३४ औं अन्तर्राष्ट्रिय अपाङ्गता दिवस मनागिल
पहुरा समाचारदाता
धनगढी, १७ अगहन । अपाङ्गता हुइल व्यक्तिके ३४ औँ अन्तर्राष्ट्रिय दिवसके अवसरमे “अपाङ्गता समावेशी समाजके प्रवद्र्धन ः सामाजिक उन्नतिके सम्बद्र्धन” कना मूल नारासहित धनगढीमे बहुपक्षीय अन्तरसम्वाद कार्यक्रम सम्पन्न करल बा ।
कार्यक्रममे शिक्षा, समावेशिता, विपद व्यवस्थापन ओ अपाङ्गता मानव अधिकार जैसिन महत्वपूर्ण विषयमे बहुपक्षीय अन्तरक्रिया तथा छलफल करल रहे ।
सुदूरपश्चिम प्रदेश सभाके संसद तथा सामाजिक विकास समितिके सदस्य धर्मराज पाठक उ कार्यक्रममे बोल्टी अपाङ्गता हु्इल व्यक्तिके सम्मानजनक जीवन, सक्कुहुनके क्षेत्रमे पहुँच, समावेशी शिक्षा ओ विपदमे ओइनके सुरक्षा सुनिश्चित कैना राज्य, समुदाय ओ संस्थाबीच सहकार्य आवश्यक रहल बटैलै । अपने बार बार आवाज उठैलेसेफे नीतिगत रुपमे आघे नैबह्रल उहाँक कहाई रहे ।
अपाङ्गता दिवसके अवसरमे १४ गतेसे १७ गतेसम टमान प्रतियोगिता करल कार्यक्रम संयोजक नन्दराज भट्ट जानकारी डेलै । बुधके रोज औपचारिक कार्यक्रममे प्रतियोगिताके विजेताहुकनहे पुरस्कार सहित सम्मान पत्र वितरण करल रहे ।
कार्यक्रममे तीन जाने सञ्चारकर्मीफे सम्मानित हुइल बटै । नेपाल टेलिभिजनके धनगढी संवाददाता तथा स्टेट सेभेनकर्मी दिनेश बिष्ट, सुदूरपश्चिम टाइम्सके सञ्चालक रमेश ऐडी ओ बी प्लस मिडियाकर्मीके सुरज राना धनगढीमे आयोजित अपाङ्ग दिवसके अवसरमे सम्मानित हुइल बटै ।
कार्यक्रम सफल बनैना सहयोग कैना सक्कु सहयोगी संघ संस्थाहे कार्यक्रम संयोजक नन्दराज भट्ट धन्यवाद ज्ञापन करल रहिट ।
