कृषकहे प्रोत्साहन कैना कार्यक्रम लाने पर्ना जोड
पहुरा समाचारदाता
धनगढी, २० अगहन । भूमि व्यवस्था तथा कृषि सहकारी मन्त्री बीर बहादुर थापा कृषि सहकारी संघ संस्थाहे कृषकहे प्रोत्साहन कैना मेरके कार्यक्रम लाने पर्ना जोड डेले बटै ।
धनगढी उपमहानगर पालिका वडा नम्बर ७ देवहरीया स्थित दाइजो कृषि सहकारी संस्था लिमिटेडके १४औं वार्षिक साधारण सभा तथा ५औं अधिवेशनके समुद्घाटन समारोहहे सम्बोधन कैटी मन्त्री थापा ओइसीन बटाइल हुइट ।
कृषि सहकारी प्रत्यक्ष गाउँघरके कृषकसे जोरल रहल ओरसे मन्त्री थापा सहकारीहे कृषकहे प्रोत्साहन कैना मेरके सहुलियत दरमे ऋण लगानी, अनुदान लगायतके कार्यक्रम लाने पर्ना जोड डेहल हुइट । उहाँ प्रदेश सरकारसे कृषकके लाग व्याज अनुदानके कार्यक्रम लानल बटैटी सहकारी फेन कृषकहुक्रनके सेवा सुविधाके लाग यी मेरके कार्यक्रम लाने पर्ना जोड डेहल रहिट ।
उहाँ सहकारीके सञ्चालक समितिके पदाधिकारी इमन्दार रलेसे सहकारी आघे बह्रना बटैटी सहकारीके सेयर सदस्यहुक्रे फेन सहकारीके गतिविधीबारे जानकार हुइ पर्ना बटाइल रहिट ।
कार्यक्रममे वडा नम्बर ७ के वडा अध्यक्ष मोति राना दाइजो सहकारी कृषकके सहुसलियत दरमे ऋण लगानी कैनाके साथे वैंकमे पहुँच नैपुगल कृषकके लाग गाउँघरके वैंकके रुपमे स्थापित हुइल बटैलै । छोट समयमे ढेर प्रगति करल बटैटी उहाँ कृषकहे आत्पनिर्भर बनैनाके साथे आपन उत्पादन बेचके आइल रकम बचत कैना फेन सिखाइल बटाइल रहिट ।
जिल्ला सहकारी संघके अध्यक्ष फणिन्द्र सापकोटा दाइजो कृषि सहकारी यहाँके कृषक तथा व्यवसायीहे ऋण लगानी कैके रोजगार बनैनामे सहयोग करल बटाइल रहिट ।
कृषि ज्ञान केन्द्रके निमित्त अधिकृत टेक बहादुर विष्ट सहकारी मार्फत कृषकहे वीउ बिजन लगायत यन्त्र उपकरणमे अनुदान सहयोग करल बटैटी अइना दिनमे फेन उ मेरके कार्यक्रम सञ्चालन कैना बटाइल रहिट ।
कार्यक्रममे सञ्चालक समितके ओरसे सचिव दिपक राज जोशी सहकारीके वार्षिक प्रतिवेदन सुनाइल रहिट । उहाँ सहकारी १४औं वार्षिकोत्सव मनैटी रहल बेला सहकारीमे महिला २४८ ओ पुरुष ४०१ सहित ६४९ शेयर सदस्य रहल जानकारी डेलै । राना थारु महिलाहुक्रनके जिवन निर्वाहके लाग २०६९ सालमे स्थापना हुइल सहकारीके शेयर पुँजी ६४ लाख ७० हजार रहल जानकारी डेलै ।
ओस्टके उहाँ सहकारीके निक्षेप बचत ओर ६ करोड १४ लाख ५४ हजार ८४७ रुपिया ओ चार करोड ६४ लाख ४६ हजार २५३ रुपिया बराबर ऋण लगानी रहल जानकारी डेलै ।
कार्यक्रममे लेखा समिति संयोजक नन्द गोपाल राना लेखा सुपरीवेक्षण समितिके प्रतिवेदन सुनाइल रहिट । ओस्टके सहकारीके व्यवस्थापक बासुदेव राना आर्थिक वर्ष २०८२/०८३ के अनुमानित आयव्यय प्रस्तुत करल रहिट । उहाँ सकारीके गैल बरसके कुल दायित्व सात करोड ८८ लाख ७२ हजार ८८१ रुपिया ओ यी बरसके लक्ष्य आठ करोड ७३ लाख ६१ हजार ८६० रुपिया रहल बटाइल रहिट ।
ओस्टके उहाँ ऋण असुलीमे व्याज प्राप्त, कृषि व्यापार, संस्थागत अनुदान सहित सहकारीके गैल बरसके ६८ लाख ९४ हजार रुपिया आम्दानी रहल सहकारीके यी बरसके लक्ष्य ९१ लाख ५८ हजार ५८० रुपिया रहल बटाइल रहिट ।
उहे बिच सहकारीसे संस्थापक अध्यक्ष चन्द्रकिरण राना ओ बालसुग्रिव रानाहे दोसल्ला ओह्राके सम्मान फेन करले बा । उहाँहुक्रनहे कार्यक्रमके बर्का पहुना भूमि व्यवस्था तथा कृषि सहकारी मन्त्री थापा दोसल्ला ओह्राके सम्मान पत्र सहित सम्मान करल रहिट ।
कार्यक्रम सहकारीके अध्यक्ष मान बहादुर रानाके घरगोसियाइमे हुइल रहे । कार्यक्रममे सहकारीके शुभचिन्तक तथा सल्लाव सुझाव डेके सहकारीहे एकदम सहयोग करुइया दीर्घराज जोशी, शिक्षा समिति संयोजक मनराज यादव, सल्लाहकार नन्दलाल राना लगायतके उपस्थिति रहल रहे ।
उहे बिच सहकारीके लावा कार्यसमिति फेन चयन करगिल बा । लावा कार्यसमितिके अध्यक्षमे कालिराम राना, उपाध्यक्षमे मनिष राना, सचिवमे दिपक राज जोशी रहल बटै ।
ओस्टके सदस्यमे शिवराज राना, श्याम राना, बिट्टो देवी राना, लालमति राना, रामऔतार राना, भागीराम राना, श्यारोन राना ओ प्रेम बहादुर डगैरा रहल बटै । कलेसे लेखा संयोजकमे नन्द गोपाल राना ओ सदस्यमे क्रमशः भगिरथ राना ओ निर्मला राना चौधरी रहल बटै ।
