निर्वाचन सफल बनैना अब्बेक आवश्यकताः मन्त्री खनाल

पहुरा समाचारदाता
धनगढी, २२ अगहन । सुदूरपश्चिम महोत्सवके १९ औं संस्करण सोम्मारके रोजसे विधिवत रुपमे सुरू हुइल बा ।

सङ्घीय अर्थमन्त्री रामेश्वर खनाल महोत्सवके उदघाटन करल रहिट । महोत्सव उदघाटन करटी अर्थमन्त्री खनाल सुदूरपश्चिमके विकास ओ समृद्धिसँग जोरल आयोजना निर्माण ओ सञ्चालन कैना वर्तमान सरकार प्रतिबद्ध रहल बटैलै । “हमार मुख्य काम सफलतापूर्वक निर्वाचन कैना हो । उसबाहेक विकास निर्माणके कामफे करेपर्ना रहठ“ उहाँ कहलै, “करे सेक्ना विकास निर्माणके काम कैना सरकार प्रतिबद्ध बा ।“ अर्थमन्त्री खनाल दशरथ चन्द स्वास्थ्य विज्ञान विश्वविद्यालय सञ्चालन कैना दोधारा चाँदनीके सुख्खा बन्दरगाह निर्माण लगायतके योजना सरकारके प्राथमिकता रहल बटैले बटै ।

कैलाली उद्योग वाणिज्य संघसे २०६३ से हरेक वर्ष अगहन २२ गतेसे पुस २ गतेसम सुदूरपश्चिम महोत्सव आयोजना करटी आइल बा । प्रदेशके पर्यटन, कृषि, उद्योग ओ व्यापारके विकास तथा विस्तारके साथे स्थानीय कला ओ संस्कृतिके प्रवद्र्धन कैना उद्देश्यसे महोत्सव आयोजना करल कैलाली उद्योग वाणिज्य संघके अध्यक्ष पुष्करराज ओझा बटैलै । उहाँ सुदूरपश्चिमके समग्र विकासके सम्भावनाहे उजागर करके आर्थिक, सामाजिक प्रतिकूलता ओ विषम सामाजिक अवस्थासे गुजरल उद्योग व्यवसायहे पुनस्र्थापित कैना उदेश्यसे महोत्सव आयोजना हुइल बटैलै ।

२०६३ सालमे २१ बुँदे मागपत्र बुझाके महोत्सवके सुरुवात हुइल स्मरण करटी अध्यक्ष ओझा अभिन कतिपय माग पूरा नैहुइल बटैलै । “सुदूरपश्चिमके समृद्धिके आधारहे १९ वर्षसे सरकार समक्ष मागके रुपमे रख्टी आइल बटी । कुछ माग पूरा हुइल, कुछ पूरा हुइना बाँकी बटै,“ उहाँ कहलै, “उद्योग वाणिज्य संघसे उठाइल महत्वपूर्ण माग अभिनसम पूरा हुइल नैहो । धनगढीमे प्रदर्शनीस्थलसम निर्माण हुई नैसेकल हो ।“

सुदूरपश्चिम महोत्सवके संस्थापक एवं धनगढी उपमहानगरपालिकाके नगर प्रमुख गोपाल हमाल २०६३ सालमे सालिन आन्दोलनके रुपमे महोत्सवहे सुरू करल बटैलै । “सुदूरपश्चिमके समृद्धिके लाग आवश्यक माग सरकार समक्ष पेस कैना एक ठो सालिन आन्दोलनके रुपमे हम्रे महोत्सव सुरू करल हुई,“ उहाँ कहलै, “यहाँके कला, संस्कृति ओ उत्पादनहे एक ठाउँमे ल्यानके सुदूरपश्चिमके पर्वके रुपमे महोत्सव मनैना परिकल्पना करल रहे ।“

नगर प्रमुख हमाल गेटामे विश्वविद्यालय सञ्चालन कैना ओ सुदूरपश्चिमके रणनीतिक सडक तथा विकास आयोजना सम्पन्न कैना वर्तमान सरकारसे काम करेपर्ना बटैले बटै । उहाँ चिसापानी–जङ्गलघाट–मङ्गलेस सडक निर्माण करेपर्ना बटैटी बैङ्किङ क्षेत्रमे समेत सुधार कैना सरकारसे काम करेपर्ना माग राखल बटै ।

यी बरसके महोत्सवमे तीन करोड खर्च हुइना तथा १५ करोड बराबरके कारोबार हुइना कैलाली उद्योग वाणिज्य संघके अनुमान रहल बा । सात लाख व्यक्तिसे महोत्सव अवलोकन कैना अपेक्षा करल बा । महोत्सव अवलोकनके लाग विद्यार्थी ओ खेलाडीहे ५० रुपैयाँ तथा सर्वसाधारणहे एक सय रुपैयाँ टिकटदर तोकल बा । जेष्ठ नागरिक ओ फरक क्षमता हुइल व्यक्तिहे भर प्रवेशमे शुल्क नैलग्ना हुइल बा ।