तरीय सुरक्षा गोष्ठी
पहुरा समाचारदाता
धनगढी, १६ अगहन । अइना प्रतिनिधि सभाके चुनावहे लक्षित करके सुदूरपश्चिम प्रदेशस्तरीय सुरक्षा गोष्ठी कैलालीके धनगढीमे सम्पन्न हुइल बा ।
नेपाल सरकार गृह मन्त्रालय ओ सुदूरपश्चिम प्रदेश आन्तरिक मामिला तथा कानून मन्त्रालयसे संयुक्त रूपमे उ गोष्ठी आयोजना करल बा ।
गृहमन्त्री ओमप्रकाश अर्यालके प्रमुख आतिथ्यतामे हुइल कार्यक्रममे सम्बोधन करटी उहाँ जनताहुकनहे सुरक्षाके अनुभूति डेना, प्रभावकारी सेवा प्रवाह ओ सुशासन स्थापित कैना यी गोष्ठी सफल हुइना विश्वास व्यक्त करलै । विधिके शासन ओ भ्रष्टाचारमे शून्य सहनशीलताके नीतिहे अबलम्बन करटी आसन्न निर्वाचनहे निष्पक्ष ओ भयरहित वातावरणमे सम्पन्न करैना सरकारके मुख्य उद्देश्य रहल उल्लेख करटी डेखल सुरक्षा चुनौतीहे सम्बोधन कैना सुरक्षा निकाय तथा अन्य सरोकारवाला निकायबीचके सहकार्य ओ समन्वयहे थप सुदृढ बनाई पर्ना बटैलै ।
सीमित स्रोत ओ साधनके बाबजुद सुरक्षा निकायसे निर्वाह करल कार्य प्रशंसनीय रहल चर्चा करटी सुरक्षा निकायहे आउर व्यावसायिक ओ साधन स्रोत सम्पन्न बनैना अपन साथ ओ सहयोग निरन्तर रना समेत उहाँ बटैलै ।
सुदूरपश्चिम प्रदेशके मुख्यमन्त्री कमलबहादुर शाह प्रदेश सरकार आगामी निर्वाचनके लाग आवश्यक वातावरण निर्माणमे पूर्ण रूपमे प्रतिबद्ध रहल बटैलै ।
उहाँ संघीय सरकारसँग सहकार्य करटी काम कैना प्रदेश सरकार सदा तत्पर रहल स्पष्ट परलै ।
मुख्यमन्त्री शाह नेपाल प्रहरीहे साधन–स्रोत सम्पन्न तथा मनोबल उच्च बनैना प्रदेश सरकारके प्राथमिकता रहल उल्लेख करटी सुरक्षा निकायहे अउर सक्षम ओ प्रभावकारी बनैना ओर सरकार लागे पर्नामे जोर डेलै ।
उहाँ संघीय सरकारसे प्रदेश सरकारहे अधिकार प्रत्यायोजन करेबेर तीनु तहबीचके समन्वय ओ सहकार्य अझ प्रभावकारी हुइना बा कना विश्वास व्यक्त करलै ।
भदौ २३ ओ २४ गतेके आन्दोलनके विषयमे बोल्टी शाह, भ्रष्टाचार नियन्त्रण ओ सुशासन कायम कैना प्रदेश सरकार कटिबद्ध रहल उल्लेख करलै । भ्रष्टाचारविरुद्ध कानून ल्यानेबेर उहे दलके व्यक्ति ढेर समय कस्टडीमे बैठे परल उदाहरण डेटी, उहाँ भ्रष्टाचार हुइना क्षेत्र पहिचान करके कडाइके साथ सुधार प्रक्रिया आघे बढाई पर्नामे जोर डेलै ।
साथे उहाँ २०४६ ओ २०६३ पाछे मुलुकमे हुइल ढेर सकारात्मक परिवर्तन हुइल ओ नकारात्मक पक्ष केल्ह टिप्पणी कैना अनुचित रहल उल्लेख करटी, उपलब्धीपूर्ण कामकेफे मूल्याङ्कन कैना सक्कु सरोकारवालाहे आग्रह करलै ।
मुख्यमन्त्री शाह मुलुकहे चुनावी माहोलमे लैजैना क्रममे जनताके इच्छा, आकांक्षा ओ विश्वासहे केन्द्रमे धारेपर्ना बटैलै ।
उ अवसरमे सुदूरपश्चिम प्रदेशके आन्तरिक मामिला तथा कानून मन्त्री हिरा सार्की ओ सुदूरपश्चिम प्रदेशके प्रमुख सचिव बैकुण्ठ प्रसाद अर्याल गोष्ठीके औचित्यबारे आ–आपन विचार व्यक्त करलै ।
प्रहरी महानिरीक्षक दानबहादुर कार्की प्रदेशके वर्तमान सुरक्षा अवस्था ओ अपराध सम्बन्धी प्रमुख समस्या तथा चुनौतीके पहिचान करके उ चुनौतीके सम्बोधनके लाग उपयुक्त रणनीति तर्जुमा कैना गोष्ठी उपलब्धीमूलक हुइल बटैलै । गोष्ठीसे प्राप्त हुइल निर्देशन तथा पृष्ठपोषणके उच्चतम सदुपयोग करटी प्रदेश अन्तर्गत प्रभावकारी सुरक्षा व्यवस्थापन कैना तथा आसन्न निर्वाचन सुरक्षामे प्रदेशस्तरीय निकायबीच प्रभावकारी सहकार्य तथा समन्वय करके कार्यसम्पदान कैना उपस्थित प्रहरी कर्मचारीनहे उहाँ निर्देशन समेत डेलै ।
नेपाली सेनाके रथी प्रदीप जंग केसी, सशस्र प्रहरी महानिरीक्षक राजु अर्याल, राष्ट्रिय अनुसन्धान विभागके मुख्य अनुसन्धान निर्देशक टेकेन्द्र कार्की, गृह मन्त्रालयके सुरक्षा तथा समन्वय महाशाखाके ओरसे सह–सचिव आनन्द काफ्ले आ–आपन मन्तव्य व्यक्त तथा प्रस्तुतीकरण करल रहिट । उ कार्यक्रममे गृह मन्त्रालयके सहसचिव काली प्रसाद पराजुली स्वागत मन्तव्य सहित कार्यक्रमके उदेश्य बारे प्रकाश पारल रहिट ।
गोष्ठीमे सुदूरपश्चिम प्रदेश अन्तर्गत ९ जिल्लाके प्रमुख जिल्ला अधिकारी आ–अपन जिल्लाके विद्यमान शान्ति सुरक्षाके अवस्था, समस्या तथा चुनौती, समाधानके उपाय एवम् आगामी कार्यक्रम लगायत विविध विषयमे प्रस्तुतीकरण करल रहिट । गोष्ठीमे सुदूरपश्चिम प्रदेशके विद्यमान सुरक्षाके अवस्था, समस्या तथा चुनौती, अपराध नियन्त्रण, सीमा सुरक्षा ओ आगामी कार्यभार लगायतके विषयमे विस्तृत छलफल हुइल रहे ।
गोष्ठीके अध्यक्षता गृह सचिव रामेश्वर दंगाल मन्तव्य सहित गोष्ठी समापन करल रहिट । गोष्ठीमे सुदूरपश्चिम प्रदेश अन्तर्गत ९ जिल्लाके प्रमुख जिल्ला अधिकारी, प्रदेश सुरक्षा निकायके प्रमुख तथा पदाधिकारी, जिल्ला सुरक्षा समितिके पदाधिकारीके सहभागिता रहे ।
