मानव अधिकार रक्षक सञ्जालके बैठक
पहुरा समाचारदाता
धनगढी, २२ अगहन । मानव अधिकार रक्षकहुकनके समस्या, चुनौती ओ सुरक्षाके विषयमे सोम्मार धनगढीमे छलफल हुइल बा ।
अनौपचारिक क्षेत्र सेवा केन्द्र इन्सेक सुदूरपश्चिम प्रदेश कार्यालय, धनगढीके आयोजनामे युरोपियन युनियनके प्रतिनिधि शिव भण्डारीसंग मानव अधिकार रक्षकहुँक्रे छलफल करल रहिट ।
इन्सेक प्रदेश संयोजक खडकराज जोशी जेनजी आन्दोलन पश्चात अब्बेक बदल्टी परिस्थितिमे मानव अधिकार रक्षकहुकनहे काम कैना चुनौतीपुर्ण रहल ओरसे राज्यसे मानव अधिकार रक्षकहुकनके संरक्षणमे प्रतिबद्ध नैरहल ओरसे युरोपियन युनियनसे मानव अधिकार रक्षकहुकनके संरक्षण ओ सम्बद्र्धनके लाग मानव अधिकारमैत्री दस्तावेज बनाके राज्यहे बुझाई पर्ना आवश्यक रहल बटैलै ।
गैरसरकारी संघसंस्थाके प्रदेश अध्यक्ष देवीप्रसाद खनाल मानव अधिकारके क्षेत्रमे काम करेबेर अराजक समुहसे प्रत्यक्षरुपमे आक्रमण कैना, धाक धम्की अइना करल ओरसे मानव अधिकार रक्षकहुकनके सुरक्षा सम्बन्धी कौनो कानून नैरहल अवस्थामे राज्यके निकायसे उल्टे आरोप लग्ना करल गुनासो करलै ।
ओरेक नेपालके जिल्ला संयोजक गीता चौधरी हिंसा पीडित महिलाहे न्यायिक प्रकृयामे जैना सहयोग करेबेर पीडितसंगे कर्मचारीहे समेत धम्की आइल अवस्थामे काम कैना समस्या हुइटी रहल बटैलै ।
फाया नेपालके अध्यक्ष गोमा आचार्य गणतन्त्र स्थापना पश्चात नागरिक समाज कमजोर हुइल अवस्थामे राज्यसे नागरिक समाजहे हेर्ना दृष्टिकोण फरक ओ नकरात्मक रहल ओरस सामाजिक संघसंस्थाहे विरोधीके रुपमे हेर्ना ओरसे अब्बे परिस्थितिमे काम कैना चुनौतीपुर्ण रहल बटैली ।
फेडोके सचिव अम्बिका ताम्राकार दलित अधिकार सम्बन्धी कानूनके कार्यान्वयन नैहुके दलित समुदायके महिला अपाङ्गता हुइल व्यक्तिके अधिकार सुनिश्चित कैना दलित अगुवाहुकनहे चुनौती रहल बटैली ।
राजनितिक उठलपुठल, द्वन्द्वहिनता ओ कानून विहिनता, सामाजिक सञ्जालके दुरुपयोग, प्रहरी प्रशासनके निरिहताके अवस्थामे पत्रकार उप्पर प्रत्यक्ष आक्रम हुइना घटनासे अपन ज्यान सुरक्षाके लाग पत्रकारहुक्रे पेशासे पलायन हुइना अवस्था अइटी रहल कान्तिपुर राष्ट्रिय दैनिकके सुदूरपश्चिम प्रदेश संयोजक अर्जुन शाह बटैलै ।
इन्सेक प्रदेश प्रलेख अधिकृत कृष्णबहादुर विश्वकर्मा सामाजिक संघसंस्थासे काम कैना पुराना शैलीसे बदलटी परिवेशमे नयाँ पुस्ता ओ कानूनलहे सम्बोधन ओ परिवर्तन डेख्ना खालके काम करेपर्ना आवश्यक रहल बटैलै ।
युरोपियन युनियनके प्रतिनिधि शिव भण्डारी राज्यके कानुन बनसेकल अवस्थामे मानविय बिकासमे पत्रकार महासंघ, गैरसरकारी संघसंस्था महासंघ ओ राष्ट्रिय मानव अधिकार आयोगसंग मानव अधिकार रक्षकहुकनहुकनके सवाल, चुनौती, संरक्षण तथा क्षमता अभिबृद्धि तालिम, सशक्तिकरण ओ सञ्जालीकरणके लाग राज्यसंग समन्वयात्मक काम करेपर्ना बटैलै ।
उ छलफल कार्यक्रममे मानव अधिकार रक्षक, पत्रकार, महिला मानव अधिकार रक्षकहुकनके उपस्थिति रहे ।
