अर्थमन्त्री खनालसे महोत्सव उद्घाटन हुइना
पहुरा समाचारदाता
धनगढी, २१ अगहन । सुदूरपश्चिम महोत्सव २०८२ के तयारी पुरा हुइल बा । सुदूरपश्चिम प्रदेशके आर्थिक तथा व्यापारिक उत्सवके रूपमे परिचित १९औं संस्करणके महोत्सवके तयारी पुरा हुइल जनाइल बा । महोत्सव तयारी बारे अँट्वारके पत्रकार सम्मेलन मार्फत जानकारी कराइल हो ।
महोत्सव उद्घाटनके लाग अर्थमन्त्री रामेश्वर खनाल धनगढी अइना कैलाली उद्योग वाणिज्य संघके अध्यक्ष पुस्करराज ओझा जानकारी डेलै । इहे अगहन २२ गतेसे पुस २ गते आयोजना हुइना महोत्सव उद्घाटनके लाग आज अर्थमन्त्री खनाल धनगढी अइटी रहल उहाँ बटैलै ।
कैलाली उद्योग वाणिज्य संघके आयोजनामे सञ्चालन हुइ लाग महोत्सव धनगढीस्थित प्रदर्शनी स्थलमे आयोजना हुइटी बा । उद्घाटन समारोहमे अर्थमन्त्री खनाल बर्का पहुनाके रूपमे सहभागी हुइना बटै ।
उद्घाटन समारोहमे नेपाल उद्योग वाणिज्य महासङ्घके अध्यक्ष चन्द्र ढकाल, नेपाल रास्ट्र बैंकके डेपुटी गभर्नर निलम ढुंगाना, टमान मन्त्रालयके प्रतिनिधि, प्रदेश सरकारके मन्त्री, स्थानीय जनप्रतिनिधि, उद्योगी–व्यवसायी, समाजसेवी तथा पत्रकारहुक्रनके उल्लेखनीय सहभागिता रहना आयोजक जनैले बा ।
संघके अध्यक्ष ओझाके अनुसार महोत्सवसे सुदूरपश्चिम प्रदेशके उद्योग, व्यापार, कृषि, पर्यटन, कला ओ संस्कृतिके प्रवद्र्धन कैना लक्ष्य लेहल बा । “स्थानीय उत्पादनहे बजारीकरण कैना, उद्यमशीलता प्रवद्र्धन कैना ओ सुदूरपश्चिमके आर्थिक चलायमान बह्रैना हमार मुख्य उद्देश्य हो,” अध्यक्ष ओझा कहलै ।
महोत्सवमे स्थानीय तथा राष्ट्रिय स्तरके उद्योग व्यवसायके स्टल, कृषि उत्पादन प्रदर्शनी, हस्तकला, घरेलु तथा साना उद्योगके सामग्री, पर्यटनसम्बन्धी प्रदर्शनी लगायत रहना बावै । साथे, राष्ट्रिय तथा स्थानीय कलाकारके सांस्कृतिक प्रस्तुति, मनोरञ्जनात्मक कार्यक्रम, खेलकुद तथा बाल उद्यान फेन समावेश करल आयोजक जनैले बा ।
यी महोत्सवसे स्थानीय रोजगारी सिर्जना, व्यापार व्यवसाय प्रवद्र्धन तथा आर्थिक गतिविधि बह्रैना विश्वास आयोजक लेले बा । महोत्सव सञ्चालन अवधिभर हजारौँ दर्शक अवलोकन कैना अपेक्षा करल बा ।
सुरक्षा व्यवस्था, सरसफाइ, पार्किङ तथा ट्राफिक व्यवस्थापनके लाग स्थानीय प्रशासन तथा सुरक्षानिकायसँग सहकार्य करल आयोजक समिति जनैले बा ।
महोत्सवमे पाँचसय स्टल रहना जनाइल बा । ओम्नेसे कृषिके लाग ४० ठो निःशुल्क स्टल, महिला उद्यमी, एकल महिला स्थानीय परिकारके लाग १५ स्टल रहना जनाइल बा ।
महोत्सव अवलोकनके लाग विद्यार्थी, खेलाडीहे ५० रुप्या टिकट दर निर्धारण करल बा कलेसे सर्वसाधरणके लाग एकसय रुप्या ओ जेष्ठ नागरिक, फरक क्षमता रहल व्यक्तिके लाग प्रवेश निःशुल्क रहना जनाइल बा । ओस्टके संघमे दर्ता होके नियमानुसार नविकरण हुइल व्यवसायी सदस्यहे सदस्यता पत्र डेखाके निःशुल्क प्रवेश पैना रहल बा ।
