फागुन २१ गते हुइना चुनावके लाग काँग्रेस कैलाली क्षेत्र नम्बर ३ से प्रतिनिधि छनौट

पहुरा समाचारदाता
धनगढी, २४ अगहन । अइना फागुन २१ हुइना प्रतिनिधि सभा चुनावके लाग नेपाली काँग्रेस कैलाली क्षेत्र नम्बर ३ से उम्मेदवार छनौट कैगिल बा ।

प्रतिनिधि सभा सदस्यके लाग प्रत्यक्ष ओर खेमराज डगौंराथारु, भीम बडुवाल, अविनाश चौधरी ओ झंकर शाहके नाउँ सिफारिस करके पठागिल बा । प्रतिनिधि सभा सदस्य समानुपतिओर रिता चौधरी, रामकुमारी चौधरी ओ सम्झना खत्रीके नाउँ सिफारिस कैगिल बा ।

ओस्टेक करके राष्ट्रिय सभा सदस्यके लाग रामचरण चौधरी, कलावती शाहके नाउँ सिफारिस करके पठाइल नेपाली काँग्रेस कैलाली क्षेत्र नम्बर ३ के क्षेत्रीय सभापति रिता चौधरी जानकारी डेली ।

प्रतिनिधि सभा सदस्य प्रत्यक्ष उम्मेदवारके लाग सिफारिस हुइल खेमराज डगौंराथारु ओ भीम बडुवाल पार्टीके महासमिति सदस्य तथा पार्टीके जिल्ला उपसभापति हुइट । अविनाश चौधरी नेपाल तरुण दलके केन्द्रीय सदस्य ओ झंकर शाह क्षेत्रीय प्रतिनिधि हुइट ।

ओस्टेक करके प्रतिनिधि सभा सदस्य समानुपतिक उम्मेदवारके लाग छनौट हुइल रिता चौधरी पार्टीके क्षेत्रीय सभापति हुइट । रामकुमारी चौधरी, सम्झना खत्री पार्टीके महासमिति सदस्य पदमे रहल बटै ।

ओस्टेक राष्ट्रिय सभा सदस्य उम्मेदवारके लाग छनौट हुइल रामचरण चौधरी अब्बे पार्टीके महासमिति सदस्य, कलावती शाह पूर्व महासमिति सदस्य हुइट । केन्द्रीय समिति बैठकके निर्णय अनुसार माघ ११ गते हुइना राष्ट्रियसभा ओ फागुन २१ गते हुइना प्रतिनिधिसभा निर्वाचनके लाग उम्मेदवारके नाम सिफारिस कैना मातहतहे परिपत्र करल रहे । केन्द्रीय कार्यालयके मुख्यसचिव कृष्णप्रसाद पौडेलसे जारी करल परिपत्रमे अगहन मसान्तभिटर उम्मेदवारके नाम केन्द्रमे सिफारिस करसेके पर्ना बा ।