जिल्ला प्रहरी कार्यालय भदौसे अगहनसमके प्रगती सार्वजनिक
पहुरा समाचारदाता
धनगढी, २ पुस । जिल्ला प्रहरी कार्यालय गैल भदौ १५ गतेसे अगहनमसान्तसमके कार्य प्रगती विवरण सार्वजनिक करले बा ।
प्रहरीसे अपराध अनुसन्धान तथा नियन्त्रण, शान्ति सुरक्षा तथा प्रहरी कार्यबारे प्रस्तीकरण करटी साढे महिनाके कार्य प्रगती विवरण सार्वजनिक करल हो । प्रस्तुत करल साढे तीन महिनाके अवधिके तथ्यांकमे ज्यान सम्बन्धी कर्तव्य ज्यान, ज्यान मर्ना उद्योग, भावीतव्य ज्यान, फुटकर ज्यान, ज्यान सम्बन्धी, गौवधलगायतके ७६ ठो मुद्दा दर्ता हुइलमे २४ ठो फर्छौट, ५२ ठो बाँकी ओ ४३ जाने पक्राउ परल बटै ।
आत्महत्या ९६ जाने कैल, चोरी सम्बन्धी १६ जाने, संगठित अपराधमे १८९ जाने पक्राउ परल बटै । सामाजिक अपराधके ५० ठो मुद्दा दर्ता हुइलमे ९२ जाने पक्राउ परलै । महिला तथा बालबालिका सम्बन्धी जबरजस्ती करणी, जबरजस्ती करणी उद्योग, बाल विवाह, बहु विवाह, बोक्सी आरोपलगायतके २७ ठो घटना दर्ता हुइलमे २२ ठो फर्छौट ५ ठो बाँकी ओ ३४ जाने पक्राउ परल बटै ।
सवारी ज्यानमे २६ ठो मुद्दा दर्तामे २२ जाने पक्राउ, बैकिङ कसुर, अपराधिक उपद्रवमे १५३ ठो मुद्दा दर्तामे २४ जाने पक्राउ परल जिल्ला प्रहरी कार्यालय कैलालीके प्रमुख नरेन्द्र चन्द बटैलै ।
उ अवधिमे अपराधिक घटनामे संलग्नपाछे अदालतके फैसलासे जरिवाना ओ कैद सजय तोकलपाछे रहल ३७२ जाने फरार प्रतिवादी पक्राउ परल बटै । प्रहरीसे टमान अपराधिक घटनाके ११२ ठो पेण्डिङ मुद्दा फर्छौट करले बा । महिला तथा बालबालिका सम्बन्धी ९० ठो ठाडो उजुरी परल रहे । जेम्ने मिलापत्र ८५ ठो हुइल बा कलेसे ५ ठो बाँकी रहल बा ।
हेराइल तथा फेला परल महिला, बालबालिका तथा जेष्ठ नागरिकके विवरणमे हेराइल २४२, फेला परल २०२ ओ फेला नैपरल ४१ जाने रहल बटै । हेराइलमे महिला १४५ जाने, बालक २५, बालिका ६० ओ जेष्ठ नागरिक १२ जाने रहल रहिट ।
घरेलु हिंसाके टमान प्रकृति अनुसार १३२ ठो उजुरी परल बा । जिल्ला प्रहरी कार्यालय कैलालीमे २० प्रकृतिके १ हजार ४२ ठो मुद्दा दर्ता हुइल बा । कलेसे जिल्ला प्रशासन कार्यालय कैलालीमे १८१ ठो मुद्दा दर्ता हुइल रहे । ओम्ने ११० ठो मिलापत्र, २१ ठो मातहतमे पठाइल, ५० ठो बाँकी रहल बा ।
