पत्रकार चन्दउप्पर दुर्व्यवहार करुइया युवक पक्राउ
पहुरा समाचारदाता
धनगढी, १ पुस । धनगढीसे सञ्चालित नयाँ सन्देश अनलाइनके प्रधानसम्पादक रमा चन्दउप्पर दुर्व्यवहार करुइया युवक पक्राउ परल बटै । पक्राउ परुइयामे २८ वर्षीय मनीष श्रेष्ठ रहल जिल्ला प्रहरी कार्यालय कैलाली जनैले बा ।
धनगढीमे सञ्चालन हुइटी रहल सुदूरपश्चिम महोत्सवके भिडिओ कैद कैना क्रममे चन्दउप्पर दुव्र्यवहार हुइल रहे । महोत्सवबारे क्यामेरामे बोल्टी रहल बेला पाछेसे आइल एक अपरिचित युवक नियतवश जोरसे हुठयाइल भिडियो सार्वजनिक हुइलपाछे घटना बाहेर आइल रहे ।
चन्दके उजुरीके आधारमे प्रहरी अनुसन्धान करटी सोम्मार साँझ आरोपीहे पक्राउ करल हो । पक्राउ परल मनीष श्रेष्ठ पाल्पा घर हुके हाल धनगढीमे डेरा करके बैठटी आइल गाडी चालक रहल कैलालीके प्रहरी प्रमुख एसपी नरेन्द्र चन्द जानकारी डेलै । घटनामे संलग्न व्यक्तिहे नियन्त्रणमे लेके अनुसन्धान आघे बढाइल एसपी चन्दके कहाई बा ।
यी घटनाप्रति नेपाल पत्रकार महासंघ सुदूरपश्चिम समिति ओ कैलाली जिल्ला शाखासे गम्भीर आपत्ति जनैटी सार्वजनिक स्थलमे पत्रकारउप्पर हुइल दुर्व्यवहार निन्दनीय रहल उल्लेख करल रहे ।
महासंघसे प्रेस स्वतन्त्रता ओ पत्रकारके सुरक्षाउप्पर आघात पुग्न यैसिन घटनामे संलग्न दोषीहे कडा कारबाही कैना माग करल रहे । प्रहरीके अनुसार घटनासम्बन्धी ठप अनुसन्धान जारी रहल बा ।
