किसान बहुउद्देश्यी सहकारी हसुलिया इकाईके ३१औं वार्षिक साधारण सभा

पहुरा समाचारदाता
धनगढी, २५ अगहन । किसान बहुउद्देश्यी सहकारी संस्था लिमिटेड हसुलिया इकाईके ३१औं वार्षिक साधारण सभा विफेक रोज सम्पन्न हुइल बा ।

कैलारी गाउँपालिका उपाध्यक्ष भगवतीकुमारी चौधरीके प्रमुख आतिथ्यतामे हुइल कार्यक्रममे उहाँ यी सहकारीके सामाजिक क्षेत्रमे अतुलनिया भूमिका निर्वाह करल बटैली । यी सहकारी नाफामुलकसंग सेवामूलक कामफे करटी गैलक कारण यकर विश्वासनिता बह्रल बटैली । सहकारीहे आघे बह्राइक लाग शेयर सदस्य तथा बचतकर्ताहुकनके महत्वपूण भुमिका रहल बटैली ।

कार्यक्रममे दिपेन्द्र माविके प्रअ विनोद भट्टराई यी सहकारीसे सक्कु वर्गहे समेटल बटैलै । उत्कृष्ट विद्यार्थीनहे सम्मान कार्यक्रममे प्रोत्साहन बह्रनाके साथे पह्राईमे टेवा पुग्ना उहाँ बटैलै । सहकारीसे एकल महिला, अपाङगता रहल व्यक्तिहुकनफे आर्कषक सेवा प्रदान कैना मजा पक्ष रहल बटैलै । कार्यक्रममे पत्रकार प्रेम चौधरी, उ सहकारीके ३०औं बार्षिक साधारण सभा प्रतिनिधि सदस्य सीतादेवी चौधरीलगायत मन्तव्य राखल रहिट ।

कार्यक्रममे सहकारीके लेखा तथा सुपरीभिजन विभाग प्रमुख प्रकाश कुमार जि.सी. संस्थाके बारेमे जानकारी डेहल रहिट । कैलालीके लम्की चुहा नगरपालिका–१ लम्कीमे २०५२ साल कार्तिक १७ गतेक दिन २५ जाने शेयर सदस्य, कुल पुँजी रु. ६० हजार ३ सयसे सुरुवाट करल यी सहकारीके २०८२ कार्तिक मसान्तसमके वित्तीय विवरणमे शेयर पुँजी करिब ५१ करोड ७१ लाख, जगेडा कोष करिब ३५ करोड ७३ लाख, कुल बचत करिब ४ अर्ब ८८ करोड, कुल सम्पति करिब ७ अर्ब १२ करोड, लगानीमे रहल कर्जा करिब ५ अर्व १२ करोड, टमान कोषके जम्मा रकम करिब ७४ करोड ६१ लाख, कुल शेयर सदस्य संख्या ९२ हजार ४१५ ओ कर्मचारी ३०७ जाने रहल उहाँ जनैलै ।

३१औं वार्षिक साधारण सभाके अवसरमे एसइयमे उत्कृष्ट हुइल युवराज ढुङगाना, इस्मा चौधरीहे नगद पाँच हजार सम्मान कैगिल बा । उ सम्मान दिपेन्द्र माविके प्रअ विनोद भट्टराई हस्तान्तरण करल रहिट ।

ओस्टेक उत्कृष्ट शेयर सदस्य राजकुमारी चौधरी, भद्र बडैला, मंजिलाकुमारी चौधरी, कोपिला चौधरी ओ राम प्रसादीय चौधरीहे सम्मान कैगिल बा ।

ओस्टेक जन्मसे मरणोपरान्तसम किसान कोष अन्र्तगत कर्जा मिनाह सुविधा अन्र्तगत गोसिया निधन हुइलपाछे सीतादेवी चौधरीके कर्जा २ लाख ३९ हजार १७८ रुप्या ओ गीता देवी चौधरीके गोसिया निधन हुइलपाछे २ लाख ८ हजार रुप्या मिनाह हुइल चेक गाउँपालिका उपाध्यक्ष भगवतीकुमारी चौधरी हस्तान्तरण करल रहिट ।

उत्कृष्ट केन्द्र सम्मानितमे १५३० केन्द्र नम्बर भावना किसान महिला विकास केन्द्र कैलारी–४ के गाउँहे, ८८३ नम्बर केन्द्र शान्ति किसान महिला विकास केन्द्र कैलारी–३ रहल बटै ।

किसान बहुउद्देश्यी सहकारी संस्था लिमिटेड हसुलिया इकाईके ३१औं वार्षिक साधारण सभा संचालक समिति सदस्य पतिराम चौधरीके अध्यक्षतामे हुइल रहे । कार्यक्रमके संचालन हसुलिया शाखाके प्रमुख सुरेश चौधरी ओ स्वागत मन्तव्य लेखा सहायत रामप्रसाद चौधरी करल रहिट ।