चैतन्य ओ केडीएफए बिच समझदारी पत्रमे हस्ताक्षर
पहुरा समाचारदाता
धनगढी, ८ पुस । शिक्षा ओ खेलकुदके संयोजनमार्फत विद्यार्थीके समग्र व्यक्तित्व विकास कैना उद्देश्यसहित चैतन्य पाठशाला ओ कैलाली जिल्ला फुटबल संघ (केडीएफए) बिच समझदारी पत्र (एमओयू) मे हस्ताक्षर करल बा ।
धनगढी–५ शिवनगरस्थित चैतन्य फुटसल ग्राउन्डमे एक कार्यक्रममे दुनु संस्थाके प्रतिनिधिहुक्रे एमओयूमे हस्ताक्षर करल हुइट ।
सम्झौताअनुसार विद्यालय तहसे खेलकुदप्रतिके रुचि ओ अनुशासन विकास कैना तथा प्रतिभा वान खेलाडीके पहिचान, संरक्षण ओ क्षमता अभिवृद्धि कैना लक्ष्यके साथ प्रत्येक वर्ष चैतन्य पाठशालासे राष्ट्रियस्तरके खेल सञ्चालन हुइना ओ ओम्ने कैलाली जिल्ला फुटबल सङ्घसे प्राविधिक सहयोग कैना बा ।
साथे, नियमित प्रशिक्षण, मैत्रीपूर्ण खेल, प्रतियोगिता तथा खेलकुदसम्बन्धी सचेतनामूलक कार्यक्रम संयुक्त रूपमे सञ्चालन कैना जनाइल बा ।
मंगरके रोज आयोजित कार्यक्रममे चैतन्य पाठशालाके अध्यक्ष गणेशप्रसाद जोशी, प्राचार्य प्रेमनिधि ओझा ओ कैलाली जिल्ला फुटबल संघके अध्यक्ष अनिल मल्ल संयुक्त रूपमे हस्ताक्षर करल हुइट ।
