नवज्योति कृषि सहकारीके १७औँ साधारण सभा सम्पन्न
पहुरा समाचारदाता
धनगढी २० अगहन । कैलालीके धनगढी उपमहानगरपालिका–७ स्थित नवज्योति कृषि सहकारी संस्था लिमिटेडके १७औँ साधारण सभा शनिच्चरके रोज सम्पन्न हुइल बा ।
संस्थाके अध्यक्ष मेघनाथ रानाथारुके सभाध्यक्षतामे हुइल कार्यक्रममे उहाँ २०८२ असार मसान्तसमके वार्षिक प्रतिवेदन प्रस्तुत करटी संस्थामे १३ सय ३८ जाने शेयर सदस्य रहल ओ रु. १७ करोड २७ लाख ९१ हजार ४४९ रुप्या ६९ पैसा बराबरके निक्षेप संकलन कैना सफल हुइल जनैैलै । संस्थाके चुक्ता शेयरपूँजीः रु. १ करोड ५२ लाख ४४ हजार ३ सय, जगेडा कोषः रु. १ करोड १५ लाख ९ हजार ५७२ रुपैयाँ ८ पैसा, लगानीः रु. ११ करोड ५९ लाख ९५ हजार २५७ रुपैयाँ ४९ पैसा, शुद्ध नाफाः रु. ९ लाख ६६ हजार २१४ रुपैयाँ ९० पैसा रहलफे उहाँ जानकारी डेलै ।
कार्यक्रममे २० करोड ६९ लाख ५१ हजार ७३२ रुपैयाँ ९५ पैसा बराबरके लेखा परिक्षण प्रतिवेदन संस्थाके व्यवस्थापक उग्रसेन राना प्रस्तुत करल बटै ।
ओस्टेक करके २४ करोड ६५ लाख ५९ हजार ४९४ रुपैयाँ ३२ पैसा बराबरके अनुमानित बजेट ऋण अधिकृत पृथ्वी राना प्रस्तुत करलै । कर्जा तथा निक्षेपमे थपघट सम्बन्धी प्रतिवेदन ऋण समितिके सदस्य जगतराम राना प्रस्तुत करले बटै ।
कार्यक्रममे सुदूरपश्चिम प्रदेशके प्रदेश नीति तथा योजना आयोगके उपाध्यक्ष तथा सस्थाके सल्लाहकार सदस्य माननीय डा. जीवन राना प्रदेशके नौ विधा मन्से कृषि क्षेत्र प्रमुख रहल ओरसे हम्रे कौन क्षेत्रके कौन मेरिक कृषि कैना हो योजनाबद्ध तरिकासे आइल बेला प्रदेश सरकार सहयोग कैना तयार रहल बटैली । अइना दिनमे शेयर सदस्यके लर्का मजा करले बटै कलेसे ओइनहे सम्मान कैना उहाँ सुझाव डेलै ।
धनगढी–७ के पूर्व वडाध्यक्ष तथा संस्थाके निवर्तमान अध्यक्ष सिताराम राना संस्थासे नियम संगत नीति भिटरके रहिके गतिविधि संचालन करल ओरसे निर्धक्क रुपमे यकर शेयर सदस्य बने सेक्ना बटैलै ।
धनगढी–१७ के वडाध्यक्ष तथा निवर्तमान उपसमिती सदस्य माधवराज राना संस्थासे कोइ कौनोफे प्रयोजनके लाग लोन लेहलबेला समयमे सावा व्याज तिरलेसे मजा हुइना बटैलै ।
कार्यक्रममे शेयर सदस्य अनन्तराम चौधरी कृषकहुकनहे समयमे मलखाल ओ विउ उपलब्ध करैना आग्रह करलै । ओस्टेक शेयर सदस्य कौशिल्या राना, चनकलाल चौधरी शयेर सदस्यहुकनहे कृषि तालिम उपलब्ध करैना माग करले बटै ।
१७औँ साधारण सभासे संस्थाके निवर्तमान अध्यक्ष सिताराम राना, निवर्तमान सदस्य चनकलाल चौधरी, निवर्तमान सल्लाहकार सदस्य बालसुग्रीव राना, उपसमितीके निवर्तमान सदस्य नरेश राना, कोशी प्रदेश लोक सेवा आयोगमे सहायक लेखापाल ५औँ तहमे उत्तीर्ण संस्थापक कोषाध्यक्ष बिन्द्रा राना, जेष्ठ नागरिक साहेव राना, मन्सा राना, असल ऋणी भगवानदिन राना ओ पानमती रानाहे सम्मान कैगिल बा ।
कार्यक्रम सञ्चालन सचिव मनोज विक्रम चौधरी ओ स्वागत मन्तव्य संस्था उपाध्यक्ष भिराराम राना व्यक्त करल हुइट ।
