होटेल क्षेत्रके समस्या समाधानमे पहल कैना प्रतिवद्धता
पहुरा समाचारदाता
धनगढी, २८ अगहन । कैलालीमे होटेल क्षेत्रके समस्या समाधान कैना सामूहिक प्रतिवद्धता करल बा । कैलाली उद्योग वाणिज्य संघके आयोजनामे करल सुदूरपश्चिम महोत्सवमे भिजन सुदूरपश्चिम कार्यक्रमके ‘सुदूरपश्चिममा होटेल व्यवसायः लगानी, समस्या ओ श्रमशक्ति’ विषयक बहसमे बोल्टी सरोकारवाला निकायसे उ प्रतिवद्धता जनाइल हुइट ।
कैलालीके प्रमुख जिल्ला अधिकारी हिरालाल रेग्मी, होटेल व्यवसायी संघ कैलालीके अध्यक्ष केशवदत्त पाण्डेय ओ एसोसिएसन अफ हस्पिटालिटी ट्रेनिङ इन्सिच्युट कैलाली अध्यक्ष कमल पनेरुसँग करल बहस कार्यक्रममे सरोकारवाला निकायके प्रतिनिधिसमेतसे उ प्रतिवद्धता जनाइल हुइट ।
बहसमे बोल्टी होटेल व्यवसायी संघ कैलाली अध्यक्ष पाण्डेय नेपाल सरकारके नीतिके कारण होटेल व्यवसायी उपर उठे नैसेकल बटैलै । उहाँ कहलै, ‘सरकारी नीति परिमार्जित करे परल ।’ होटेल तथा प्रदेशमे पर्यटन लक्षित स्थापना करल बरवार होटेलसे स्थानीय तह, प्रदेश सरकार ओ संघीय सरकारहे तेहोरो कर टिरे पर्ना । मने, सरकारसे डेहे पर्ना सेवा सुविधामे भर डेहे नैसेकल गुनासो उहाँ पोख्लै ।
‘देशके प्रायःजैसिन प्रादेशिक बरवार सहरमे रात्रिकालीन बजार रलेसे फेन सुदूरपश्चिम प्रदेशके राजधानी रहल धनगढीमे भर होटेल व्यवसायहे रात १० नैबज्टी बन्द करैना मजा नैहो,’ उहाँ कहलै, ‘ओकर लाग यहाँके स्थानीय प्रशासनसे समय थपे परल ।’ उहाँ होटेल व्यवसायीसे यहाँके श्रमशक्ति अपने क्षेत्रमे रोकक् लाग फेन बरवार योगदान डेहल उहाँ बटैलै । ‘सुदूरपश्चिममे किल होटेल क्षेत्रमे २५ अर्ब ढेर लगानी हुइल ओ ५० हजार जनहनहे रोजगारी डेले बा,’ उहाँ कहलै, ‘सरकारसे युवाहे स्वदेशमे रोके नैसेकल अवस्थामे होटेल व्यवसायी अटरा ढेर युवाहे रोजगारी डेहल ओरसे सरकारसे फेन होटेल व्यवसायीके समस्या समाधान कैना पहल करे परल ।’
एसोसिएसन अफ हस्पिटालिटी ट्रेनिङ इन्सिच्युट कैलाली अध्यक्ष कमल पनेरु सुदूरपश्चिमके होटेलमे दक्ष जनशक्ति उत्पादन कैटी आइल बटैलै । उहाँ कहलै, ‘हम्रे यहाँके होटेल व्यवसायीहे लक्षित कैटी दक्ष जनशक्ति उत्पादन करले बटी । मने, उहाँहुक्रनके दक्षता अनुसारके पारिश्रमिक पाइ सेकल नैहुइट ।’ पाछेक बरसमे धनगढीमे किल ढेर कफी हाउस तथा क्याफे सञ्चालनमे आइल बटैटी उहाँ यहैँक तालिम लेहल कामदार स्वरोजगार बन्टी रहल बटै ।
यहाँके होटेल मजा सेवा सुविधा डेलेसे फेन सुदूरपश्चिममे बाह्य पर्यटक आइ नैसेक्ना प्रमुख कारण विदेशी पर्यटकहे सुरक्षा तथा घुमफिरमे सरकारी नीति प्रभावकारी नैरहल होटेल डिभोटीके महाप्रवन्धक तथा जनरल म्यानेजर हरिष भण्डारी बटैलै । उहाँ कहलै, ‘यहाँ तमामौ पर्यटकीय स्थल बावै । ओम्ने फेन धार्मिक स्थल बावै, भारतके उत्तर प्रदेश ओ उत्तराखण्डके पर्यटकहे किल भित्र्याए सेक्लेसे फेन होटेल व्यवसाय फस्टैना समय नैलागी ।’
अपने जिल्ला प्रशासन कार्यालयसे १२ बजेसमके अनुमति लेके इन्द्रेणी दोहोरी साँझ सञ्चालनमे लन्लेसे फेन अब्बे आके प्रशासनसे नै समय घटाके १० बजे राखल गुनासो पोख्टी इन्द्र्रेणी दोहोरी साँझके सञ्चालक राधिका लम्साल कहली, ‘रात्रिकालीन व्यवसायमे ढेर समस्या बावै, ओम्ने फेन दोहोरी साँझ टे झन साँझ ७ बजेसे सुरु हुइ, व्यवसाय पिकअप लेना समय कहलक ९, १० बजेसे रात १२ बजेसम हो, मने उहे समयमे बन्द कैडेना दुःखद हो । ओकर लाग प्रसाशनसे कुछ सोचे परल ।’
बहस कार्यक्रममे बोल्टी कैलालीके प्रमुख जिल्ला अधिकारी हिरालाल रेग्मी यहाँके शान्ति सुरक्षाके विषयमे अपने गम्भीर बनल बटैलै । उहाँ कहलै, ‘शान्ति सुरक्षाहे ध्यानमे रख्टी होटेल व्यवसायमे कबुकाल चेकिङ हुइना । जिहीसे होटेल व्यवसायी क्षेत्रमे पनि गलत तथा अवैधानिक गतिविधि नहोए कना हो ।’
उहाँ रात्रिकालीन समयमे व्यवसाय करे पैना कार्यविधि हुइलेसे फेन उहीहे कौनो निश्चित ठाउँ रलेसे अलग्गै सुरक्षा फोर्सहे खटाए सेक्ना रहे । मने, यहाँ छिटकके रहल ठाउँमे रात्रिकालीन व्यवसाय करेबर सुरक्षा चुनौती बह्रे सेक्ना बटैलै । उहाँ कहलै, ‘जेनजी आन्दोलनपाछे सुरक्षा चुनौती थपल ओ फेनसे निर्वाचन आइ लागल ओरसे फेन निर्वाचन लक्षित सुरक्षा रणनीति रहल ओरसे अब्बे रात्रिकालीन व्यवसाय सञ्चालनमे सोचे सेक्ना अवस्था नैहो । निर्वाचनपाछे भर उबारे सरोकारवाला निकायसँगके छलफलमे करे सेकजाइ ।’
सुदूरपश्चिम महोत्सवमे यी बरससे कैलाली उद्योग वाणिज्य संघसे मनोरञ्जनात्मक कार्यक्रमके साथे बिहानके समयमे भिजन सुदूरपश्चिम नामक बहस कार्यक्रम सुरुवात करले बा ।
