थारू समुदायसे पहिल महिला पाइलट बन्न सफल हुइली कैलालीके टीका

पहुरा समाचारदाता
धनगढी, पुस ११ गते । थारू समुदायसे पहिल महिला पाइलट बन्न सफल कैलालीके टीका चौधरीहे विफेक रोज धनगढीमे सम्मान कैगिल बा ।

बातचित घरसे चौधरीहे सम्मान करल हो । बातचित घरके बरघरिया ठाकुर करिया प्रधानसे टीकाहे सम्मानपत्र हस्तान्तरण करलै ।

धनगढी उपमहानगरपालिका–१३, कैलाली गाउँके २१ वर्षीया चौधरी दक्षिण अफ्रिकासे प्राइभेट पाइलटके लाइसेन्स प्राप्त करले बटी । मने पाइलट तालिम पूरा करेक लाग उहाँ अभिन एक सय घण्टाके एकल उडान बाँकी रहल बा ।

अपने पाइलट तालिम पूरा कैना अभिन छ महिनासम लागे सेक्ना चौधरी बटैली । विदामे आइल उहाँ पाइलट तालिम गाह्रो रना करल उल्लेख करटी अपने हिम्मत, संघर्ष करके तालिम पूरा कैना क्रममे रहल उल्लेख करली । थारू समुदायसे टीका चौधरी पाइलट बन्न सिंगो समुदायके लाग गर्वके विषय रहल बातचित घरके बरघरिया करियाप्रधान बटैलै ।

कार्यक्रममे बाटचित घरके माधव थारुफे बधाई ज्ञापन तथा दोसल्ला ओह्राके सम्मान करल रहिट । कार्यक्रमके संचालन बाचचित घरके सानु चौधरी ओ स्वागत बसन्ती चौधरी करल रहिट । सम्मान कार्यक्रममे टीका चौधरीके बाबा मानबहादुर चौधरीलगायत थारु बुद्धिजीविहुकनके सहभागिता रहे ।