मानव अधिकार सबके लाग बराबर
पहुरा समाचारदाता
धनगढी, २७ अगहन । मानव अधिकार सबके लाग बराबर रहल एक कार्यक्रमके सहभागीहुक्रे बटैले बटै ।
मानव अधिकारका लागि महिला एकल महिला समुह सुदूरपश्चिम प्रदेशसे कुर्बे विष्ट्रोके सहयोगमे ओ गैर सरकारी संस्था महासंघके समन्वयमे शुकके रोज धनगढीमे हुइल ७७औं अन्तर्राष्ट्रिय मानव अधिकार दिवस, १७औं राष्ट्रिय मानव अधिकार महाभेला २०८२, एकल महिला, द्वन्द प्रभावित ओ सीमान्तकृत महिलाके मानव अधिकार समसमायिक विषयगत सवालमे सुदूरपश्चिम प्रदेश गोष्ठीमे बाट बत्वाइल रहिट ।
मानव अधिकारका लागि महिला एकल महिला समुह सुदूरपश्चिम प्रदेश अध्यक्ष सुमन शर्माके अध्यक्षतामे हुइल कार्यक्रममे प्रमुख अतिथि सुदूरपश्चिम प्रदेश सभाके विशेष अधिकार समिति सभापति तुल्सी देवकोटा रहल रहिट । कार्यक्रममे सम्बोधन करटी उहाँ छाई मनैनहे गर्भसे हिंसा सुरु हुइना करल बटैली ।
मानव अधिकार सबके लाग बराबर रहल कहटी एकल महिला, द्वन्द प्रभावित ओ सीमान्तकृत महिलाके मानव अधिकार सुनिश्चित कैना जरुरी रहल बटैली । सरकारसे कैना काम संघसंस्थासे करटी रहल संघसंस्थाहे गलत दृृष्टिसे हेरे नैहुइनाफे उहाँ बटैली ।
प्रदेश सभा सदस्य जानकी कुवँर मानव अधिकार पहिलेक अवस्था ओ अब्बेक अवस्थामे फरक हुइल मने चुनौती रहल बटैली । भिटर नुकल समस्याहे बाहेर ल्यन्ना जरुरी रहलफे उहाा बटैली ।
जिल्ला समन्वय समिति कैलालीके सभापति टीकाकुमारी चौधरी भुल शिक्षित समाजमे अभिनफे घटना घटटी रहल बटैली ।
धनगढी उपमहानगरपालिकाके नगर उपप्रमुख कन्दकलाकुमारी राना मानव अधिकार कम्जोर बल्गर, धनी, गरिबके लाग फरक फरक नैहुके सबके लाग बराबर रहल बटैली । महिलाहुकनहे धनगढी उपमहानगरपालिकासे संचालन करल शनिवारिय मेलामे जोरना उहाँ आग्रह करलै ।
गोदावरी नगरपालिकाके नगर उपप्रमुख शारदादेवी रोकाय भोटके आधारमे विकास योजना बजेट बटना नाही सक्कुहुनके लाग हुईपर्ना बटैली । राजनीतिक आरक्षणके व्यवस्था हुईबेर महिला टमान तहमे पुग्न सफल हुइल बटैली ।
कैलालीके प्रमुख जिल्ला अधिकारी हिरालाल रेग्मी अब्बे नीतिगत रुपमे सुधार हुइटी गैल बटैलै । घरमे हुइना ंिहसा अन्त्यके लाग ससुइयया पटुहिया, डिडी बहिनीयाविच सम्बन्ध मजा हु्इना जरुरी रहल बटैलै ।
यूएनडिपीके प्रदेश प्रमुख बैजन्ती गिरी एकल महिला, द्वन्दपीडित ओ सीमान्तकृत समुदायके महिला अभिनफे हिंसा सहके बैठना बाध्य हुइना बटैली ।
ईश्वरीय विश्व विद्यालयके प्रमुख राजयोगिनी ब्राहमकुमारी हिरा डिडी बैद्धिक सनातन धर्ममे नारीहे सम्मान रुपमे सम्बोधान करल बटैली । ंिहसा अन्त्यके लाग पहिले स्वयं सुधर्ना ओ पाछे समाजहे सुधर्ना उहाँ आग्रह करली ।
गैरसरकारी संस्था महासंघके जिल्ला अध्यक्ष चेतमान साउद बर्दियामे एक महिला नागरिकता नैपाके आत्महत्या कैना बाध्य हुइल ओ गोदावारीमे शेरबहादुर चौधरीके हत्या हुइल मने न्याय नैपाइल बटैलै । उहाँ कहलै शिक्षा, स्वास्थ्य जातजाती, भुगोल कहुफे विभेद करे नैहुइना चाही ।
कार्यक्रममे मानव अधिकारका लागि महिला एकल महिला समुह कञ्चनपुरके पूर्व अध्यक्ष भावना केसी, जेनजी पुस्ताके पदम साउदलगायत मन्तव्य राखल रहिट ।
कार्यक्रममे राष्ट्रिय मानव अधिकार आयोगके सुदूरपश्चिम प्रदेश प्रमुख झंकरबहादुर रावल, फाया नेपालके अध्यक्ष गोमा आचार्य मानव अधिकार सम्बन्धी प्रस्तुतीकरण करल रहिट ।
कार्यक्रममे मानव अधिकारका लागि महिला एकल महिला समुहके प्रदेश कार्यक्रम अधिकृत वेद अवस्थी समुहके अवस्था ओ संस्थासे करल गतिविधिबारे जानकारी डेहल रहिट ।
यिहे विच कार्यक्रममे गणेश कडायत, गोमा आचार्य, कोशिला जोशी, भावना केसी, माया भट्ट, जयन्ती पन्तहे सम्मान कैगिल बा । कार्यक्रममे स्वागत मन्तव्य समुहके प्रदेश उपाध्यक्ष शान्ति महत ओ संचालन गैसस महांसंघके गोकुल खडका करले रहिट । उ कार्यक्रममे एकल महिला, द्वन्द प्रभावित ओ सीमान्तकृत महिलाके अवस्था, चुनौती ओ अवसरबारे समुहगत छलफलफे हुइल रहे । कलेसे नौ जिल्लामे एकल महिला, द्वन्द प्रभावित ओ सीमान्तकृत महिलाके अवस्थाबारे जिल्लागत रुपमे अनुभव सुनाइल रहे ।
