खाद्यसे तीन अठुवारमे कोटा बराबरके धान खरिद
पहुरा समाचारदाता
धनगढी, २३ अगहन । खाद्य व्यवस्था तथा व्यापार कम्पनी लिमिटेड प्रादेशिक कार्यालय धनगढीसे तीन अठुवारमे कोटा बराबरके धान खरिद करल जनैले बा ।
कार्तिक ४ गते सुदूरपश्चिम प्रदेशके मुख्यमन्त्री कमल बहादुर शाहसे किसानहुक्रे धानके समर्थन मूल्य पाइल ÷नैपाइल विषयमे अनुगमन कैना कैलालीके प्रमुख जिल्ला अधिकारीहे निर्देशन डेलै ।
किसानसे नेपाल सरकारसे निर्धारण करल धानके समर्थन मूल्य नैपाइल गुनासो आइलपाछे मुख्यमन्त्री शाहसे तत्कालीन प्रमुख जिल्ला अधिकारी कृष्णप्रसाद लम्सालहे अनुगमन कैना तथा धान खरिद खुलैना पहल कैना निर्देशन डेहल रहिट । मुख्यमन्त्रीके निर्देशन पश्चात प्रमुख जिल्ला अधिकारीसे खाद्य व्यवस्था तथा व्यापार कम्पनी लिमिटेडमार्फत धान खरिद प्रक्रिया अघि बह्रेले रहिट ।
पहिल चरणमे कैलालीमे ३५ हजार क्विन्टल धान खरिद कैना खाद्य व्यवस्था तथा व्यापार कम्पनी लिमिटेड प्रादेशिक कार्यालय धनगढीसे अनुमति पाइल रहे । गैल वर्ष ५५ हजार क्विन्टल कोटा पाइल प्रादेशिक कार्यालयमे यी वर्ष भर २० हजार क्विन्टल कम कोटा पाइल हो । गैल वर्ष धान खरिद प्रक्रिया ढिला हुके चार महिनामे ३४ हजार ५ सय ०१ क्विन्टल खरिद करल प्रादेशिक कार्यालय प्रमुख दीपक थापा बटैलै । उहाँके अनुसार यी वर्ष मुख्यमन्त्रीके सक्रियतामे तीन साताभिटर कोटासे ढेर धान खरिद करल बा ।
यी वर्ष कैलालीके ६ स्थान ओ कञ्चनपुरके २ स्थानसे धान खरिद करल रहे । कैलालीमे पहिल चरणमे ३५ हजार क्विन्टल धान खरिद कोटा आइलमे बढाके ३८ हजार ९ सय ४८ क्विन्टल ओ कञ्चनपुरमे ५ हजार कोटा आइलमे ७ हजार ६ क्विन्टल धान खरिद हुइल कार्यालय जनैले बा ।
कार्तिक ११ गतेसे खरिद सुरु करल कार्यालयसे मोहनापुर गोदामसे ५ हजार ९ सय ८४.८७ क्विन्टल, टीकापुर गोदामसे ९ हजार ८ सय ७७.०९ क्विन्टल, भजनी खरिद केन्द्र (अगहन १४ गतेसे) से ५ हजार ७ सय ४२.०५ क्विन्टल, सति गोदामसे ७ हजार ९ सय ०७ क्विन्टल, ओस्टेक सति गोदामसे अगहन ७ गते ५ सय २२.५१ क्विन्टल, कार्तिक १४ गते सुरु करल जोशीपुर खरिद केन्द्रसे ४ हजार ६ सय क्विन्टल ओ गौरीगंगा खरिद केन्द्रसे ४ हजार ३ सय ०४ क्विन्टल मोटा धान खरिद करल बा ।
ओस्टेक करके कञ्चनपुर जिल्लाके लाग आइल ५ हजार क्विन्टल धान खरिदके लाग महेन्द्रनगर खरिद केन्द्रसे ६ हजार ०१९ क्विन्टल ओ पुनर्वास खरिद केन्द्रसे ९ सय ८७ क्विन्टल करके जम्मा ७ हजार ६ क्विन्टल धान खरिद करल कार्यालय जनैले बा ।
सोम्मार मुख्यमन्त्री शाहसे अर्थमन्त्री रामेश्वर खनालहे सुदूरपश्चिममे किसानके लाग थप आवश्यक ५० हजार क्विन्टल धान खरिदके लाग कोटा बह्रडेना अनुरोध करल रहिट । ओस्टेक खेतीके समयमे मलखाद अभाव नहोए कहिके आवश्यक परिमाणमे उपलब्ध करैनाफे उहाँ अनुरोध करलै ।
कैलाली–कञ्चनपुर जिल्लामे वार्षिक १० लाख क्विन्टल धान उत्पादन हुइना करलमे किसानसे उ मध्ये करिब तीन लाख क्विन्टल उपभोग कैना तथा बाँकी धान बिक्रीके लाग रख्न करल बटै । जेम्ने मध्ये खाद्य, स्थानीय गल्ला व्यापारी ओ मिलसे खरिद कैना करल बटै ।
