देवरिया सामुदायिक वनके २२औं वार्षिक साधारण सभा
पहुरा समाचारदाता
धनगढी, १८ अगहन । देवरिया सामुदायिक वन उपभोक्ता समूहके २२औं वार्षिक साधारण सभा सम्पन्न हुइल बा ।
समूहके अध्यक्ष भागीराम चौधरीके सभाध्यक्षतामे हुइल कार्यक्रममे डिभिजन वन कार्यालयके वरिष्ठ अधिकृत जिवछ यादव प्रमुख अतिथि रहल रहिट । कार्यक्रममे सम्बोधन करटी सामुदायिक वनहे नीति अनुसार काम कैना आग्रह करलै ।
उहाँ कहलै, साम्ुदायिक वनके सक्कु आम्दानीके २५ प्रतिशत वन, साढे ३७ प्रतिशत गरिबी, महिला तथा शसक्तीकरण उद्यम विकासमे लगानी कैना ओ साढे ३७ प्रतिशत संस्था विकासमे लगानी कैना उहाँ आग्रह करलै ।
सुदूरपश्चिम प्रदेश नीतिमे पाछे परल ओरसे दिगो वन व्यवस्थापन कैना जरुरी रहल उहाँ बटैलै ।
धनगढी–७ का वडाध्यक्ष मोती राना सामुदायिक वनमे सक्कु जानेक अपनत्व ओ एकता हुइना जरुरी रहल बटैलै । वडा कार्यालयके बजेट ८४ लाख केल्ह रहल मने उहीसे ढेर एक वडामे रहल सामदायिक वनके आम्दानी रहल उहाँ बटैलै ।
वडा नम्बर ७ के निबर्तमान वडा अध्यक्ष सीताराम राना यी समुदायिक वनहे यहाँसम ल्यन्ना ढेर उटारचढाव हुइल बटैलै । ९३४ जाने उपभोक्त सदस्य पुगल ओरसे ओकर तुलनामे सामुदायिक वन छोट हुइल बटैलै । यी सामुदायिक वनसे घरमे व्रतबन्ध, भोजकाजमे काठ उपलब्ध कराइलसंगे घाँस काठीफे उपलब्ध हुइटी रहल बटैलै । काठ संगे बाँस विक्री ठप आयस्रोत बनल ओरसे यिहीहे वृद्धि करेपर्ना बटैलै ।
सभामे ४९ लाख २२ हजार ६७७ रूप्या ५४ पैसा बराबरके आय–व्यय लेखापरीक्षण प्रतिवेदन कोषाध्यक्ष रामचन्द्र राना प्रस्तुत करल रहिट । ओस्टेक करके ६५ लाख ७६ हजार ७८ रुप्या बराबरके अनुमानित बजेट लेखा संयोजक पृथ्वी राना प्रस्तुत करल रहिट । ओटेक समुहकेसचिव सरस्वती ढुङगाना प्रगती प्रतिवेदन प्रस्तुत करल रहिट ।
कार्यक्रम समूहके निवर्तमान अध्यक्ष शारदा प्रसाद राना, निवर्तमान सचिव संगिना जागरी, पूर्व वन हेरालु कर्मचारी शंकर राना, तथा कवि यज्ञराज यात्रीहे २२औं साधारण सभासे सम्मान कैगिल बा ।
साधारण सभामे विविध सांस्कृतिक प्रस्तुती समेत कैगिल बा । अन्नतराम चौधरी, भल्मन्सा रतिराम चौधरी आपन प्रस्तुतती डेखाइल रहिट । कार्यक्रम सञ्चालन समूहके सचिव सरस्वती ढुङ्गाना ओ स्वागत मन्तव्य उपाध्यक्ष मानबहादुर राना करल रहिट । कार्यक्रममे सब–डिभिजन वनके रेन्जर सत्य कुमाल लगायत पूर्वअध्यक्ष, टमान संघ–संस्थाके प्रतिनिधि तथा उपभोक्ता सदस्यहुकनके उपस्थिती रहे ।
