कैलारीमे तीन मेडिकलके अनुगमन

विना इजाजत मेडिकल तथा क्लिनिक संंचालन करल कहटी उजुरी दर्ता ।
अनुगमनके क्रममे म्याद ओराइल टमान औषधी फेला परलपाछे डिस्पोज कैना अनुगमन टोलीसे निर्देशन ।
संचालकहुक्र्े अनुगमन टोलीहे इजाजत पत्र डेखाई नैसेकलपाछे तीन दिनभिटर पालिकामे सम्पर्क निर्देशन ।
अनुगमन टोलीसे एक ठो मेडिकल स्टोरहे बन्द कैना निर्देशन ।

पहुरा समाचारदाता
धनगढी, २१ अगहन । कैलाली जिल्लाके कैलारी गाउँपालिकामे रहल तीन ठो मेडिकलके अनुगमन कैगिल बा ।

अनुगमन हुइल उ मेडिकलमे भारतिय औषधी, म्याद ओराइल औधषी, विना इजाजत पत्र संचालन हुइटी बा कना उजुरी परलपाछे गाउँपालिका उपाध्यक्ष भगवतीकुमारी चौधरीके नेतृत्वमे स्थलगत अनुगमन कैगिल बा ।

वडा नम्बर १ मनाउँमे बलिचरण कठरियासे संचालन करल राम जानकी क्लिनिकमे कैगिल अनुगमनके क्रममे म्याद ओराइल टमान मेरिक औषधी फेला पारगिल बा । अनुगमन टोलीसे उ क्लिनिकके इजाजतपत्र मागेबेर नविकरणके लाग धनगढी पठाइल कैहिगिल रहे । ओस्टेक क्लिनिक संगे थोक तथा किराना पसल संचालन कैगिल बा कलेसे विना इजाजत एग्रोभेटफे संचालन करल पागिल बा ।

ओस्टेक अनुगमन टोलीसे कैलारी–१ मन्झरामे शिवलाल चौधरीसे संचालन कैगिल चन्द्रिका मेडिकल स्टोरमे अनुगमन कैगिल बा । मेडिकल स्टोरसंगे ल्याव संचालन हुइल ओ ओकर इजाजत डेखाइ नैसेकलपाछे उहीहे बन्द कैना निर्देशन डेटी तीन दिन भिटर रहल कागजात सहित पालिकामे सम्पर्क कैना कहल बा ।

अनुगमन टोलीसे कैलारी–२ उजलीसेमरामे रहल सोना क्लिनिकमेफे अनुगमन करटी इजाजत कागजातसहित पालिकामे सम्पर्क कैना कहल बा ।

अनुगमन टोलीमे कैलारी गाउँपालिका स्वास्थ्य शाखा संयोजक नरेशकुमार चौधरी, स्वास्थ्य कार्यालय कैलालीके जनस्वास्थ्य निरिक्षक लक्ष्मी प्रसाद श्रेष्ठ, पालिका स्तरीय अनुगमन समितिके सदस्य लालबहादुर विक, योजना शाखा प्रमुख सन्तोषकुमार चौधरी, कैलारी गाउँपालिकाके फार्मेसी सहायक प्रियंका चौधरी, इप्रका हसुलियाके प्रहरी हबल्दार मेघबहादुर खडका, प्रहरी सहायक हबल्दार उमेश चौधरीलगायतके सहभागिता रहे ।