एक लाखसे ढेर लेलै स्वास्थ्य सेवा
पहुरा समाचारदाता
धनगढी, १ पुस । कैलालीके धनगढी उपमहानगरपालिकासे सञ्चालनमे लानल विशेषज्ञसहितके निःशुल्क स्वास्थ्य सेवा प्रभावकारी बन्टी गैल बा ।
नगरवासी स्वास्थ्य सेवासे वञ्चित हुइ नपरे ओ सक्कु जनहनहे सर्वसुलभ स्वास्थ्य सेवा प्राप्त होए कना उद्देश्यसे वडामे विशेषज्ञ चिकित्सकसहितके वडा क्लिनिक सेवा उपमहानगरपालिकासे सुरु करल रहे ।
उपमहानगरपालिकासे आर्थिक अवस्था कमजोर हुइल तथा विपन्न नागरिकके लाग कार्यान्वयनमे लानल उ कार्यक्रम प्रभावकारी बन्टी गैल हो । २०७९ सालसे हालसम एक लाख ३३ हजार बिरामी स्वास्थ्य सेवा लेहल धनगढी उपमहानगरपालिका विशेषज्ञ वडा स्वास्थ्य क्लिनिकके संयोजक कृष्ण बोहोरा जानकारी डेलै ।
उहाँके अनुसार उ अवधिमे ७८ हजार ७३६ जाने जनरल फिजिसियनसे, २६ हजार २४२ महिला स्त्री तथा प्रसूतिरोग विशेषज्ञसे ओ ४० हजार ३४८ जाने आँखासम्बन्धी सेवा लेहल बटै । उ अवधिमे सेवा लेहुइयामध्ये २४ हजार ४२६ जाने ७० वर्षउप्परके ज्येष्ठ नागरिक रहल उहाँ जानकारी डेलै ।
उहाँ भिडियो एक्सरे, इसिजी, गर्भवती सेवा, ल्याब सेवा, सुगर तथा अन्य सेवा फेन वडामे डेना करल बटैलै ।
आर्थिक अभावके कारण उपचार करे नैसेक्ना गरिब तथा विपन्न नागरिकके घरदैलोमे पुगके निःशुल्क विशेषज्ञ स्वास्थ्य सेवा डेना उद्देश्यसे १९ वडामे प्रत्येक महिना निःशुल्क वडा क्लिनिक सुरु करल उपप्रमुख कन्दकला राना बटैली ।
२०७९ साउन १ से गाउँघरमे विशेषज्ञ स्वास्थ्य सेवा पाइलपाछे स्वास्थ्य परीक्षण कैना सहज हुइनाके साथे उपचारके लाग बाहर जाइ पर्ना बाध्यता अन्त्य हुइल स्थानीय सेवाग्राही जयन्तीकुमारी चन्द बटैली । उपमहानगरके अनुसार ‘विशेषज्ञ वडा स्वास्थ्य क्लिनिक’ साझेदारी योजनाके रूपमे सञ्चालनमे लानल हो ।
प्रदेश सरकारके सामाजिक विकास मन्त्रालयसे २५ लाख बराबरके स्वास्थ्य जाँचके मेसिनरीके सहयोग उपलब्ध करैले बा । साथे गेटा आँखा अस्पताल ओ धनगढी नेत्रालयसे आँखारोगसम्बन्धी उपचारमे सहयोग कैटी आइल बावै ।
ओस्टके प्रयोगशाला, अल्ट्रासाउन्ड, इसिजीलगायतके सेवा फेन वडा स्वास्थ्य क्लिनिकसे प्रदान कैटी आइल बा । फिजिसियन डाक्टर विकास रिजाल नैसर्ना रोगके बिरामीके सङ्ख्या ढेर अइना करल बटैलै ।
उपमहानगरके वडा नम्बर १९ से सुरु करल वडा स्वास्थ्य क्लिनिक प्रत्येक वडामे महिनाके एक दिन सञ्चालन हुइटी रहल बा । वडा स्वास्थ्य सेवा सुरु हुइलपाछे आर्थिक रूपमे विपन्न नागरिक, वृद्धवृद्धा, सुत्केरी ओ अशक्त ढेर लाभान्वित हुइल बटै ।
