पहुँच परियोजनाके सामाजिक लेखा परिक्षण

पहुरा समाचारदाता
धनगढी, १४ पुुस । दलित महिला अधिकार मञ्च कैलालीसे डिसिएके सहयोगमे कैलारी गाउँपालिकामे संञ्चालन करल पहुँच परियोजनाके सामाजिक लेखा परिक्षण सोम्मारके रोज के गाउँमे सम्पन्न हुइल बा ।

पहुँच परियोजनासे कैलारी गाउँपालिकाके १ से ९ नम्बर वडामे जलबायु परिवर्तन न्यूनिकरण, दिगो जिविकोपार्जन, सीपमुलक आयमुलक कार्यक्रम, डिजिटल साक्षरता कार्यक्रम संचालन करटी आइल पहुँच परियोजनाके गौरीगंगा नगरपालिकाके सामाजिक परिचालक दानबहादुर विक बटैलै । यी परियोजना गौरीगंगा नगरपालिकाके १ से ११ नम्बर वडामे, गोदावरी नगरपालिकामे, धनगढी उपमहानगरपालिका, भजनी नगरपालिका, बर्दगोरिया गाउँपालिका, जानकी गाउँपालिका ओ जोशीपुर गाउँपालिकामे कार्य क्षेत्र बनाके काम करटी आइल उहाँ बटैले ।

कार्यक्रमसे समुहके महिला टमान उपभोक्ता समिति ओ सरकारी तथा गैर सहकारी संस्थाके समितिमे बैठके कार्यक्रम सम्पन्न कैना सफल हुइल बटै ।

जलवायु परिवर्तन सम्बन्धी अन्तरक्रिया कार्यक्रमसे ३७५ जाने व्यक्तिहुकनहे जानकारी कैगिल बा । कैलारी गाउँपालिकामे आर्थिक बर्ष २०८२/०८३ मे ९ जाने उद्यमीहुकनहे बिउ पुजीके रुपमे एक जनहाहे रु २० हजार सहयोग कैगिल बा ।
डिजिटल साक्षरताके माध्यमसे ३७५ जाने व्यक्तिहुकनहे सचेत कैगिल बा । साथे समुहके महिलाहुक्रे आपन छावाछाइनहे मोबाइल फोनक प्रयोगसे पह्रैटी रहल बटै ।

डिजिटल साक्षरता कार्यक्रमसे महिला समुह मोबाईल वैंकिङ दरमे वृद्धि हुइल बा । छलफल चौतारीके माध्यमसे कैलारी गाउँपालिकामे यी वर्ष १८ सय जनहनहे टमान विषयमे जानकारी करागिल बा ।

छलफल चौतारीके माध्यमसे २ ठो घरेलु हिसा, २ ठो जन्म दर्ता, २ ठो विवाह दर्ता, १ ठो नागरिता २ घटनामे सहजीकरण कैना सफल हुइल बा ।

गौरीगंगामे आर्थिक वर्ष २०८२/०८३ मे ३ जनहनहे रु १० हजारके दरसे टमान परियोजनके लाग सहयोगसे महिला आत्मा निर्भर हुइनाके साथे आम्दानीमे समेत वृद्धि हुइल बा ।

योजना तर्जमे प्रक्रियाके तालिमसे आर्थिक बर्ष २०८२/०८३ ममे रु ९१ लाख ५० हजार बजेट माग करलमे रु ४९ लाख बजेट पास करले बटै ।

सामाजिक लेखा परिक्षण कार्यक्रम कैलारी गाउँपालिका वडा नम्बर ४ के वडाअध्यक्ष ठागुराम चौधरीके अध्यक्षतामे हुइल रहे । कार्यक्रममे उहाँ संस्थासे मजा कार्य करल कहटी धन्यवाद ज्ञापन करलै । उहाँ कहलै, यी संस्था पालिका ओ वडा कार्यालयके बजेटसे करेनैसेकल काममे भारी सहयोग करले बा । पहुँच परियोजनासे जलबायू परिवर्तन कार्यक्रम संचालन करेबेर ढेर जाने सचेत हुइनाके साथे बनजंगल संरक्षणमे टेवा पुगल बा । महिलाहुकनके लाग आयमुलक तथा सीप तालिमसंगे दिगो जिविकोपार्जनके सहयोग पुगल बा । उहीसे लैङिक हिंसामे न्यूनिकरण हुइल उहाँ बटैलै । परियोजनासे जातीय छुवाछुटके अन्त्यफे करल उहाँ बटैलै ।

वडा सदस्य सोभा परियार संस्थाके कारण ढेर महिला आर्थिक सशक्तीकरण ओर गैल बटैली । उहाँ कहली, वडा नम्बर ४ मे चार महिला महिला समुह गठनसंगे उहाँहुक्रे आयमुलक उद्यम संचालन करल बटै जिहीहे महिलाहुक्रे आत्मनिर्भरसमेट हुइटी बटै । वडा नम्बर ४ के वडा स्तरीय भल्मन्सा समितिके संयोजक जगलाल चौधरी महिलाहुकनहे खाली बैठनासे कुछ न कुछ उद्यम संचालन करलेसे घर खर्च ओ लर्कनहे पह्रैना एक÷दुई रुप्या जोहो करेसेक्ना बटैलै ।

कार्यक्रममे महिला भल्मन्सा तिलादेवी सुनार, ज्योति परियार, ईश्वरीदेवी चौधरी, कुमारी वडलगायत मन्तव्य राखल रहिट । कार्यक्रम संचालन दलित महिला अधिकार मञ्च कैलालीसे डिसिएके सहयोगमे कैलारी गाउँपालिकामे संञ्चालन करल पहुँच परियोजनाके सामाजिक परिचालक सीमा महतो करल रही । कार्यक्रममे कार्यपालिका सदस्य लालबहादुर विकलगायत चार समुहके महिला प्रतिनिधिहुकनके सहभागिता रहे ।