कर्मशिल बचत तथा ऋण सहकारीके १४ औं साधारण सभा

पहुरा समाचारदाता
धनगढी २० अगहन । धनगढी उपमहानगरपालिका वडा नम्बर ७, मोतचोकस्थित कर्मशिल बचत तथा ऋण सहकारी संस्था लिमिटेडके १४ औं वार्षिक साधारण सभा शनिच्चरके रोज धनगढीमे हुइल बा ।

सहकारीके अध्यक्ष रामप्रसाद चौधरीके अध्यक्षतामे हुइल कार्यक्रमके उद्घाटन नेपाल कम्युनिस्ट पार्टीके केन्द्रीय सदस्य वीरमान चौधरी उद्घाटन करले रहैं ।

कार्यक्रममे सहकारीके लेखा संयोजक रामचरण चौधरी आर्थिक वर्ष २०८१/०८२ के २ करोड ३६ लाख १९ हजार ३ सय ८० रुपैयाँ बराबरके आर्थिक प्रतिवेदन प्रस्तुत करले रहैं । ओस्टेके, सहकारीके अध्यक्ष रामप्रसाद चौधरी संस्थाके वार्षिक प्रगति प्रतिवेदन प्रस्तुत करले रहैं ।

उ अवसरमे सहकारीहे महत्वपूर्ण योगदान करइया टमान व्यक्तित्वहुकनहे सम्मान करले रहे । सहकारीके पूर्व अध्यक्ष राममणि चौधरीहे श्रीवृद्धि सम्मान करले रहे । ओस्टेके, उत्कृष्ट बचतकर्ता लबरीकुमारी चौधरी, हरिप्रसाद चौधरी, उत्कृष्ट ऋणि शिवनारायण चौधरी, शान्ति डंगौरा थारु, बाल बचतकर्ता रोयल चौधरी, जेष्ठ नागरिक बचतकर्ता भागीराम चौधरीहे सम्मान करले रहे ।

कार्यक्रममे संस्थाके कोषाध्यक्ष दयाशंकर चौधरी, सन नेपाल लाइफ इन्स्योरेन्सके लक्ष्मण चौधरी, चन्द्रप्रसाद चौधरी, सागर कुश्मी लगायत मन्तव्य व्यक्त करले रहैं ।

सहकारीके सदस्य हरिप्रसाद चौधरीसे स्वागत करल कार्यक्रमके सञ्चालन सहकारीके सचिव दिपक कुमार चौधरी सञ्चालन करले रहैं । सहकारीमे अब्बे ९ सय ३० शेयर सदस्य रहल बटैं ।