महोत्सव पुस ६ गतेसम सञ्चालन हुइना
पहुरा समाचारदाता
धनगढी, १ पुस । धनगढीमे सञ्चालन हुइटी रहल सुदूरपश्चिम महोत्सव २०८२ के अवधि बढाइल बा । महोत्सवप्रति डेखल उत्साहजनक सहभागिता, दर्शकके बह्रटी चाप तथा सरोकारवालाके मागहे मध्यनजर करटी आयोजक कैलाली उद्योग वाणिज्य संघसे मंगरके रोज पत्रकार सम्मेलन कैके महोत्सव पुस ६ गतेसम कायम कैना निर्णय करल हो ।
संघके अनुसार महोत्सव सञ्चालनके आठौं दिनसम आपुग्के करिब १० करोड रुप्याके आर्थिक कारोबार हुइल बा कलेसे अनुमानित ३ लाख दर्शकसे महोत्सव अवलोकन करले बटै । यिहीसे स्थानीय उद्योग–व्यवसाय प्रवद्र्धनके साथे पर्यटन ओ सांस्कृतिक पहिचान उजागर कैना उल्लेखनीय योगदान पुगल आयोजकके दाबी बा ।
२०६३ सालसे निरन्तर आयोजना हुइटी आइल सुदूरपश्चिम महोत्सवके यी १९औं संस्करण हो । देशके वर्तमान आर्थिक ओ सामाजिक चुनौतीके बीच उद्योग–व्यवसायहे आशावादी बनैटी पुनर्जीवन डेना उद्देश्यसे महोत्सव आयोजना करल कैलाली उद्योग वाणिज्य संघसे जनैले बा ।
संघके अध्यक्ष पुष्करराज ओझा महोत्सवहे भव्य ओ सफल बनैना सहयोग कैना सक्कु व्यवसायी, प्रायोजक, सुरक्षा निकाय, कलाकार, सञ्चारकर्मी तथा दर्शकप्रति आभार व्यक्त करटी अइना दिनमेफे सक्कु पक्षसे निरन्तर सहयोग ओ सहभागिताके अपेक्षा रहल बटैलै ।
आयोजकसे सुदूरपश्चिम महोत्सवहे प्रदेशके केल्ह नैहुके राष्ट्रके नमुना महोत्सवके रूपमे थप उचाइमे पुगैना सक्कु राजनीतिक दल, तीनु तहके सरकार, सरकारी तथा गैरसरकारी संस्था, पत्रकार, विद्यार्थी ओ आम नागरिकहे अधिकतम सहभागिता जनैना आग्रह करल बा ।
