बालबालिकाहे छोटहीसे संस्कार सिखैना जरुरी बा

पहुरा समाचारदाता
धनगढी, २ पुुस । कैलारी गाउँपालिकाके उपाध्यक्ष भगवतीकुमारी चौधरी बालबालिकाहुकनहे छोटहीसे संस्कार सिखैना जरुरी रहल बटैले बटी ।

सामुदायिक विकास केन्द्र(सिडिसी) डोटीके आयोजनामे यूनिसेफके सहयोग तथा कैलारी गाउँपालिकाके सहकार्यमे बालबालिकाके लाग सार्वजनिक वित्त व्यवस्थापन सम्बन्धी दुई दिने अभिमुखीकरण समापन कार्यक्रममे सम्बोधन करटी उहाँ बाट बत्वाइल हुइट ।

बालबालिकामे मष्टिकके विकास दुई बरसभिटर ८० प्रतिशतसे ढेर हुइना ओरसे पोषणमे ध्यान डेटी संस्कारके बाट सिखाई पर्ना उहाँ बटैली । अब्बेक बालबालिकनमे छोटहीसे शिक्षा, संस्कार हस्तान्तरण करे नैसेक्लेसे पाछे जाके समस्या हुइना कहटी अभिभावकहुक्रे लर्कनमे लगानी कैना जरुरी रहल बटैली ।

नरात्मक सोचसे कबु विकास नैहुइना कहटी सकारात्मक ओ समन्वय सहकार्यसे केल्ह मुलुकहे समृद्ध बनाईसेक्ना उहाँ बटैली । भौतिक विकाससंगे मानविय विकास महत्वपूर्ण रहल कहटी बालबालिका तथा सीमान्तकृत वर्गके लाग बजेट विनियोजन कैना आवश्यक रहल उपाध्यक्ष बटैली ।

अभिमुखीकरणके पहिल दिन यूनिसेफे सामाजिक नीति कार्यक्रम अधिकृत प्रकाश आचार्य बालबालिका अवस्थाबारे प्रस्तुतीकरण करल रहिट । सुदूरपश्चिम प्रदेशमे बालबालिका घरमुली रहल परिवार संख्या शुन्यसे १४ बर्षके १५ सय ८मे लउण्डा ७४७ ओ लउण्डी ८४१ रहल रहल जनैलै । १५से १९ बरससमके ८ सय ६५ मे लउण्डा ४३ सय ८० ओ लउण्डी ४४ सय ८५ रहल जनैलै ।

विद्यालय भर्ना दर ९७.७ प्रतिशत, मध्य माध्यमिक तह ९ से १२ निर भर्नादर ५५ प्रतिशत, प्रदेशमे बहुआयमिक गरिबी ३९.५ प्रतिशत, राष्ट्रिय गरिबी दर १७.४ केल्ह रहल बा । बालमुत्युदर प्रति १ हजारमे सुपमे ४९, राष्ट्रिय तथ्यांक २३ रहल बा । ओस्टेक कुपोषित बालबालिका १४ प्रतिशत रहल उहाँ जनैलै ।

कैलाली बहुमुखी क्याम्पसके प्राध्यपक राजेन्द्रविर चन्द बालबालिकाके लाग सार्वजनिक वित्त व्यवस्थापन सम्बन्धी पालिकासे कैगिल प्रयासबारे, बजेट, मुख्य आधार, नेपालके विद्यामन कानून, करसम्बन्धी प्रस्तुतीकरण तथा छलफल करैले रहिट ।

कैलारी गाउँपालिका सामाजिक विकास समितिके संयोजक तथा वडा नम्बर ३ के वडा अध्यक्ष सन्तराम चौधरीके अध्यक्षतामे हुइल अभिमुखीकरण कार्यक्रममे वडाहुँक्रे, सामुदायिक विकास केन्द्र(सिडिसी) डोटीके कार्यक्रम संयोजक तिलक चौधरी, कार्यक्रम अधिकृत करुणा चौधरी, सिडिसीके सामाजिक परिचालक शकुन्तला चौधरी, कैलारी गाउँपालिकाके टमान विषयगत शाखाके प्रमुखहुक्रे, कार्यपालिका सदस्यहुकनके सहभागिता रहे । कार्यक्रमके संचालन सामाजिक विकास शाखा प्रमुख यगम कलेल करल रहिट ।