घरहीसे लैंगिक हिंसा अन्त्य कैना जोड
पहुरा समाचारदाता
हसुलिया, २२ अगहन । कैलारी गाउँपालिकाके उपाध्यक्ष भगवती कुमारी चौधरी घरहीसे लैङ्गिक हिंसा अन्त्य कैनामे जोड डेले बटी ।
सोम्मारके रोज कैलारी गाउँपालिका वडा नम्बर ७ भुँइयाँफाँटा सामुदायिक वन उपभोक्ता समूसे आयोजित ३४औं अन्तराष्ट्रिय लंैगिक हिंसा विरुद्धके १६ दिने अभियानके अवसरमे गर्भवती महिलाहे पौष्टिक खाना तथा विपन्न परिवारहे डन्डुर कपडा वितरण कार्यक्रमहे सम्बोधन कैटी उहाँ ओइसीन बटाइल हुइटी ।
महिलाउपर घरपरिवारसे फेन लैङ्गिक हिंसा हुइना करल बटैटी उहाँ सक्कु जाने आपन घरहीसे उहीहे अन्त्य कैना ओर लागे पर्ना जोड डेहल रही ।
उहाँ कहली, ‘घरपरिवारमे फेन महिलाउपर ढेर हिंसाके घटना हुइल डेखजाइठ्, घरपरिवार हुइटी समाजमे फेन महिलाहे ढेर हिंसा सहे परठ् । ओहेमारे हम्रे सक्कु जाने अपने घरसे महिला हिंसा न्यूनीकरण तथा अन्त्यके लाग लागे परल ।’
कार्यक्रमके बर्का पहुना समेत रहल उपाध्यक्ष चौधरी पितृसत्तात्मक सोँचके कारण फेन महिलाहुक्रे हिंसा भोगे परल बटाइल रही । ‘पितृसत्तात्मक सोँचके कारण फेन महिलाहुक्रे आपन घरपरिवार, टोल समाजमे हिंसा खेपे परल बा’, उहाँ कहली- ‘हम्रे सक्कु जाने उ सोँचहे बडलके महिला पुरुष एक हुइटी कहिके आघे बह्रे पर्ना जरुरी रहल बा ।’
कौनो महिलाके बात कट्ना, बात लगैना फेन हिंसा रहल कहटी उपाध्यक्ष चौधरी महिला हिंसा करट डेखुइया व्यक्ति फेन अपराधी रहल बटाइल रही । ‘टोर छाइछावा अइसीन ओइसीन बटाँ, टोर पटुहिया अइसीन ओइसीन बावै कहिके बात कट्ना फेन हिंसा होवई’, उहाँ कहली- ‘टबेमारे हम्रे आपन समाज रुपान्तरण ओ समृद्धिके लाग आपन घरहीसे लैङ्गिक हिंसा न्यूनीकरण तथा अन्त्य कैना जरुरी रहल बा ।’
उपाध्यक्ष चौधरी गाउँपालिकामे फेन आजकल तुलनात्मक रुपमे ढेर महिला हिंसाके घटना सम्बन्धी मुद्धा दर्ता हुइना करल बटाइल रही । उहाँ पहिले सान्धसिमानाके मुद्धा दर्ता हुइलेसे फेन अब्बे हप्ता दिनमे दुईसे तीनठो महिला हिंसाके घटना सम्बन्धी मुद्धा दर्ता हुइना करल बटाइल रही ।
उहे कार्यक्रमहे सम्बोधन कैटी उपाध्य चौधरी गर्भवती महिलाहे अन्य महिलासे ढेर पौष्टिक आहार चाहल ओरसे वन उपभोक्ता समूहसे गर्भवती महिलाहे पौष्टिक आहार ओ डन्डुर कपडा डेहलमे धन्यवाद व्यक्त करल रही ।
उहाँ कैलारी गाउँपालिकासे उपाध्यक्ष समावेशी कार्यक्रम अन्र्तगत पोषण कार्यक्रमसे हरेक हेल्थपोष्टसे गर्भवती जाँच ओ सुत्केरी हुइल महिलाहे पौष्टिक आहार वितरण करटी रहल जानकारी डेहल रही । ओस्टके उहाँ कुछ दिन भिटरे कैलारी गाउँपालिकाहे पोषणमैत्री ओ बालमैत्री गाउँपालिका फेन घोषणा कैना तयारीमे रहल जानकारी डेली ।
कार्यक्रममे गाउँ कार्यपालिका सदस्य सुन्दरी चौधरी महिला रोजगार ओ आत्मनिर्भर अथवा कौनो चीजमे सक्षम हुइलेसे महिला हिंसा कम हुइना बटाइल रही । उहाँ महिला सशक्तिकरणके लाग वडा ओ गाउँपालिकासे टमान मेरिक कार्यक्रम फेन सञ्चालन कैटी आइल बटाइल रही ।
कार्यक्रममे दलित महिला अधिकार मञ्चके निलु चौधरी भुँइयाँफाटा सामुदायिक वनसे महिला लक्षित सराहनीय काम करल बटैटी अन्य वन उपभोक्ता समिति फेन सिखे पर्ना जरुरी रहल बटाइल रही । गाउँपालिका अन्र्तगत ५३ ठो सामुदायिक वन रहल बटैटी उहाँ सक्कु वन उपभोक्ता समितिसे महिला लक्षित कार्यक्रम करे पर्ना जोड डेहल रही ।
भुँइयाफाँटा गाउँके भलमनसा फिरुराम चौधरी सामुदायिक वनसे गाउँके विकास निर्माणसे लेके विपन्न परिवारहे सहयोग कैटी आइल बटाइल रहिट ।
सामुदायिक वनसे १५ गर्भवती महिलाहे पौष्टिक आहार ओ डन्डुर कपडा वितरण करल रहे । कार्यक्रममे गाउँक वुद्धिजिवी बेझुराम चौधरी, कलावति चौधरी, लगायत मनत्य राखल रहिट ।
कार्यक्रम भुँइयाँफाँटा सामुदायिक वन उपभोक्ता समूहके अध्यक्ष विष्णु चौधरीके अध्यक्षतामे हुइल रहे । समूहके उपाध्यक्ष लालु चौधरी स्वागत मनतब्य राखल रहिट कलेसे सञ्चालन सुनिता चौधरी करले रही ।
