ढेर किसान समर्थन मोलमे धान विक्री करेनैपैलै
पहुरा समाचारदाता
धनगढी, २३ अगहन । खाद्य व्यवस्था तथा व्यापार कम्पनी लिमिटेड प्रादेशिक कार्यालय धनगढीसे धान खरिद कोटा घटाइलपाछे ढेर किसान सरकारसे तोकल समर्थन मोलमे धान खरिद नैपैलै ।
गैल वर्ष ५५ हजार क्विन्टल धान खरिद कैना कोटा पाइल प्रादेशिक कार्यालयमे यी वर्ष भर २० हजार क्विन्टल कम करके जम्मा ३५ हजार क्विन्टलमे झरलपाछे कैलालीके ढेर किसान सरकारके तोकल मोलमे धान विक्री करे नैपैलै ।
खाद्य व्यवस्था तथा व्यापार कम्पनी लिमिटेड प्रादेशिक कार्यालय धनगढीसे कैलालीमे मोहनापुर गोदाम, टीकापुर गोदाम, भजनी खरिद केन्द्र, सति गोदाम, जोशीपुर खरिद केन्द्र, ओ गौरीगंगा खरिद केन्द्रसे केल्ह धान खरिद करल रहे ।
कैलाली जिल्लाके १३ स्थानीय तह मन्से ११ स्थानीय तह धान, गोहुँ, लाहीके लाग पकेट क्षेत्रभिटर परठ । ४ हजार ३ सय ०४ क्विन्टल मोटा धान खरिद करल बा । किसानहुकनके सहुलियत डेना हो कलेसे प्रत्येक स्थानीयमे एक ठो खरिद केन्द्र स्थापना करके धान खरिद करेपर्ना हो । मने खाद्य व्यवस्था तथा व्यापार कम्पनी लिमिटेड कैलालीके यी बरस ६ ठाउँसे केल्ह धान खरिद करल रहे । स्थापना हुइल खरिद केन्द्रमे किसानहुक्रे सहजुले धान विक्री करे नैसेक्लै । धान विक्रीके लाग रात भर भर लाइनमे सुटेपर्ना अवस्था रहल ।
गैल बरस कैलारी गाउँपालिकामे धान खरिद केन्द्र स्थापना हुइल मने यी बरस कैलारीमे लिमिटेडसे कटौटी करलपाछे कैलारीबासी सर्मथन मोलमे धान विक्री करे नैपाइल गुनासो करले बटै । सरकारसे तोकल मोलसे प्रतिकुन्टल एक हजारमे घाटा खाके धान विक्री करल कैलारी गाउँपालिका वडा नम्बर ५ किसान विष्णु बाबु कठरिया बटैलै ।
उहाँ कहलै, पहिले पहिले व्यापारीहुक्रे प्रतिकुन्टल २६ सय सम किन्लै । अब्बे २४/२५ सयमे धान खरिद करटै । मलखादके लेक लाग हुइलेसेफे सरकारके तोकल मोलसे एक हजारमे रुप्या कममे धान विक्री करल हुई ।
ओस्टेक कैलारी गाउँपालिका वडा नम्बर ५ के किसान विर कुमार चौधरी सरकारसे धान खरिद करे नैसेकल मने व्यापारीहुक्रे मोल बह्रैही कि कना आशमे अभिन धान विक्री नैकरल बटैलै ।
