३४औं अन्तर्राष्ट्रिय लैङिक हिंसा विरुद्धके १६ दिने अभियान सम्पन

पहुरा समाचारदाता
धनगढी, २४ अगहन । अगहन ९ गतेसे सुरु हुइल ३४औं अन्तर्राष्ट्रिय लैङिक हिंसा विरुद्धके १६ दिने अभियान बुधके रोज सम्पन हुइल बा ।

प्रविधिके सही सदुपयोग करी, लैङिक हिंसाके अन्त्य करी कना मुलके साथ सुरु हुइल अभियान टमान कार्यक्रम कैगिल रहे । अभियान अन्र्तगत घुम्ती हेल्प डेस्क मार्फत लैङिक हिंसा विरुद्ध सूचना तथा परामर्श सेवा प्रदान करल रहे । जेम्ने २ हजार ३८ जनहनहे सूचना डेहल धनगढी उपमहानगरपालिकाके नगर उपप्रमुख कन्दकला कुमारी राना बटैली ।

ओम्नेसे हेल्प डेस्कमे ११ जिल्लाके साथे भारतके व्यक्तिफे परामर्श लेहल उहाँ जनैली । अभियानके क्रममे ४ जाने लैङिक हिंसा प्रभावित खुलके आइल रहिट । ओइनहे व्यक्तिगत रुपमे मनोपरामर्श सेवा प्रदान करल रहे । कलेसे एक जानेक मुद्दा दर्ता हुइल बा । ३४औं अन्तराष्ट्रिय लैङिक हिंसा विरुद्धके १६ दिने अभियान समापन कार्यक्रम जेनजी मार्गमे दिप प्रज्वलन कैगिल बा । उ कार्यक्रममे धनगढी उपमहानगरपालिकाके नगर उप्रमुख कन्दकला कुमारी राना मन्तव्य राखल रहिट । कार्यक्रममे नगर प्रमुख गोपाल हमाल, टमान गैसस महासंघके प्रतिनिधिहुकनके सहभागिता रहे । कार्यक्रमके संचालन धनगढी उपमहानगरपालिकाके सामाजिक शाखाके प्रमुख टंक विष्ट करले रहिट ।

ओस्टेक करके लैङ्गिक हिङ्सा विरुद्धके १६ दिने अभियानके समापन शत्र तथा ७७ औ अन्तर्राष्ट्रिय मानव अधिकार दिवसके अवसरमे आयोजित प्रभातफेरी तथा मानव अधिकार प्रर्वद्धनमे नागरिकके कर्तव्य तथा राज्यके दायित्व कना विषयक अन्तरक्रिया कार्यक्रम सम्पन्न हुइल बा । कार्यक्रममे गाउँपालिका उपाध्यक्ष भगवतीकुमारी चौधरी मन्तव्य राखल रहिट ।