मुक्तकमैया पुनःस्थापनाके बाट प्रदेश गौरवके योजना काहे नैबनठ
पहुरा समाचारदाता
धनगगढी, १९ अगहन । सुदूरपश्चिम प्रदेशके सामाजिक विकास समितिके सभापति धर्मराम पाठक मुक्तकमैया पुनस्र्थापनाके बाट प्रदेश सरकारके गौरवके योजना बने नैसेक्ना दुखद बाट रहल बटैले बटै ।
सामुदायिक सचेतना र विकासका लागि समाज (स्क्याद) नेपाल धनगढी कैलालीके वार्षिक साधारण सभा तथा लेखा परिक्षण सभाके प्रमुख अतिति रहल उहाँ उ बाट बत्वाइल रहिट । यहाँ डगरघाट, भौतिक संरचना, पुल पुलेसा केल्ह प्रदेश सरकारके गौरवके योजना बनठ, उहाँ कहलै, कमैया मुक्ती हुइलक अटरा ढेर बरस होसेकल । ढेर मुक्त कमैयाके प्ुनस्र्थापना होसेकल आब ढेर नैहुइट । एक दुई बरस लागे सेकठ मने प्रदेश सरकार गौरवके योजना बनाके यकर दिगो समाधान कैना जरुरी बा ।
उहाँ प्रदेश सरकारके भुमि व्यवस्था तथा कृषि सहकारी मन्त्रालयमे बाट उठाइल ओ बार बार सदनमेफे आवाज उठाइल उहाँ बटैलै । समितिमेफे मुक्तकमैया पुनस्र्थापना बारे छलफल ओ जोशीपुरके बन्जरीया मुक्तकमैया बस्ती, गोदावरीके अत्तरीया मुक्तकमैया बस्तीमे अनुगमनफे करल बटैलै । अनुगमनपाछे परिचयपत्र पाइल मुक्तकमैयाहुक्रनहे लालपुर्जाके छलफल हुइल ओ प्रक्रिया आघे बह्रैना बाटफे उठल उहाँ बटैलै । धनगढी, टीकापुर ओ कञ्चनपुरके मालपोतके हाकिमसे अभिनसम हुइल प्रगतिके रिपोर्ट मागके आघे बह्रैना बाट हुइल मने जेन्जी आन्दोलनसे कारण प्रक्रिया आघे बह्रे नैसेकल समितिके सभापति पाठक बटैलै । आन्दोलनसे कागजात जरलपाछे काम रुकल ओरसे फेरसे प्रक्रिया आघे बह्रैना उहाँ बटैलै । फ्रिडम फोरमके अधिवक्त तथा मुक्तकमैया अभियन्ता बालाराम भट्टराई मुक्तीपाछे ढेर उपलब्धी हुइल मने अभिन बहुट काम बाँकी रहल बटैलै ।
मुक्तकमैया समाजके केन्द्रीय अध्यक्ष तथा सामुदायिक सचेतना र विकासका लागि समाज (स्क्याद) नेपालके अध्यक्ष पशुपति चौधरी प्रदेश सरकारसे कमैया पुनस्र्थापनाके नीति बनाइल ओ कैलालीके तीनफे नीति बनाइल बटैलै । औैर पालिकामे नीति बनाइक लाग मस्यौदा तयार हुइल ओरसे नीति संगे कार्य विधि बनैलेसे पुनस्र्थापनामे सहजुल हुइना बटैलै । आरडिएनके कार्यक्रम संयोजक हुुकुम सार्की, पहुरा दैनिकके सम्पादक प्रेम चौधरीलगायत शुभकामना मन्तव्य राखल रहिट ।
कार्यक्रममे स्क्यादके सचिव सीता चौधरी वार्षिक प्रतिवेदन ओ कोषाध्यक्ष बसन्ती चौधरी आर्थिक प्रतिवेदन प्रस्तुत करल रहिट । कार्यक्रमके संचालन मुक्तकमैया समाजके प्रदेश अध्यक्ष चन्द्रप्रसाद चौधरी करल रहिट । स्वागत मन्तव्य सदस्य सीता चौधरी करल रहिट । स्क्याद नेपाल फ्रिडम फण्ड संगके साझेदारीमे ‘कृषिमा आधारित बधुवा श्रमिकहरुका अन्त्यका लागि सशक्तीकरण परियोजना’ सुरुवाट करले बा ।
संस्था कुल ३१ हजार ३७२ जाने मुक्तकमैया परिवारहुकनहे जोरके प्रत्यक्ष तथा अप्रत्यक्ष रुपमे कार्य करटी आइल बा । यकर कार्य क्षेत्र कैलाली, कञ्चनपुर,बर्दिया, बाँके ओ दाङ रहल बा ।
संस्थाके विधानसे सक्कु तहमे कम्तिमे ३० प्रतिशत महिला सहभागिता सुनिश्चित करटी आइल बा । स्क्याद नेपाल ओ मुक्त कमैया समाजसे कमैया अधिकार आन्दोलन ओ कमैया मुक्ती पश्चात पुनस्र्थापनाके लाग कार्य करटी आइल बा । कमैया पुनस्र्थापना कार्य पूरा कैना यी संस्थासे सरकारसँग सहकार्य समन्वय करटी आइल बा । ओ मुक्त करल मुक्त कमैया, कमलहरी ओ बालबालिकाके क्षेत्रमेफे वकालत करटी आइल बा ।
स्थानीय समुदायहे सक्षम ओ बल्गर बनैना यी आर्थिक, सामाजिक, राजनैतिक ओ सांस्कृतिक रूपमे आघे बह्रना सरोकारवाला ओ सरकारसँग निरन्तर बहस पैरवी ओ वकालत करटी मुक्त कमैया ओ कमलहरीहुकनके पुनस्र्थापनाके लाग महत्वपूर्ण भूमिका खेल्टी रहल बा ।
