नमस्ते सहकारीके २३औं साधारण सभा

पहुरा समाचारदाता
धनगढी, ५ पुस । कैलाली जिल्लाके धनगढी उपमहानगरपालिका–८मे रहल नमस्ते बचत तथा ऋण सहकारी संस्था लिमिटेडके २३औं साधारण सभा शनिच्चरके रोज धनगढीमे सम्पन्न हुइल बा ।

सहकारीके अध्यक्ष जगतराम चौधरीके अध्यक्षतामे हुइल कार्यक्रममे धनगढी उपमहानगरपालिकाके नगर उप प्रमुख कला राना प्रमुख अतिथि ओ वडा नम्बर ८ के वडा अध्यक्ष जुगराम चौधरी विशिष्ट अतिथि रहल रहिट । उदघाटन कार्यक्रममे सम्बोधन करटी प्रमुख अतिथि कन्दकला राना यी सहकारीसे थारु समुदायके महिलाहुकनहे आघे बह्रैना बहुट योगदान पुगाइल बटैली । थारु समुदाय विगतके दिनमे सरकारी बैंकसे लोन लेहे नैसेक्ना ओ ओकर लाग महिनौ अशरा लागे पर्ना अवस्था रहल बेला यी सहकारीके स्थापना हुके थारु समुदायमे आर्थिक क्रान्ति ल्यानल बटैली ।

कार्यक्रममे शुभकामना मन्तव्य वडा नम्बर ८ के वडा अध्यक्ष जुगराम चौधरी, जिल्ला बचत तथा ऋण सहकारी संस्था लिमिटेडके सचि व इन्दिरा जोशी, सहकारीके कानूनी सल्लाहकार नाथुराम चौधरी, सल्लाहकार समिति सदस्य मनिराम चौधरी, लेखा सुपरीवेक्षण समिति संयोजक रामदास चौधरीलगायत शुभकामना मन्तव्य राखल रहिट ।

उदघाटन शत्रमे संस्थाके प्रवन्धक विजय चौधरी आर्थिक बर्ष २०८१÷२०८२ सालके वार्षिक प्रतिवेदन तथा जानकारी डेहल रहिट । कार्यक्रममे जेष्ठ नागरिक फगुनी डगौंरा, बाबुराम रानाथारु, प्रकास चौधरी, सुलोचना देवी ठकुरी, गुल्ला रानाथारु, सरिया रानाथारुहे सम्मान कैगिल बा ।
ओस्टेक असल ऋणी तथा असल बचतकर्ता सम्मानमे राजदेवी कठरिया, रामदास रानाहे कैगिल बा । असल महिला केन्द्र सम्मानमे लघुवित्त केन्द्र १५, ९८, २७ रहल बा । ओस्टेक ७९, ५४, ५२ नम्बर केन्द्रहेफे सम्मान कैगिल बा ।

असल बाल बचतकर्ता सम्मान तानिया चौधरीहे डेहल बा । कर्मचारी सम्मानमे उत्कृष्ट कर्मचारी सहायक लेखापाल बालगोविन्द चौधरी, उत्कृष्ट बजार प्रतिनिधि अन्जु चौधरी रहल बटै । कार्यक्रम संचालन संस्थाके सचिव खडक बहादुर चौधरी ओ स्वागत मन्तव्य उपाध्यक्ष रोहितकुमार चौधरी करल रहिट ।

कार्यक्रममे संस्थाके संचालक समितिमे पदाधिकारी, लेखा सुपरीवेक्षण समितिके पदाधिकारी, सल्लाकार समितिके समितिके पदाधिकारी शेयर सदस्यहुकनके सहभागिता रहे । कार्यक्रममे गायकहुक्रे मनमति बखरिया, विक्रम चौधरी, होरी नाँच तथा सांस्कृतिक प्रस्तुती रहल रहे ।

नमस्ते बचत तया अण सहकारी संस्था लि धनगढी वि.स. २०६५ साल अगहन २७ गतेसे स्थापना हुके १८औं वर्षमे प्रवेश करल बा ।

संस्थाके पूँजी संरचनामे अधिकृत शेयर पूँजी रु.१५ करोड ओ वि.सं. २०८१ असार मसान्तसम रु. ४ करोड ४५ लाख ५२ हजार २ सय रहल बा । वि.सं. २०८२ असार मसान्तसम चुक्ता शेयर पूँजी रु.४ करोड ९८ लाख ३७ हजार ९ सय पुगल बा । गैल असार मसान्तसम शेयर सदस्य संख्या ७ हजार १५ जाने पुगल बा ।

निक्षेप संकलनमे गत बर्षके तुलनामे ३९.०८ प्रतिशतसे बचतमे वृद्धि भई वि.सं. २०८२ साल अषाढ मसान्तसम संस्थाके कुल निक्षेप रकम रु. ३५ करोड ५३ लाख ४० हजार २ सय रहल बा ।

कर्जा प्रवाह तथा असुलमे संस्थाके २०८१ असार मसान्तसमके लगानीमे रहल कर्जा रकम रु ३७ करोड ५१ लाख ५४ हजार ७८ रुप्या १४ रहलमे २०८१÷२०८२ ममे २.४७ प्रतिशतसे वृद्धि हुके वि.सं. २०८२ असार मसान्तसम लगानीमे रहल कर्जा रु ३८ करोड २८ लाख ३४ हजार ५५९ रुप्या ३४ रहल बा ।

मुनाफा आर्जनमे यी संस्थाके आ.व. २०८१÷०८२ मे कर पाछेक खुद मुनाफा रु ८२ लाख ९ हजार ७७१ रुप्या ११ पैसा आर्जन कैना सफल हुइल बा ।